រថយន្តស្ទូច ចុះពីលើស្ពានព្រែកសំរោង ដាច់ហ្វ្រាំង បុករង្វង់មូលហើយបុករថយន្តដឹកស៊ីម៉ងត៍ កៀបជាប់តៃកុងរងរបួសធ្ងន់
ភ្នំពេញ ៖ រថយន្តស្ទូចមួយគ្រឿង បើកចុះពីលើស្ពានព្រែកសំរោង ដាច់ហ្វ្រាំងជ្រុលបុកឡើងលើរង្វង់មូល បណ្ដាលឲ្យខូចខាតហើយ រថយន្តមិនទាន់អស់ល្បឿន បន្តទៅមុខទាំងបញ្ច្រាសទិសទៅបុកចំពាក់កណ្ដាលរថយន្តសណ្ដោងដឹកស៊ីម៉ងត៍ បណ្តាល ឲ្យកៀបជាប់តៃកុងរថយន្តតែម្ដង ។ តៃកុងរថយន្តស្ទូចកៀបជាប់ក្នុងកាប៉ីន ត្រូវបានប្រជាពលរដ្ឋនិងសមត្ថកិច្ច ជួយគាស់យកចេញ មកខាងក្រៅ បញ្ជូនទៅមន្ទីរពេទ្យ។
គ្រោះថ្នាក់ចរាចរណ៍នេះបានកើតឡើង នៅវេលាម៉ោង ១២:០២នាទី ថ្ងៃត្រង់ ថ្ងៃអាទិត្យ ទី២៩ ខែវិច្ឆិកា ឆ្នាំ២០២០ នៅចំណុចរង្វង់មូលព្រែកសំរោង ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្ដាល ។
រថយន្តបង្កជាប្រភេទរថយន្តស្ទូចធុនធំ ម៉ាក KATO ពណ៌លឿង មិនមានផ្លាកលេខ បើកបរដោយបុរសមិនស្គាល់អត្តសញ្ញាណម្នាក់ ដែលរងរបួសធ្ងន់កៀបជាប់ក្នុងកាប៉ីន និងមានព្រូលើរថយន្ត ។ ចំណែកឯរថយន្តមួយគ្រឿងទៀត ជាប្រភេទរថយន្តធុនធំសណ្ដោងកន្ទុយ ក្បាលរថយន្តពាក់ផ្លាកលេខព្រះសីហនុ 3A-4931 និងកន្ទុយសណ្ដោងពាក់ផ្លាកលេខភ្នំពេញ 4A-4928 ដឹកស៊ីម៉ងត៍រាប់តោន ។
មុនពេលកើតហេតុ បុរសម្នាក់បានបើករថយន្តស្ទូច ធ្វើដំណើរឆ្លងកាត់ស្ពានព្រែកសំរោង ក្នុងទិសដៅពីកើតមកលិច លុះចុះពីលើស្ពាន ដោយឃើញអ្នកបើកបរស្រែកពីក្នុងកាប៉ីន ប្រាប់ឲ្យអ្នកដំណើរដទៃទៀតជៀសពីមុខរថយន្ត ព្រោះរថយន្តដាច់ហ្វ្រាំងហើយ ហើយអ្នកបើកបរក៏សម្រេចចិត្តកាច់ចង្កូតតម្រង់ឡើងរង្វង់មូល ដើម្បីកុំឲ្យបុករះអ្នកដំណើរដទៃទៀត ទើបបណ្ដាលឲ្យរថយន្តជ្រុលបុក ឡើងលើសួនរង្វង់ មូលស្ពានព្រែកសំរោង បណ្តាលឲ្យរងការខូចខាតដើមឈើ បង្គោលភ្លើងតូចៗ ឃឿនចិញ្ចើមសួនអស់មួយចំនួន ហើយភ្លាមៗនោះដែររថយន្តបង្កមិនទាន់អស់ល្បឿន បន្តទៅមុខទាំងបញ្ច្រាសទិសទៅជ្រុលទៅបុកផ្ទប់ចំពាក់កណ្ដាល រថយន្តធុនធំសណ្ដោងកន្ទុយដឹកស៊ីម៉ងត៍មួយគ្រឿងទៀត ដែលកំពុងបើកបរតាមបណ្ដោយផ្លូវ១១៥ បំណងឡើងស្ពានបណ្តាល ឲ្យរួញកៀបជាប់តៃកុងកាប៊ីនរថយន្តតែម្ដង កៀបជាប់ជើងអ្នកបើកបររងរបួសធ្ងន់ រើមិនរួច ។
ភ្លាមៗនោះ បងប្អូនប្រជាពលរដ្ឋនិងអ្នកដំណើរ រួមទាំងសមត្ថកិច្ចមូលដ្ឋាន សហការជាមួយនគរបាលចរាចរណ៍ក្រុងតាខ្មៅ បាននាំគ្នាយកដែកមកជួយគាស់កាប៉ីន ដើម្បីជួយសង្គ្រោះអ្នកបើកដែលកៀបជាប់ក្នុងកាប៊ីន តែគាស់មិនបានឡើយ ទាល់តែយកខ្សែកាបថ្ពក់ជាមួយដែកកាប៊ីនទាញចេញ ទើបអាចសង្គ្រោះអ្នកបើកបរយកចេញពីរថយន្តបាន រួចបញ្ជូនតាមរថយន្តសឺរ៉ែនរបស់អធិការដ្ឋាននគរបាលក្រុងតាខ្មៅ យកទៅសង្គ្រោះនៅឯមន្ទីរពេទ្យបង្អែកជ័យជំនះ។
គ្រោះថ្នាក់ចរាចរណ៍នេះ បណ្តាលឲ្យកកស្ទះចរាចរណ៍ដល់អ្នកដំណើរតាមផ្លូវថៃហ្គ័រ និងលើស្ពានព្រែកសំរោង៕