ខេមរសហព័ន្ធកីឡាតេក្វាន់ដូWT ធ្វើតេស្តិ៍អត្តពលិកត្រៀម ចូលក្រុមជម្រើសជាតិ២០២១ និង SEA GAMES 2021
ភ្នំពេញ៖ខេមរសហព័ន្ធកីឡាតេក្វាន់ដូWT(World Taekwondo)នាយប់ថ្ងៃទី២៥ខែវិច្ឆិកាឆ្នាំ២០២០ បានរៀបចំការប្រកួតធ្វើតេស្តិ៍សមត្ថភាពកីឡាករកីឡាការិនីដែលជាប់ចំណាត់ថ្នាក់ពី១ដល់៣ នៃព្រឹត្តិការណ៍ការប្រកួតកីឡាតេក្វាន់ដូWT ជ្រើសរើសជើងឯកថ្នាក់ជាតិ២០២០ ត្រៀមក្លាយជាក្រុមជម្រើសជាតិ២០២១ខាងមុខនេះនៅអាគារប៉ូយ៉ុងខ្មែរនៃពហុកីឡដ្ឋានជាតិ។
លោក គង់ សក្ខិដា អគ្គលេខាធិការរងនៃខេមរសហព័ន្ធកីឡាតេក្វាន់ដូWT បានប្រាប់ឲ្យដឹងថា កីឡាករ-កីឡាការិនីដែលទទួលបានមេដាយមាសនៃរើសជើងឯកថ្នាក់ជាតិ២០២០ជាប់ដោយស្វ័យប្រវត្តិ ចំណែកក្រុមកីឡាករ-កីឡាការិនីទទួលបានមេដាយប្រាក់ និងសំរិទ្ធ ព្រមទាំងអត្តពលិកបម្រុងលើ៨ប្រភេទទម្ងន់ក្នុងនោះយើងយកតែកីឡាការិនី ៣ នាក់ និងកីឡាករ៥នាក់តែប៉ុណ្ណោះ។
លោកបានបន្តថា សម្រាប់ការធ្វើតេស្តិ៍សមត្ថភាពកីឡាករកីឡាការិនី មាន៨ប្រភេទទម្ងន់រួមមានកីឡាការិនី៖៤៩គីឡូក្រាម៥៣គីឡូក្រាម និង៥៧ គីឡូក្រាម ចំពោះកីឡាករវិញ ៥៤គីឡូក្រាម ៥៨គីឡូក្រាម ៦៣គីឡូក្រាម ៦៨គីឡូក្រាម និង៧២គីឡូក្រាម ដើម្បីត្រៀមចូលរួមព្រឹត្តិការណ៍ការប្រកួតកីឡា SEA GAMES 2021 លើកទី៣១នៅប្រទេសវៀតណាម ៕
