អាជ្ញាធរខេត្តកោះកុង ដឹកនាំក្រុមការងារពាក់ព័ន្ធ ចុះអនុវត្តវិធានការរដ្ឋបាលរុះរើផ្ទះ (ខ្ទម) ចំនួន៥ នៅឃុំឬស្សីជ្រុំ ស្រុកថ្មបាំង

កោះកុង៖ ប្រភពពី រដ្ឋបាលខេត្តកោះកុងបានឲ្យដឹងថា នៅ ថ្ងៃសុក្រទី៨ ខែមករា ឆ្នាំ២០២១ លោក សុខ សុទ្ធី អភិបាលរង នៃគណៈអភិបាលខេត្តកោះកុង ដោយមានការណែនាំដ៏ខ្ពង់ខ្ពស់របស់លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានដឹកនាំក្រុមការងាររួមមាន ព្រះរាជអាជ្ញារង អយ្យការអមសាលាដំបូងខេត្តកោះកុង អភិបាលស្រុក និងក្រុមការងារស្រុកថ្មបាំង ក្រុមការងារមន្ទីរបរិស្ថាន មន្ទីរព័ត៌មាន ទីចាត់ការអន្តរវិស័យ មេឃុំឬស្សីជ្រុំ អនុប្រធានភូមិ កងកម្លាំងបញ្ជាការដ្ឋានខេត្ត ស្រុក កងកម្លាំងនគរបាលស្រុក ខេត្ត និងមានការចូលរួមសហការ ពីអង្គការសម្ព័ន្ធមិត្តសត្វព្រៃ ចុះអនុវត្តវិធានការ រដ្ឋបាលដោយរុះរើផ្ទះ (ខ្ទម) នៅឃុំឬស្សីជ្រុំ ស្រុកថ្មបាំង ខេត្តកោះកុង។

ការចុះអនុវត្តវិធានរដ្ឋបាលនេះ គឺបានរុះរើផ្ទះ (ខ្ទម) ចំនួន៥ និងសម្ភារៈត្រៀមសាងសាង់ចំនួន១ខ្នង។ មុននឹងមានការចុះ អនុវត្តវិធានការរដ្ឋបាលនេះ អាជ្ញាធរស្រុកបាន អញ្ជើញអ្នកដែលទន្ទ្រានកាន់កាប់ដីនោះ ជាមកធ្វើការណែនាំជាច្រើនដង និងចុះកិច្ចសន្យា ជាមួយពួកគាត់ ឱ្យពួកគាត់រុះរើផ្ទះ(ខ្ទម) ដោយខ្លួនឯង ប៉ុន្តែបន្ទាប់ពីចុះកិច្ចសន្យារួច ពួកគាត់មិនព្រមរុះរើចេញ។

រដ្ឋបាលខេត្តសូមជម្រាបជូនបងប្អូនប្រជាពលរដ្ឋ សាធារណៈជន ជ្រាបថា ទីតំាងដីដែលរដ្ឋបាលខេត្ត ចុះអនុវត្តវិធានរដ្ឋបាលនេះ មានទីតាំងស្ថិតនៅ ចំណុចស្ពានឆ្លងស្ទឹងកាយ៉ាង ភូមិគគីរជ្រុំ ឃុំឬស្សីជ្រុំ ស្រុកថ្មបាំង ខេត្តកោះកុង ដែលទីតាំងនេះ ស្ថិតនៅក្នុងតំបន់ ឧទ្យានជាតិជួរភ្នំក្រវាញខាងត្បូង ដែលជាតំបន់ការពារធម្មជាតិគ្រប់គ្រង ដោយក្រសួងបរិស្ថាន។

ជាមួយគ្នានេះដែរ លោក សុខ សុទ្ធី បានធ្វើការណែនាំឱ្យ៖
១. លោកអភិបាលស្រុក អាជ្ញាធរមូលដ្ឋាន មន្ទីរ អង្គភាព ពាក់ព័ន្ធទប់ស្កាត់ឱ្យបាន កុំមានការទន្ទ្រានកាប់កាន់ដីរដ្ឋតទៅទៀត
២. មន្ទីរបរិស្ថាន ត្រូវប្រមូល និងរក្សាទុកសម្ភារៈដែលរុះរើនោះឱ្យបានល្អ៕