មន្ដ្រីជាន់ខ្ពស់កសិកម្ម សន្យាប្រែក្លាយវិស័យកសិកម្ម ឲ្យ ទំនើប ដោយប្រើកម្លាំងតិច បានផលច្រើន ហើយគុណភាពខ្ពស់ បង្កើនសេដ្ឋកិច្ចជាតិ
ភ្នំពេញ៖ រដ្ឋមន្ត្រីក្រសួងកសិកម្ម បានជំរុញ ភាគីពាក់ព័ន្ធ ត្រូវបន្តប្រែក្លាយវិស័យកសិកម្មកម្ពុជា ទៅជាកសិកម្មទំនើប មានលក្ខណៈប្រកួតប្រជែង បរិយាប័ន្ន ធន់នឹងការប្រែប្រួលអាកាសធាតុ និរន្តរភាព ដើម្បីបង្កើនប្រាក់ចំណូល ធានាបានសន្តិសុខស្បៀង អាហារូបត្ថម្ភ និងនវានុវត្តន៍។
នេះបើយោងតាមផេកផ្លូវការ របស់លោកវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនៅថ្ងៃទី១១មករានេះថា ក្រសួង នៅតែបន្តសហការយ៉ាងជិតស្និទ្ធជាមួយភាគីពាក់ព័ន្ធក្នុងការរៀបចំផែនការជំរុញកំណើនកសិកម្ម រួម ចំណែកលើកស្ទួយសេដ្ឋកិច្ចជាតិ តាមរយ:ការដាក់ចេញនូវគោលនយោបាយ និងផែនការអភិវឌ្ឍវិស័យកសិកម្មឆ្នាំ២០១៩-២០២៣ ក្នុងគោលបំណង សំខាន់គឺធ្វើយ៉ាងណាប្រែក្លាយកសិកម្មកម្ពុជាទៅជាកសិកម្មទំនើប មានលក្ខណៈប្រកួតប្រជែង បរិយាប័ន្ន ធន់នឹងការ ប្រែប្រួលអាកាសធាតុ និរន្តរភាព បង្កើនប្រាក់ចំណូល ធានាបានសន្តិសុខស្បៀង អាហារូបត្ថម្ភ និងនវានុវត្តន៍ ឆ្លើយតបទៅនឹងគោលដៅអភិវឌ្ឍន៍ដោយចីរភាពតាមអភិក្រម ព្រមទាំងលើកកម្ពស់ការធ្វើយន្តូបនីយកម្មកសិកម្មពីភាវូបនីយកម្មកសិកម្ម និងកសិពាណិជ្ជកម្មដែល ធ្វើយ៉ាងណាសម្រេច ឱ្យបាននូវទស្សនវិស័យ របស់រាជរដ្ឋាភិបាល នាឆ្នាំ ២០៣០ និង២០៥០ ។
លោករដ្ឋមន្ត្រីបានបន្តថា៖ ផ្តើមចេញពីនយោបាយឈ្នះឈ្នះ នៅចុងឆ្នាំ១៩៩៨ ប្រទេសកម្ពុជាបានបោះជំហាន ដើរចេញពីប្រទេសអសន្តិសុខស្បៀង ទៅជាប្រទេសផលិតស្បៀងបានគ្រប់គ្រាន់សម្រាប់ផ្គត់ផ្គង់ឱ្យតម្រូវការ ក្នុងស្រុក និងឈានជាជំហានៗទៅជាប្រទេសផលិតស្បៀងលើសពីសេចក្តីត្រូវការ នៅឆ្នាំ២០០០ ហើយ១០ឆ្នាំក្រោយមក គឺនៅឆ្នាំ២០១០ កម្ពុជាបានក្លាយជាប្រទេសនាំស្បៀងចេញស្របតាមគោលនយោ បាយរបស់រាជរដ្ឋាភិបាល ដើម្បីរួមចំណែក អភិវឌ្ឍន៍សេដ្ឋកិច្ចជាតិ។
លោកបានបញ្ជាក់ថា៖ ក្រសួងកសិកម្ម រុក្ខាប្រមាញ់ និងនេសាទ រួមសហការជាមួយភាគីពាក់ព័ន្ធអនុវត្តគោលនយោបាយនេះបានយ៉ាងខ្ជាប់ខ្ជួនក្នុងស្មារតីទទួលខុសត្រូវខ្ពស់ ធ្វើយ៉ាងណាសម្រេចឱ្យបានតាមផែនការដែលបានដាក់ចេញ។
លោករដ្ឋមន្ត្រីបញ្ជាក់ថា ក្នុងចំណោមគោល
នយោបាយជាអាទិភាពរបស់ក្រសួងកសិកម្ម រុក្ខា
ប្រមាញ់ និងនេសាទ គឺការអភិវឌ្ឍយន្តូបនីកម្មកសិកម្ម។
ផ្តើមចេញពីការអនុវត្តគោលនយោបាយនេះ យើងសង្កេតឃើញថា បច្ចុប្បន្ន គ្រឿងយន្តកសិកម្មបានចូលខ្លួនមកបម្រើឱ្យវិស័យកសិកម្មជំនួសឱ្យកម្លាំងពលកម្មមនុស្ស និងសត្វពាហន:ស្ទើរតែទាំងស្រុង ជាពិសេស លើផ្នែកផលិតកម្មដំណាំស្រូវ និងដំណាំកសិឧស្សា ហកម្ម ។
យោងតាមរបាយការណ៍របស់អគ្គនាយកដ្ឋានកសិកម្ម បានបង្ហាញថា៖ ត្រឹមថ្ងៃទី០១១ ខែមករា ឆ្នាំ២០២១ កម្ពុជា មានត្រាក់ទ័រចំនួន៣២០៩៤គ្រឿង គោយន្តចំនួន ៤៩៨ ១១៩គ្រឿង និងម៉ាស៊ីនប្រមូលផលស្រូវមានចំនួន៦៧៩៦គ្រឿង ដែលបាននិងកំពុងបំពេញ ការងារយ៉ាងសកម្មក្នុងការរៀបចំដីស្រែ ដីចម្ការនិងប្រមូលផលស្រូវ ហើយនិងគ្រឿងយន្តបម្រើឱ្យការ ងារសាកវប្បកម្ម។ ជាក់ស្តែង ផ្ទៃដីភ្ជួររាស់ដោយគ្រឿងយន្តមានចំនួន ៣៣៩៦០៦០ហិកតា ស្មើនឹង ៩៩,១៤ភាគរយ នៃផ្ទៃដីដែលបានភ្ជួររាស់សរុប ក្នុងនោះផ្ទៃដីស្រែប្រមាណជា៨៥,៤០ភាគរយ ត្រូវបាន ប្រមូលផល ដោយប្រើម៉ាស៊ីនច្រូត៕ .សំរិត
