លោកដួង តារា ជំនួយការសម្តេចតេជោ ចេញមុខដោះស្រាយ វិវាទដីធ្លីប្រជាពលរដ្ឋនិងពីក្រុមហ៊ុន នៅភូមិអូរឧកញ៉ាហេង
ភ្នំពេញ៖ លោកដួង តារា ជំនួយការសម្តេចតេជោហ៊ុនសែន នាយករដ្ឋមន្ត្រី បានសរសេរសារលើហ្វេសប៊ុកថា ភូមិ អូរឧកញ៉ាហេង ស្រុកព្រៃនប់ ដោយមានសំណូមពរពីប្រជាពលរដ្ឋ និងពីក្រុមហ៊ុនចំពោះវិវាទដីធ្លី ដែលបានបណ្តាលឲ្យមានអំពើហឹង្សាកាលពីពេលថ្មីៗកន្លងមក នៅភូមិអូរឧកញ៉ាហេង ស្រុកព្រៃនប់ ខេត្តព្រះសីហនុ ។
ជំនួយការសម្តេចតេជោហ៊ុនសែន បានបញ្ជាក់ថា នៅថ្ងៃសៅរ៍នេះ ខ្ញុំបានឆ្លៀតពេលចុះមកជួបបងប្អូនប្រជាពលរដ្ឋដោយផ្ទាល់ នៅទីកន្លែងកើតហតុដែលបងប្អូនកំពុងរស់នៅ។
អរគុណបងប្អូនប្រជាពលរដ្ឋ ដែលបានទទួលខ្ញុំ និងក្រុមការងារដោយទឹកចិត្តស្រឡាញ់រាប់អាន ជាមួយនឹងជំនឿជឿជាក់លើការដោះស្រាយក្រៅប្រព័ន្ធតុលាការឈរលើគោលការណ៍ឈ្នះ-ឈ្នះសម្តេចតេជោ។
ខ្ញុំបានសួរនាំព័ត៌មានមួយចំនួនរួចហើយពាក់ព័ន្ធនឹងប្រវត្តិកាន់កាប់គ្របគ្រងអាស្រ័យផលលើដី ហើយក៏បានធ្វើបញ្ជីស្រង់ឈ្មោះបងប្អូនបានមួយចំនួនហើយដែរ ដែលកំពុងមានទំនាស់ដីធ្លីជាមួយក្រុមហ៊ុន។
ទន្ទឹមនឹងនេះ ខ្ញុំបានសំណូមពរឲ្យបងប្អូនប្រជាពលរដ្ឋរក្សាភាពស្ងប់ស្ងៀម ដើម្បីទុកពេលវេលាឲ្យខ្ញុំធ្វើការជូន។ រីឯចំពោះបងប្អូនអ្នកកាសែតវិញ សូមកុំសរសេរអ្វីដែលធ្វើឲ្យមានការភ័ន្តច្រឡំ បន្ថែមបញ្ហាដល់ការដោះស្រាយទំនាស់នេះ។
យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម នឹងសូមមានចិត្តអាណិតស្រឡាញ់ពលរដ្ឋ យើងគ្រប់ទីកន្លែងដោយគ្មានការរើសអើង។
សូមបញ្ជាក់ថា រដ្ឋបាលខេត្តព្រះសីហនុ នៅថ្ងៃទី២២ ខែធ្នូ ឆ្នាំ២០២០នេះ បានជូនដំណឹងមកលោក ភឺន ផល្លា , លោកភោគ វឌ្ឍនា, លោកឈិន ហ៊ាង និងលោកឈិត ហ៊ាន និងប្រជាពលរដ្ឋនៅភូមិអូរតាសេក និងភូមិអូរឧកញ៉ាហេង ស្តីពីករណីវិវាទដីធ្លីស្ថិតនៅភូមិអូរតាសេក និងភូមិអូរឧកញ៉ាហេង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។
លោកគួច ចំរើន អភិបាលខេត្តព្រះសីហនុ ជម្រាបមក លោក ភឺន ផល្លា , លោក ភោគ វឌ្ឍនា, លោក ឈិន ហ៊ាង , លោក ឈិត ហ៊ាន និងប្រជាពលរដ្ឋនៅភូមិអូរតាសេក និងភូមិអូរឧកញ៉ាហេង ជ្រាបថា៖ ករណីវិវាទដីធ្លីស្ថិតនៅភូមិអូរឧកញ៉ាហេង និងភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ រដ្ឋបាលខេត្តព្រះសីហនុ បានចាត់តាំងក្រុមការងារចម្រុះ ចុះអង្កេតស្រាវជ្រាវដោយយកចិត្តទុកដាក់ ចាប់តាំងពីថ្ងៃទី១១ ខែកញ្ញា ឆ្នាំ២០២០ ដើម្បីធ្វើការបូកសរុបលទ្ធផល នៃការអង្កេតស្រាវជ្រាវជូនថ្នាក់ ដឹកនាំពិនិត្យសម្រេច ។ ពាក់ព័ន្ធនឹងករណីខាងលើនេះដែរ នៅថ្ងៃទី៨ ខែធ្នូ ឆ្នាំ២០២០ រដ្ឋបាលខេត្តព្រះសីហនុ បានចេញលិខិតលេខ ៥៧៩ សជណ ជម្រាបជូនរដ្ឋបាលស្រុកព្រៃនប់ ផ្អាកនូវការចុះស្រង់ស្ថិតិតាមខ្នងផ្ទះប្រជាពលរដ្ឋ និងការសម្របសម្រួលផ្សេងៗរវាងគូភាគី ដើម្បីទុកភារកិច្ច ដល់ក្រុមការងារចម្រុះរបស់រដ្ឋបាលខេត្តធ្វើការ ស្រាវជ្រាវឱ្យបានច្បាស់លាស់។
លោកអភិបាលខេត្តព្រះសីហនុ បានថ្លែងថា ដើម្បីជៀសវាងនូវបាតុភាពផ្សេងៗ ដែលអាចកើតឡើងក្នុងសំណុំរឿងវិវាទនេះ រដ្ឋបាលខេត្តព្រះសីហនុ ស្នើឱ្យលោក លោកស្រីជាភាគីពាក់ព័ន្ធ និងប្រជាពលរដ្ឋទាំងអស់ត្រូវរក្សាស្ថានភាពដើម លើទីតាំងដីវិវាទជាបណ្តោះអាសន្ន និងជៀសវាងរាល់ការធ្វើសកម្មភាពផ្សេងៗ ដែលជាហេតុបង្កការរាំងស្ទះ យឺតយូរដល់ដំណើរការអង្កេត ស្រាវជ្រាវ និងស្នើភាគីពាក់ព័ន្ធទាំងអស់ រួមទាំងប្រជាពលរដ្ឋ រងចាំលទ្ធផលអង្កេតស្រាវជ្រាវរបស់ក្រុមការងារចម្រុះរដ្ឋបាលខេត្ត ដែលនឹងត្រូវធ្វើការបូកសរុបបញ្ចប់នាពេលខាងមុខនេះ ។
ករណីវិវាទដីធ្លីឈានដល់ការផ្ទុះអំពើហឹង្សា កាលពីរសៀលថ្ងៃទី២០ ខែធ្នូ ឆ្នាំ២០២០ នៅភូមិអូរឧកញ៉ាហេង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ សមត្ថកិច្ចបានឃាត់ខ្លួនមនុស្ស៨នាក់។ លោកអធិការស្រុកព្រៃនប់អះអាងថាមនុស្ស៨នាក់នោះជាភាគីខាងក្រុមហ៊ុនភឺន ផល្លា ចំណែកភាគីខាងពលរដ្ឋ មិនទាន់មានការឃាត់ខ្លួនទេ។
ស្នងការនគរបាលខេត្តព្រះសីហនុ លោក ជួន ណារិន ប្រាប់កាសែតក្នុងស្រុកថា កាលពីម្សិលមិញនេះមាន ពលរដ្ឋពីរក្រុមបានប៉ះទង្គិចគ្នា ក្នុងរឿងជម្លោះដីធ្លីមួយកន្លែង ស្ថិតក្នុងភូមិអូរឧកញ៉ាហេង ឃុំអូរឧកញ៉ាហេង ស្រុកព្រៃនប់រហូតដល់ផ្ទុះអាវុធ និងរងរបួសទាំងសងខាង។ ហេតុការណ៍នេះ សមត្ថកិច្ចបានឃាត់ខ្លួន បណ្តោះអាសន្ន នូវមនុស្ស ៨នាក់ យកទៅអធិការដ្ឋាននគរបាលស្រុកព្រៃនប់ ដើម្បីសាកសួរនិងចាត់វិធានការ ច្បាប់ចំពោះជនដៃដល់។ នៅថ្ងៃនេះ សមត្ថកិច្ចកំពុងតែបន្តនីតិវិធីចុះស្រាវជ្រាវស្វែងរកការពិតបន្ថែមទៀត។
យោងតាមរបាយការណ៍របស់ លោកវរសេនីយ៍ឯកហួ យ៉ៃអធិការនគរបាលស្រុកព្រៃនប់ បញ្ជាក់រឿងហេតុនេះថា៖ជម្លោះដីធ្លីឈានដល់ផ្ទុះជាអំពើហិង្សានេះ កើតឡើង រវាងក្រុមហ៊ុន ភឺន ផល្លា និងប្រជាពលរដ្ឋ បណ្តាលឲ្យភាគីទាំងសងខាងរងរបួស ក្នុងនោះភាគីក្រុមហ៊ុនរងបួសមធ្យមចំនួន០២នាក់ (ប្រុស) រីឯភាគី ខាងប្រជាពលរដ្ឋ រងបួសមធ្យមចំនួន៣នាក់ (ស្រី១នាក់) មូលហេតុ ដោយសារខាងក្រុមហ៊ុន បានចុះ ហាមឃាត់ ប្រជាពលរដ្ឋ មិនឲ្យសាងសង់ផ្ទះ ទើបបណ្តាលឲ្យកើតជាអំពើហិង្សាឡើង ។ របាយការណ៍បន្ថែមថា ពេលមានហេតុការណ៍នេះ កម្លាំងសមត្ថកិច្ចចម្រុះមាននគរបាល កងរាជអាវុធហត្ថ ដឹកនាំដោយលោក ព្រំ ប៊ុន្នី នាយករងរដ្ឋបាលសាលាស្រុក ក្នុងនាមគណបញ្ជាការឯកភាពរដ្ឋបាលស្រុកព្រៃនប់ បានចុះទៅអន្តរាគមន៍ រកដំណោះស្រាយ ប៉ុន្តែប្រជាពលរដ្ឋបានប្រមូលផ្តុំគា្នកាន់តែច្រើនឡើងហើយបិទផ្លូវមិនឲ្យខាងក្រុមហ៊ុនចេញមកក្រៅ ដោយចោទថា ខាងក្រុមហ៊ុន ប្រើអំពើហឹង្សានិងបាញ់គំរាមប្រជាពលរដ្ឋថែមទៀត ។ ក្នុងជម្លោះហឹង្សានេះ ក្រៅពីមានមនុស្សរងរបួស ក៍មានរថយន្តមួយគ្រឿងរបស់ភាគីក្រុមហ៊ុនរងការខូចខាតផងដែរ។ របាយការណ៍បញ្ជាក់ថា ក្រោយកើតហេតុ សមត្ថកិច្ចបានឃាត់ខ្លួនបណ្តោះអាសន្នមនុស្ស ចំនួន០៨នាក់ ដែលជាភាគីខាងក្រុមហ៊ុនរួមមាន ៖ ១.ឈ្មោះ គង់ រក្សា ភេទប្រុស អាយុ៣៦ឆ្នាំមានទីលំនៅភូមិ៤ សង្កាត់៤ ក្រុង.ខេត្តព្រះសីហនុ។ ២. ឈ្មោះ សាំង កូ ភេទប្រុស អាយុ១៩ឆ្នាំមានទីលំនៅភូមិអូតាសេក ឃុំអូរឧកញ៉ាហេងស្រុកព្រៃនប់ ខេត្តព្រះសីហនុ ។ ៣.ឈ្មោះសុខ ភារម្យ ភេទប្រុស អាយុ៣១ឆ្នាំមានទីលំនៅភូមិអូរតាសេក ឃុំអូរឧកញ៉ាហេងស្រុកព្រៃនប់ខេត្តព្រះសីហនុ។ ៤.ឈ្មោះសៀ រដ្ឋាភេទប្រុស អាយុ៣៦ឆ្នាំមានទីលំនៅភូមិអូតាសេក ឃុំអូរឧកញ៉ាហេងស្រុកព្រៃនប់ខេត្តព្រះសីហនុ។ ៥.ឈ្មោះឡៅ តឹកយូ អាយុ៥៧ឆ្នាំមានទីលំនៅភូមិអូរតាសេក ឃុំអូរឧកញ៉ាហេង ស្រុកព្រៃនប់ខេត្តព្រះសីហនុ។ ៦.ឈ្មោះចក់ សុគន្ធភេទប្រុស អាយុ៥៦ឆ្នាំមានទីលំនៅភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។ ៧.ឈ្មោះ សុង ចិន ភេទប្រុស អាយុ៣០ឆ្នាំមានទីលំនៅភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។ ៨.ឈ្មោះផាន សាពេជ្រ ភេទប្រុស អាយុ៣៧ឆ្នាំមានទីលំនៅភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។
ចុងក្រោយនៃរបាយការណ៍របស់អធិការដ្ឋាននគរបាលស្រុកព្រៃនប់បញ្ជាក់ថា ចំពោះករណីថាមានការផ្ទុះអាវុធក្នុងជម្លោះនេះ សមត្ថកិច្ចកំពុងស្រាវជ្រាវ និងដោះស្រាយបន្តតាមនីតិវិធី៕