ការប្រមូលផលស្រូវរដូវវស្សា របស់ប្រជាកសិករខេត្តសៀមរាប រួចរាល់មួយរយភាគរយហើយ តែផលស្រូវធ្លាក់ចុះបន្ដិច
សៀមរាប៖ បើតាមការអះអាងពីប្រធានមន្ទីរកសិកម្មខេត្តសៀមរាប លោកទា គឹមសុទ្ធ បានបញ្ជាក់ថា ៖ដោយសារឆ្នាំនេះ មានទឹកភ្លៀងធ្លាក់គ្រប់គ្រាន់ ពីដើមរដូវធ្វើឱ្យការបង្កបង្កើន ផលដំណាំស្រូវវស្សារបស់ ប្រជាពលរដ្ឋ ក្នុង ឆ្នាំ២០២០នេះ សម្រេចបាន ១០០ភាគរយលើផ្ទៃដីសរុប១៩០៧០៤ហិកតា ស្មើនឹង១០២,២២ ភាគរយនៃផែនការ១៨៦ ៥៦០ហិកតា។ ជាលទ្ធផលឆ្នាំនេះបើធៀបទៅនឹងឆ្នាំ២០១៩លទ្ធ ផលបញ្ចប់ដូចគ្នា តែអនុវត្តបានច្រើន ជាងចំនួន៤១៧៩ហិកតា។ ក៏ប៉ុន្ដែជាលទ្ធផលស្រូវឆ្នាំនេះមានការធ្លាប់ចុះបន្ដិច មូលហេតុទឹកជន់ជោគជាំពេក ។
លោកទា គឹមសុទ្ធ បានបន្តថា៖ ការច្រូតប្រមូលផលស្រូវ លើផ្ទៃដីសរុបចំនួន ជាង
១០ម៉ឺនហិកតានេះ ទទួលបានបរិមាណផលសរុប៥២៨៣៤៧តោន ដោយទទួលបានទិន្នផលជាមធ្យម ២៧៧១គីឡូក្រាម ក្នុង១ហិកតា ក្នុងនោះ រួមមាន៖ ស្រូវស្រាលចំនួន ៤១ ៦៣៤ហិកតាស្រូវចម្ការចំនួន ១ ៧០០ហិកតា ស្រូវកណ្តាលចំនួន១០៥ ៤៦០ ហិកតា ស្រូវធ្ងន់ចំនួន៣៥ ៥៦០ហិកតា និងស្រូវឡើង ទឹកចំនួន៦៣៥០ហិកតាដោយប្រភេទស្រូវទាំងអស់នេះ អាចលក់ចេញក្នុងតម្លៃចាប់ពី៧៥០រៀល ទៅ ១១៥០រៀល ក្នុងមួយគីឡូក្រាម ដែលតម្លៃស្រូវឆ្នាំនេះ វាប្រហាក់ប្រហែលនិងឆ្នាំមុនៗ មិនមានអ្វីគួរឱ្យព្រួយបារម្ភនោះឡើយ។
លោក ទា គឹមសុទ្ធ ក៏បានអំពាវនាវដល់ប្រជាកសិករទាំងអស់ ត្រូវអនុវត្តការងារកសិកម្មឱ្យបានល្អ ទៅតាមបច្ចេកទេសថ្មីដែលធន់និងបម្រែបម្រួលអាកាសធាតុ ដើម្បីទទួលបានទិន្នផលខ្ពស់ ជាពិសេសត្រូវឧស្សាហ៍ចុះមើលស្រែចម្ការ ដើម្បីបង្ការការពារពីការបំផ្លាញពីសត្វល្អិតផ្សេងៗ និងត្រូវប្រញាប់រាយការ ណ៍ទៅមន្ត្រីជំនាញកសិកម្ម នៅពេលមាន បញ្ហាមិនប្រក្រតីមួយចំនួនលើដំណាំរបស់ខ្លួន ដើម្បីចុះអន្តរាគមន៍បានទាន់ពេលវេលា៕
សំរិត
