ស្លាប់២នាក់ និងជាង១០នាក់ចូលសង្គ្រោះបន្ទាន់ សង្ស័យពុលទឹកដែលមានសារធាតុគីមីពុលនៅ ស្រុកទឹកផុស
កំពង់ឆ្នាំង ៖ ករណីអ្នកសង្ស័យពុលដោយសារថ្នាំបាញ់នៅចំការឪឡឹកនៅខេត្តកំពង់ឆ្នាំង បណ្តាលឲ្យស្ត្រី២នាក់បានស្លាប់ ហើយអ្នកភូមិ១១នាក់ទៀតមានអការធ្ងន់ធ្ងរ ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្ត បន្ទាប់ពីពួកគេផឹកទឹកអណ្ដូងនៅក្នុងចម្ការឪឡឹកមួយនៅឯវាលស្រែ។
លោកជំទាវវេជ្ជបណ្ឌិត ឱ វណ្ណឌីន អ្នកនាំពាក្យក្រសួងសុខាភិបាល បានជម្រាប ជូនអ្នកសារព័ត៌មានតាមបណ្តាញទំនាក់ទំនងសង្គមតេឡេក្រាម នៅវេលាម៉ោងជាង៨យប់ថ្ងៃទី២៧ វិច្ឆិកា ២០២០នេះឲ្យដឹងថា តាមរបាយការណ៍ស្តីពីករណីសង្ស័យពុលទឹក ដែលមានសារធាតុគីមីពុល នៅភូមិជីប្រ៉ង ឃុំជៀប ស្រុកទឹកផុស ខេត្តកំពង់ឆ្នាំង សរុបជនរងគ្រោះចំនួន១៣នាក់ ស្រី៨នាក់ និងប្រុស៥នាក់ ដែលមានអាយុពី៤ឆ្នាំ ដល់៥៣ឆ្នាំ ដោយមានស្លាប់ចំនួន ២នាក់ ស្រីទាំងពីរនាក់ និងអ្នកសម្រាកនៅសង្គ្រោះបន្ទាន់មន្ទីរពេទ្យខេត្តកំពង់ឆ្នាំង មានចំនួន១១នាក់ ក្នុងនោះមានបុរសម្នាក់ មានសភាពធ្ងន់ ។ ស្ត្រីម្នាក់អាយុ៤៣ឆ្នាំ បានស្លាប់កាលពីព្រឹកថ្ងៃម្សិលមិញនេះ ហើយស្ត្រីម្នាក់ទៀតអាយុ៤៧ឆ្នាំ បានស្លាប់នៅរសៀលថ្ងៃដដែលនោះផងដែរ នៅក្រោយពេលបញ្ជូនទៅសង្គ្រោះនៅមន្ទីរពេទ្យបង្អែកខេត្តកំពង់ឆ្នាំង។
ប្រជាពលរដ្ឋទាំងនោះដែលរស់នៅភូមិជីប្រ៉ង ឃុំជៀប បានធ្លាក់ខ្លួនក្នុងស្ថានភាពបែបនោះ បន្ទាប់ពីពួកគេផឹកទឹកអណ្ដូងនៅក្នុងចម្ការឪឡឹកមួយស្ថិតនៅវាលស្រែ ជាទីដែលពួកគេទៅច្រូតស្រូវ។
លោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានឲ្យដឹងថា ប្រជាពលរដ្ឋដែលកំពុងសម្រាកព្យាបាលនៅមន្ទីរពេទ្យបង្អែកខេត្ត មានស្ថានភាពល្អប្រសើរឡើងវិញហើយ ហើយពួកគេអាចត្រូវបានអនុញ្ញាតឱ្យចាកចេញនៅក្នុងរយៈពេលពីរបីថ្ងៃខាងមុខទៀត។
លោកជំទាវវេជ្ជបណ្ឌិត ឱ វណ្ណឌីន បានបញ្ជាក់ថា “ករណីអ្នកសង្ស័យពុលដោយសារថ្នាំបាញ់នៅចំការឪឡឹកនៅខេត្តកំពង់ឆ្នាំង ខ្ញុំសូមជម្រាបជូនថា តាមរបាយការណ៍ស្តីពីករណីសង្ស័យពុលទឹកដែលមានសារធាតុគីមីពុលនៅភូមិជីប្រ៉ង ឃុំជៀប ស្រុកទឹកផុស ខេត្តកំពង់ឆ្នាំង សរុបជនរងគ្រោះចំនួន១៣នាក់ ស្រី៨នាក់ និងប្រុស៥នាក់ ដែលមានអាយុពី ៤ឆ្នាំ ដល់ ៥៣ឆ្នាំ ដោយមានស្លាប់ចំនួន ២នាក់ ស្រីទាំងពីរនាក់ និង អ្នកសម្រាកនៅសង្គ្រោះបន្ទាន់មន្ទីរពេទ្យខេត្តកំពង់ឆ្នាំងចំនួន ១០នាក់ ក្នុងនោះ មានបុរស ១នាក់ មានសភាពធ្ងន់។ តាមរបាយការណ៌ពីមន្ទីរសុខាភិបាលខេត្តកំពង់ឆ្នាំង ក៏បានរាយការណ៍ដែរថា តាមការសាកសួរ អ្នកភូមិជីប្រ៉ង ទាំងចាស់ និងក្មេងបានទៅច្រូតស្រូវនៅព្រៃអូរគគីរ ឃុំជៀប ចាប់ពីថ្ងៃទី២៣ ខែវិច្ឆិកា ឆ្នាំ២០២០ រហូតដល់ថ្ងៃ២៥ ខែវិច្ឆិកា ឆ្នាំ២០២០។ ពេលព្រឹកថ្ងៃទី២៤ ប្រហែលម៉ោង១១ថ្ងៃត្រង់ ពួកគាត់បានអស់ទឹកសម្រាប់បរិភោគ ក៏បានទៅដងទឹកអណ្តូងដែលគេជីកនៅតាមវាលស្រែយកទឹកសម្រាប់ប្រើប្រាស់ និងយកមកចែកគ្នាបរិភោគពេលបាយថ្ងៃត្រង់ (សូមបញ្ជាក់ថាពេលព្រឹកនោះ មានគេឃើញកសិករដាំឪឡឹកក្បែរនោះ បានយកធុងថ្នាំលាយ និងលាងធុងថ្នាំនៅទីនោះ មុន និងក្រោយបាញ់ថ្នាំឪឡឹកគាត់)។ ក្រោយពីពិសារទឹកនោះបន្តិចមក មានស្ត្រីម្នាក់ចេញសញ្ញាក្អួតចង្អោរ តែមិនមានអ្នកចាប់អារម្មណ៍ថាពុលថ្នាំ ស្មានថាខ្យល់ចាប់ និងជាបន្តបន្ទាប់មានអ្នកអស់កម្លាំង ឈឺក្បាល ទន់ដៃជើង ពិបាកដកដង្ហើម និងមានរហូតដល់ស្លាប់២នាក់ ហើយអ្នកធ្ងន់ម្នាក់បញ្ជូនទៅសម្រាកព្យាបាលនៅមន្ទីរពេទ្យខេត្តកំពង់ឆ្នាំង និងតាមដានជាបន្ត ១០នាក់ផ្សេងទៀតនៅថ្ងៃនោះភ្លាមៗ។ បច្ចប្បន្ន ស្ថាបភាពអ្នកពុលទាំង១០នាក់ មានសភាពបានធូរស្រាលបានចេញត្រឡប់ទៅផ្ទះសម្បែងរៀងៗខ្លួន នៅថ្ងៃទី២៧ នេះរួចហើយ តែស្ត្រីម្នាក់អាយ៥៣ឆ្នាំ ក៏បានធូរស្បើយពីការពុលនេះហើយ តែត្រូវនៅបន្តព្យាបាលដោយសារគាត់មានជំងឺសួត ដែលក្រុមគ្រូពេទ្យបានពិនិត្យឃើញ”៕
