ឃាត់ខ្លួនជនសង្ស័យចំនួន ២នាក់ ពាក់ព័ន្ធ ករណីលួចម៉ូតូ និងឆក់ទូរស័ព្ទ
ភ្នំពេញ៖កាលពីថ្ងៃទី០៨ ខែមករា ឆ្នាំ២០២១ នេះបន្ទាប់ពីទទួលព័ត៌មាន ថាមានករណីលួចម៉ូតូ និងឆក់ទូរស័ព្ទ លោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឫស្សីកែវ បានបញ្ជាកម្លាំងខណ្ឌ និងប៉ុស្តិ៍នគរបាលរដ្ឋបាលទាំង៧ ចេញប្រតិបត្តិការស្រាវជ្រាវ រហូតបង្ក្រាបបានទាំងពីរករណី ព្រមទាំងឃាត់ខ្លួនជនសង្ស័យបានចំនួន ០២នាក់ ត្រង់ចំណុចផ្លូវខាងសារិនលេខ៩៩ ក្រុមទី៥ ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
ក្នុងប្រតិបត្តិការនេះ សមត្ថកិច្ចប៉ុស្តិ៍នគរបាលរដ្ឋបាលឫស្សីកែវ បានដកហូត ម៉ូតូ ០១គ្រឿង ឧបករណ៍សម្រាប់ធ្វើសកម្មភាពមួយចំនួន របស់ជនសង្ស័យ ព្រមទាំងទូរស័ព្ទ ០១គ្រឿង និងម៉ូតូ ០១គ្រឿង ដែលជារបស់ជនរងគ្រោះ។ ក្រោយកើតហេតុ សមត្ថកិច្ចបានប្រគល់ទូរស័ព្ទ ទូរស័ព្ទ ឲ្យជនរងគ្រោះវិញតាមការស្នើសុំ។
បច្ចុប្បន្នជនសង្ស័យ រួមទាំងវត្ថុតាង កំពុងឃាត់ខ្លួននៅអធិការដ្ឋាននគរបាល ខណ្ឌឫស្សីកែវ ដើម្បីសាកសួរបន្ដ និងកសាងសំណុំរឿង បញ្ជូនទៅកាន់អយ្យការអមសាលាដំបូង រាជធានីភ្នំពេញ ចាត់ការតាមនីតិវិធីច្បាប់៕