សារសំឡេង សម្ដេចតេជោ ហ៊ុន សែន ផ្ញើជូនបងប្អូនជនរួមជាតិ ទប់ស្កាត់នូវការឆ្លងជម្ងឺកូវីដ១៩នៅក្នុងប្រទេសថៃ
ភ្នំពេញ៖ សារសំឡេង សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ផ្ញើជូនបងប្អូនជនរួមជាតិ នាល្ងាចថ្ងៃ២០ ខែធ្នូ ឆ្នាំ ២០២០ អំពីស្ថានភាព និងការផ្ទុះឡើងនូវការឆ្លងជម្ងឺកូវីដ១៩នៅក្នុងប្រទេសថៃ រួមទាំងណែនាំដល់ប្រជាពលរដ្ឋ និងមន្រ្តីរាជការដើម្បីទប់ស្កាត់បង្កាជម្ងឺកូវីដ១៩។
ប្រមុខរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន បានដាក់បញ្ជាឲ្យអាជ្ញាធរខេត្ត និងអ្នកពាក់ព័ន្ធ រៀបចំឲ្យមានការធ្វើចត្តាឡីស័ក នៅតាមព្រំដែនតែម្តង ដើម្បីចៀសវាងហានិភ័យណាមួយ។ ការអំពាវនាវរបស់សម្តេចតេជោ ធ្វើឡើងបន្ទាប់ពីប្រទេសថៃកំពុងផ្ទុះរាលដាលករណីឆ្លងកូវីដ-១៩ ជាង៥០០ករណី។
សម្តេច ហ៊ុន សែន ក៏បានបញ្ជាឲ្យអគ្គបញ្ជាការកងទ័ព ត្រៀមកម្លាំង និងរថយន្តជាច្រើនគ្រឿង ដើម្បីរង់ចាំដឹកជញ្ជូនពលរដ្ឋ ទៅកាន់តែមណ្ឌលចត្តាឡីស័កនានា ក្នុងករណីមណ្ឌលចត្តាឡីស័ក នៅតាមព្រំដែនកកស្ទះផងដែរ។
ទន្ទឹមជាមួយគ្នានេះ សម្តេចតេជោនាយករដ្ឋមន្ត្រី បានអំពាវនាវទៅដល់ពលរដ្ឋខ្មែរ ពិសេសកម្មករខ្មែរ ដែលមានគម្រោងធ្វើដំណើរទៅមកប្រទេសថៃ ឲ្យពន្យារការធ្វើដំណើររបស់ខ្លួនសិន។ នៅក្នុងសារពិសេសនេះ សម្តេចនាយករដ្ឋមន្ត្រី ក៏បានលើកទឹកចិត្តឲ្យពលរដ្ឋខ្មែរបន្តស្នាក់នៅ និងធ្វើការនៅក្នុងប្រទេសថៃតាមធម្មតា ហើយត្រូវឲ្យជឿទុកចិត្ត លើការគ្រប់គ្រងរបស់អាជ្ញាធរថៃផងដែរ។
ប្រមុខរដ្ឋាភិបាលកម្ពុជា បានលើកឡើងថា ការអំពាវនាវរបស់ខ្ញុំ ទៅកាន់បងប្អូនកម្មករ កម្មការិនីដែលកំពុងនៅប្រទេសផង ចំពោះឪពុកម្តាយ និងក្រុមគ្រួសារនៃកម្មករផង និងអ្នកដែលកំពុងត្រៀមខ្លួនចូលប្រទេសថៃសូមផ្អាកទាំងខុសច្បាប់ ទាំងត្រូវច្បាប់ ក៏សូមផ្អាក នៅក្នុងកាលៈទេសៈបែបនេះ ៕