អ្នកដែលរស់នៅក្នុងខណ្ឌច្បារអំពៅចំនួន១៣នាក់ មានវិជ្ជមានវីរុសកូវីដ-១៩
គិតពីថ្ងៃទី២៩ ខែវិច្ឆិកា ដល់ថ្ងៃទី៣ ខែធ្នូ ឆ្នាំ២០២០ ក្រសួងសុខាភិបាល បានធ្វើតេស្តអ្នកប៉ះពាល់សរុបទាំងអស់បានចំនួន ៩,៧៩៣នាក់ ដែលនៅក្នុងចំនួននេះ មានអ្នកវិជ្ជមានវីរុសកូវីដ-១៩ថ្មី សរុបចំនួន ២៣នាក់ ក្នុងនោះមានអ្នកដែលរស់នៅក្នុងខណ្ឌច្បារអំពៅចំនួន១៣នាក់ ដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ពួកគេទាំងនោះរួមមាន ៖
១៖ បុរសជនជាតិខ្មែរអាយុ ៣៩ឆ្នាំ មានអាសយដ្ឋានស្នាក់នៅបូរី លឹម ឈាងហាក់ សង្កាត់វាលស្បូវខណ្ឌ ច្បារអំពៅ រាជធានីភ្នំពេញ ជាបុគ្គលិកនៅហាងលក់កុំព្យូទ័រ ឈ្មោះ ឌីម កុំព្យូទ័រ ផ្លូវព្រះសីហនុ រាជធានីភ្នំពេញ ដែលត្រូវជាបងថ្លៃជីដូនមួយរបស់បុរសអាយុ ២៣ឆ្នាំ ដែលបានរកឃើញមានវីរុសកូវីដ-១៩ នៅថ្ងៃទី០២ ខែធ្នូ ឆ្នាំ២០២០ កំពុងតែសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
២៖ ស្ត្រីជនជាតិខ្មែរអាយុ ៣២ឆ្នាំ ជាភរិយាបុរសអាយុ ៣៩ឆ្នាំខាងលើ មានអាសយដ្ឋានស្នាក់នៅ បូរី លឹម ឈាងហាក់ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ដែលត្រូវជាបងប្អូនជីដូនមួយ បុរសអាយុ ២៣ឆ្នាំ ដែលបានរកឃើញវីរុសកូវីដ-១៩ នៅថ្ងៃទី០២ ខែធ្នូ ឆ្នាំ២០២០។
៣៖ កុមារាជនជាតិខ្មែរអាយុ ០៣ឆ្នាំ ត្រូវជាកូនប្រុស បុរសអាយុ ៣៩ឆ្នាំ និងស្ត្រីអាយុ៣២ឆ្នាំ ខាងលើ មានអាសយដ្ឋានស្នាក់នៅបូរី លឹម ឈាងហាក់ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ដែលត្រូវជាក្មួយប្រុសបុរសអាយុ ២៣ឆ្នាំ ដែលបានរកឃើញវីរុសកូវីដ-១៩ នៅថ្ងៃទី០២ ខែធ្នូ ឆ្នាំ ២០២០។
៤៖ បុរសជនជាតិខ្មែរអាយុ ២៣ឆ្នាំ មានអាសយដ្ឋានស្នាក់នៅសង្កាត់វាលស្បូវ ខណ្ឌច្បារអំពៅ រាជធានីភ្នំពេញ ជាបុគ្គលិកធនាគារចិន (កាណាឌីយ៉ា ផ្លូវមុនីវង្ស) ដែលបានប៉ះពាល់ជាមួយស្ត្រីអាយុ៣៦ឆ្នាំ ដែលរកឃើញវីរុសកូវីដ១៩ កាលពីថ្ងៃទី២៩ ខែវិច្ឆិកា ឆ្នាំ២០២០។ លទ្ធផលធ្វើតេស្តវត្ថុសំណាករបស់បុរសរូបនេះ ផ្តល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ គឺវិជ្ជមានវីរុសកូវីដ-១៩ ហើយបច្ចុប្បន្នអ្នកជំងឺ ត្រូវបានដាក់ឱ្យសម្រាកព្យាបាល នៅមន្ទីរពេទ្យមិត្តភាពខ្មែរ-សូ វៀត រាជធានីភ្នំពេញ។
៥៖ ស្ត្រីជនជាតិខ្មែរអាយុ ២១ឆ្នាំ មានអាសយដ្ឋានស្នាក់នៅសង្កាត់វាលស្បូវ ខណ្ឌច្បារអំពៅ រាជធានីភ្នំពេញ (ត្រូវជាប្អូនស្រីបង្កើតស្ត្រីខាងលើ) ជាបុគ្គលិកធនាគារកាឆេយូណាយធីត រាជធានីភ្នំពេញ។ លទ្ធផលធ្វើតេស្តវត្ថុសំណាករបស់ស្ត្រីនេះ ផ្តល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ គឺវិជ្ជមានវីរុសកូវីដ-១៩ ហើយបច្ចុប្បន្នអ្នកជំងឺ ត្រូវបានដាក់ឱ្យសម្រាកព្យាបាល នៅមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។
៦៖ ស្ត្រីជនជាតិខ្មែរអាយុ ២៥ឆ្នាំ និងទារក (ជនជាតិខ្មែរ) អាយុ៧ខែ មានអាសយដ្ឋាននៅស្នាក់ សង្កាត់និរោធ ខណ្ឌច្បារអំពៅ រាជធានីភ្នំពេញ។ លទ្ធផលធ្វើការវិភាគវត្ថុសំណាករបស់បុគ្គលទាំងពីរខាងលើ ដែលផ្តល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ គឺវិជ្ជមានវីរុសកូវីដ-១៩ ហើយបច្ចុប្បន្នអ្នកជំងឺត្រូវ បានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
៧៖ ស្ត្រីជនជាតិខ្មែរ អាយុ៤៥ឆ្នាំ រស់នៅសង្កាត់និរោធ ខណ្ឌច្បារអំពៅ រាជធានីភ្នំពេញ ជាម្តាយមីងរបស់អ្នកជំអឺកូវីដ១៩ថ្មី ដែលរកឃើញក្នុងព្រឹត្តិការណ៍សហគមន៍ ២៨ ខែវិច្ឆិកា។
៨៖ ស្ត្រីជនជាតិខ្មែរ អាយុ៣០ឆ្នាំ រស់នៅសង្កាត់និរោធ ខណ្ឌច្បារអំពៅ រាជធានីភ្នំពេញ គ្រួសារអ្នកបើកបររបស់អ្នកជំងឺកូវីដ១៩ ថ្មី ដែលរកឃើញក្នុងព្រឹត្តការណ៍ សហគមន៍ ២៨ វិច្ឆិកា។
៩៖ ស្ត្រីជនជាតិខ្មែរអាយុ (មិនបានរាយការណ៍) រស់នៅសង្កាត់និរោធ ខណ្ឌច្បារអំពៅ រាជធានីភ្នំពេញ ជាអ្នកប៉ះពាល់ផ្ទាល់ជាមួយអ្នកជំងឺកូវីដ១៩ ថ្មី ដែលរកឃើញក្នុងព្រឹត្តិការណ៍សហគមន៍ ២៨វិច្ឆិកា។
១០៖ ស្ត្រីជនជាតិខ្មែរ រស់នៅសង្កាត់និរោធ ខណ្ឌច្បារអំពៅ រាជធានីភ្នំពេញ ជាម្តាយមីងរបស់អ្នកជំងឺកូវីដ១៩ ថ្មី ដែលរកឃើញក្នុងព្រឹត្តិការណ៍សហគមន៍ ២៨ វិច្ឆិកា ។
១១៖ កុមារា ជនជាតិខ្មែរ អាយុ៧ឆ្នាំ រស់នៅសង្កាត់និរោធ ខណ្ឌច្បារអំពៅ ជាក្មួយប្រុសរបស់អ្នកជំងឺកូវីដ១៩ ថ្មី ដែលរកឃើញក្នុងព្រឹត្តិការណ៍ សហគមន៍ ២៨វិច្ឆិកា។
១២៖ បុរសជនជាតិខ្មែរអាយុ ៣៤ឆ្នាំ រស់នៅសង្កាត់និរោធ ខណ្ឌច្បារអំពៅ រាជធានីភ្នំពេញ ដែលជាអ្នកប៉ះពាល់អ្នកជំងឺកកូវីដ១៩ថ្មី ដែលរកឃើញក្នុងព្រឹត្តិការណ៍សហគមន៍ ២៨វិច្ឆិកា។
ក្រសួងសុខាភិបាលបានបញ្ជាក់ថា នៅថ្ងៃទី០៣ ខែធ្នូ ឆ្នាំ២០២០ វត្ថុសំណាកដែលនៅសល់ពីថ្ងៃទី០១ ខែធ្នូ ឆ្នាំ២០២០ ចំនួន៩៦នាក់ បូក បន្ថែមចំនួនវត្ថុសំណាកទទួលបានបន្ថែម នៅថ្ងៃដដែលពីខេត្ត និងរាជធានីភ្នំពេញ សរុបមានចំនួន ១,០២៧ នាក់ ត្រូវបានធ្វើវិភាគដោយវិទ្យាស្ថានប៉ាស្ទ័រកម្ពុជា គឺមានលទ្ធផល វិជ្ជមានវីរុសកូវីដ-១៩ ថ្មី ចំនួន០៤នាក់ (ដែលជាអ្នកជំងឺខាងលើនេះ)។ ដោយឡែកមាននៅសល់វត្ថុសំណាកចំនួន ៧៩សំណាកផ្សេងទៀត ដែលត្រូវ វិភាគបន្តនៅថ្ងៃទី០៤ ខែធ្នូ ឆ្នាំ២០២០។
គិតពីថ្ងៃទី២៩ ខែវិច្ឆិកា ដល់ថ្ងៃទី០៣ ខែធ្នូ ឆ្នាំ២០២០ ក្រសួងសុខាភិបាល បានធ្វើតេស្តអ្នកប៉ះពាល់សរុបទាំងអស់បានចំនួន ៩,៧៩៣នាក់ ដែលនៅក្នុងចំនួននេះ មានអ្នកវិជ្ជមានវីរុសកូវីដ-១៩ថ្មី សរុបចំនួន ២៣នាក់ ដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ដោយសង្កេតឃើញថា មានការកើនឡើងនូវអ្នកជំងឺកូវីដ-១៩ ដែលមានការចម្លងបន្តគ្នាពីកន្លែងមួយ ទៅកន្លែងមួយ ហើយការរុករកស្រាវជ្រាវ កំពុងតែត្រូវបានធ្វើយ៉ាងសកម្មនោះ ក្រសួងសុខាភិបាល សូមអំពាវនាវឱ្យគ្រប់អ្នកប៉ះពាល់ក្នុងព្រឹត្តិការណ៍ «សហគមន៍ ២៨វិច្ឆិកា» ទាំងអស់ ជាពិសេសអ្នកដែលប៉ះពាល់ជាមួយអ្នកជំងឺដែលធ្វើការនៅធនាគារកាថេ (ផ្លូវសម្ដេចប៉ាន) និងធនាគារចិន (អាគារកាណាឌីយ៉ា ផ្លូវព្រះមុនីវង្ស) ក្នុងរាជធានីភ្នំពេញ តម្រូវឱ្យធ្វើចត្តាឡីស័កនៅផ្ទះ ឬនៅសណ្ឋាគារ ឬនៅតាមមណ្ឌលចត្តាឡីស័កនៅតាមខេត្ត ឱ្យបានគ្រប់ចំនួន១៤ថ្ងៃ និងអនុវត្តន៍វិធានការការពារខ្លួន កុំឱ្យចម្លងទៅអ្នកដទៃ ឱ្យបានត្រឹមត្រូវជាទីបំផុត ទៅតាមការណែនាំដ៏ខ្ពង់ខ្ពស់របស់ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងរបស់ក្រសួងសុខាភិបាល ហើយកុំដើរចេញក្រៅផ្ទះ ឬចេញពីមណ្ឌលចត្តាឡីស័ក ក្នុងអំឡុងពេលធ្វើចត្តាឡីស័កនេះ ឱ្យសោះ ដើម្បីទប់ស្កាត់ការចម្លងវីរុសដ៏កាចសាហាវនេះ ពីម្នាក់ទៅម្នាក់ និងកុំឱ្យមានការរាតត្បាតនៅក្នុងសហគមន៍។
អាជ្ញាធរថ្នាក់ក្រោមជាតិ មានបន្ទុកទទួលខុសត្រូវ លើការចាត់ចែងគ្រប់គ្រង និងតាមដានការធ្វើចត្តាឡីស័កនេះ ដោយបុគ្គលម្នាក់ៗ ត្រូវទទួលខុសត្រូវផ្ទាល់ខ្លួន ក្នុងការរក្សាការពារខ្លួនកុំឱ្យមានការឆ្លងវីរុសកូវីដ-១៩ មកខ្លួនឯង ទៅអ្នកដទៃ និងនៅក្នុងសហគមន៍ ដើម្បីសុខភាពផ្ទាល់ខ្លួនលោកអ្នក ក្រុមគ្រួសារលោកអ្នក និងសហគមន៍ បានចៀសផុតនូវការឆ្លងជំងឺដ៏ កាចសាហាវនេះ។
សម្រាប់បងប្អូនប្រជាពលរដ្ឋទូទៅ សូមបន្តការរស់នៅធម្មតាតាមបែបគន្លងថ្មី ដោយពាក់ម៉ាស់ (ក្នុងករណីចាំបាច់) ជាពិសេសនៅក្នុងកាលទេសៈនេះ សូមកុំដើរចេញក្រៅផ្ទះ បើមិនចាំបាច់ តែបើអាក់ខានមិនបានពេលចេញដើរ ត្រូវពាក់ម៉ាស់ជាប់ជានិច្ច ត្រូវលាងសម្អាតដៃជាមួយសាប៊ូ និងទឹកស្អាត ឬមួយអាល់ កុល ឬទឹកដែលសម្រាប់លាងដៃ ឱ្យបានញឹកញាប់ កុំយកដៃដែលមិនបានលាងសម្អាត មកប៉ះផ្ទៃមុខមាត់របស់ខ្លួន និងត្រូវរក្សាសុវត្ថិភាពសង្គម។
សូមជម្រាបថា គិតត្រឹមម៉ោង០៧និង០០ព្រឹកថ្ងៃទី៤ ខែធ្នូ ឆ្នាំ២០២០ នៅកម្ពុជារកឃើញអ្នកឆ្លងកូវីដ១៩ សរុប៣៣៥នាក់ (ស្ត្រី ៧៦នាក់ និងបុរស ២៥៩នាក់) ក្នុងនោះចំនួនអ្នកព្យាបាលជាសះស្បើយសរុបទូទាំងប្រទេស មានចំនួន ៣០៤នាក់ និងអ្នកសម្រាកព្យាបាលនៅមន្ទីរពេទ្យចំនួន ៣១នាក់។
ក្រសួងសុខាភិបាល សូមអំពាវនាវជូនដល់បងប្អូនប្រជាពលរដ្ឋទាំងអស់ សូមចូលរួមអនុវត្តន៍តាម សារសំឡេងណែនាំរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នាយប់ថ្ងៃទី ២៩ និងប្រសាសន៍ណែនាំដ៏ខ្ពង់ខ្ពស់របស់សម្ដេចតេជោ ដែលបានថ្លែងចេញពីខេត្តសៀមរាបនាព្រឹកថ្ងៃទី៣០ ខែវិច្ឆិកា ឆ្នាំ២០២០ ពាក់ព័ន្ធនឹងករណីវិជ្ជមាន វីរុសកូវីដ-១៩ រកឃើញក្នុងពេលថ្មីៗនេះ និងតាមការណែនាំរបស់ក្រសួងសុខាភិបាល ដោយសូមឱ្យ អ្នកទាំងអស់ ដែលពាក់ព័ន្ធជាមួយនឹង «ព្រឹត្តិការណ៍សហគមន៍ ២៨វិច្ឆិកា» ដែលបានរកឃើញវិជ្ជមាន វីរុសកូវីដ-១៩ ថ្មី មានដូចជាអ្នកប៉ះពាល់នៅផ្សារអីអន១ សាលារៀនមួយចំនួន និងកន្លែងផ្សេងៗ ដែលប៉ះពាល់ជាមួយអ្នកជំងឺនៅក្នុងរាជធានីភ្នំពេញ ខេត្តបន្ទាយមានជ័យ ខេត្តបាត់ដំបង ខេត្តស្ទឹងត្រែង ខេត្តមណ្ឌលគិរី ខេត្តព្រះវិហារ និងខេត្តសៀមរាប ជាដើម សូមអញ្ជើញទៅធ្វើតេស្តរកវីរុសកូវីដ-១៩ ដែលបន្តធ្វើនៅថ្ងៃនេះទៀត នៅតាមទីតាំង៖ បរិវេណផ្សារអីអន១ បរិវេណក្រសួងមហាផ្ទៃ បរិវេណមន្ទីរពេទ្យមិត្តភាពខ្មែរ-សូវៀត (សម្រាប់សិស្សសាលា និងលោកគ្រូអ្នកគ្រូដែលពាក់ព័ន្ធ) និងនៅពន្ធនាគារ ព្រៃស (សម្រាប់អ្នកពាក់ព័ន្ធកន្លែងនោះ) ហើយក្រសួងអាចធ្វើនៅកន្លែងផ្សេងៗទៀតទៅតាមការ ចាំបាច់ផងដែរ ដែលតេស្តនេះមានធ្វើទៅតាមថ្ងៃដូចតទៅ៖
១) តេស្តលើកទី១ ធ្វើនៅថ្ងៃទី២៩ និងបន្តធ្វើនៅថ្ងៃទី ៣០ ខែវិច្ឆិកា ឆ្នាំ២០២០
២) តេស្តលើកទី២ ធ្វើនៅថ្ងៃទី០៨ ខែធ្នូ ឆ្នាំ២០២០
៣) តេស្តលើកទី ៣ ធ្វើនៅថ្ងៃទី១២ ខែធ្នូ ឆ្នាំ២០២០
ក្រសួងសុខាភិបាល បានបន្ថែមថា បុគ្គលដែលពាក់ព័ន្ធទាំងអស់ ត្រូវធ្វើចត្តាឡីស័កចំនួន ១៤ថ្ងៃ នៅតាមផ្ទះរបស់ខ្លួន ឱ្យបានត្រឹមត្រូវ តាមការណែនាំរបស់ក្រសួងសុខាភិបាល ដែលតែងតែចេញផ្សាយជារឿយៗនូវចំណុច១០យ៉ាងនៃការ ធ្វើចត្តាឡីស័ក នៅតាមផ្ទះ នៅក្នុងមណ្ឌលចត្តាឡីស័ក ឬនៅតាមសណ្ឋាគារ ហើយសម្រាប់អ្នកនៅដែលមិន មានលទ្ធភាពធ្វើចត្តាឡីស័កនៅផ្ទះខ្លួនឯងនោះ សូមអញ្ជើញទៅស្នាក់នៅធ្វើចត្តាឡីស័ក នៅសណ្ឋាគារ សុខាភ្នំពេញ ដែល សម្ដេចតេជោនាយករដ្ឋមន្ត្រី បានប្រកាសថាការធ្វើតេស្តរកកូវីដ-១៩ និងការស្នាក់ធ្វើ ចត្តាឡីស័កនៅសណ្ឋាគារនេះ គឺរដ្ឋជាអ្នកចេញសាហ៊ុយជូនបងប្អូន ហើយសម្រាប់នៅតាមបណ្ដាខេត្ត សូមអាជ្ញាធរថ្នាក់ក្រោមជាតិ ចាត់ចែងរៀបចំ និងគ្រប់គ្រងអ្នកធ្វើចត្តាឡីស័កទាំងអស់ឱ្យបានហ្មត់ចត់ ជាទីបំផុត អ្នកដែលមិនមានលទ្ធភាពធ្វើចត្តាឡីស័កនៅតាមផ្ទះ ត្រូវស្នាក់នៅមណ្ឌលចត្តាឡីស័កដែល រៀបចំដោយអាជ្ញាធរខេត្តដោយរដ្ឋជាអ្នកទទួលបន្ទុក។
កិច្ចការនេះ សំខាន់ណាស់នៅក្នុងដំណាក់កាលនេះ ដើម្បីកាត់ផ្តាច់ខ្សែចម្លងពីបុគ្គលមួយ ទៅបុគ្គលមួយពីបុគ្គលទៅក្រុមគ្រួសារ និងពីបុគ្គលចម្លង រាតត្បាតនៅក្នុងសហគមន៍។ ដូច្នេះអ្នកដែលប៉ះពាល់ទាំងអស់ សូមចូលរួមធ្វើកិច្ចការទាំងនេះ តាមការ អំពាវនាវឱ្យបានគ្រប់គ្នា ដើម្បីខ្លួនឯង ដើម្បីគ្រួសារខ្លួន និងដើម្បីសហគមន៍យើង មិនមានការចម្លង បន្តគ្នាក្នុងទ្រង់ទ្រាយធំ។ ប្រសិនបើបុគ្គលណាមានបញ្ហាសុខភាព សូមប្រញាប់ប្រញាល់ជូនព័ត៌មានតាម លេខដែលបានជូនខាងក្រោមនេះស្រាប់ ដើម្បីក្រុមគ្រូពេទ្យអាចជួយអន្តរាគមន៍បានទាន់ពេលវេលា។
ក្រសួងសុខាភិបាល អំពាវនាវដល់អ្នកដែលប៉ះពាល់ជាមួយក្រុមគ្រួសារលោកអគ្គនាយកពន្ធនាគារ ចាំបាច់ត្រូវធ្វើចត្តាឡីស័កចំនួន ១៤ថ្ងៃនៅតាមផ្ទះរបស់ខ្លួន ឲ្យបានត្រឹមត្រូវ និងនៅមណ្ឌលចត្តាឡីស័ក នៅខេត្តសៀមរាប ខេត្តស្ទឹងត្រែង ខេត្តមណ្ឌលគិរី និងបន្ទាយមានជ័យ និងអនុវត្តន៍ទៅតាមសារសំឡេង ណែនាំរបស់សម្តេចតេជោ ហ៊ុន សែន នាយប់ថ្ងៃទី២៨ ខែវិច្ឆិកា ឆ្នាំ២០២០ និងរបស់ក្រសួងសុខាភិបាល ឲ្យបានហ្មត់ចត់ជាទីបំផុត ហើយកុំដើរចេញក្រៅផ្ទះ ឬចេញពីមណ្ឌលចត្តាឡីស័ក ក្នុងអំឡុងពេលធ្វើចត្តាឡីស័កនេះឲ្យសោះ ដើម្បីទប់ស្កាត់ការចម្លងវីរុសដ៏កាចសាហាវនេះ ពីមនុស្សម្នាក់ទៅម្នាក់ និងកុំឲ្យមានការរាតត្បាតទ្រង់ទ្រាយធំនៅក្នុងសហគមន៍។
អាជ្ញាធរថ្នាក់ក្រោមជាតិ និងមន្ទីរសុខាភិបាលខេត្តដែលជាប់ពាក់ព័ន្ធ ត្រូវបន្តរុករកស្រាវជ្រាវរកអ្នកប៉ះពាល់ និងធ្វើការតាមដាន ការងារធ្វើចត្តាឡីស័កចំនួន១៤ថ្ងៃនេះជាបន្តទៀត ដើម្បីទប់ស្កាត់ការចម្លងវីរុសកូវីដ១៩បន្តគ្នា ក្នុងលក្ខណៈទ្រង់ទ្រាយធំ នៅសហគមន៍ផងដែរ។ រីឯផ្សារទំនើបអ៉ឺអន១ ត្រូវបានបិទជាបណ្តោះអាសន្នក្នុងរយៈពេល២-៣ថ្ងៃសិន ដើម្បីស្រាវជ្រាវរកអ្នកប៉ះពាល់ ប៉ុន្តែទោះយ៉ាងណា ក្រោយការស្រាវជ្រាវនិងបាញ់ថ្នាំសម្លាប់មេរោគមកនោះ ផ្សារទំនើបអ៉ឺអន១ត្រូវបានបើកឲ្យដំណើរការឡើងវិញហើយ។
ដោយអគ្គនាយកពន្ធនាគារក្រសួងមហាផ្ទៃ មានការជួបប្រជុំជាមួយថ្នាក់ដឹកនាំជាន់ខ្ពស់មួយចំនួន នៅសប្តាហ៍កន្លងទៅនេះ និងដោយសារអ្នកជំងឺមានប្រវត្តិ ធ្វើដំណើរទៅខេត្តសៀមរាប និងទីកន្លែងផ្សេងៗទៀត ដូចជាផ្សារទំនើបអ៉ីអន១ និងខេត្តបន្ទាយមានជ័យជាដើម ហើយអ្នកប៉ះពាល់ផ្ទាល់មួយចំនួន ក៏បានធ្វើដំណើរទៅខេត្តស្ទឹងត្រែង មណ្ឌលគិរី និងអាចមានខេត្តផ្សេងៗទៀត (កំពុងស្រាវជ្រាវបន្ត) នៅក្នុងរយៈពេលមួយសប្តាហ៍កន្លងទៅនេះ ក្រសួងសុខាភិបាល បានរៀបចំក្រុមការងារយកសំណាក៕ដោយ៖