កាយសម្ព័ន្ធ បើកវគ្គគ្រូបច្ចេកទេស និង ចៅក្រមមុនពេលប្រកួត
ភ្នំពេញ៖សហព័ន្ធកីឡាកាយសម្ព័ន្ធកម្ពុជាបានបើកវគ្គបំប៉នគ្រូបង្វឹក ចៅក្រមរបស់ខ្លួនរយៈពេល២ថ្ងៃគឺថ្ងៃទី១៤ និង១៥មករាមុនពេលការប្រកួតជើងឯកជាតិឆ្នាំ២០២០និងប្រកួតដណ្ដើមពានរង្វាន់ឯកឧត្តមបណ្ឌិតថោង ខុនលើកទី៤ដែលចាប់ផ្ដើមពីថ្ងៃទី១៤ដល់១៩មករា២០២១ ។លោកទុយ ប៊ុនហឿនអនុប្រធាននាយកដ្ឋានអប់រំកាយ និង កីឡា បានអញ្ជើញចូលរួមក្នុងពិធីបើកវគ្គនេះ ។
លោកណយ ផាណាអគ្គលេខាធិការសហព័ន្ធកីឡាកាយសម្ព័ន្ធកម្ពុជាបានប្រាប់ឲ្យដឹងថាវគ្គនេះមានសិក្ខាកាមចូលរួមចំនួន៣០រូបដែលជាគ្រូបង្វឹកមកពីបណ្ដារាជធានី ខេត្តទាំង៤ដែលបានចូលរួម ។រាជធានីខេត្តដែលបានចូលរួមមានក្រសួងមហាផ្ទៃ ខេត្តតាកែវ ខេត្តក្រចេះ និងខេត្តកមពង់ឆ្នាំង ។កីឡាករ កីឡាការិនីដែលចូលរួមប្រកួតមានចំនួន៦៤នាក់គឺដូចគ្នានឹងឆ្នាំកន្លងទៅដែរ ។
លោកអគ្គលេខាធិការបានបញ្ជាក់ឲ្យដឹងថាតាមពិតអ្វីៗទាំងគ្រូបង្វឹក ទាំងមន្ត្រីបច្ចេកទេសសុទ្ធតែចេះដឹងអស់ហើយតែវគ្គនេះគឺចង់ឲ្យពួកគាត់ដឹងពីការប្រែប្រួលថ្មីៗលើបទបញ្ជា និងបញ្ហាផ្សេងៗទៀតរបស់សហព័ន្ធអន្តរជាតិ ។សូមបញ្ជាក់ថាគ្រូឧទ្ទេសមានលោកអគ្គលេខាធិការណយ ផាណា និង លោកសោ សុផេង ។
នេះជាការប្រកួតជ្រើសរើសកីឡាករ កីឡាការិនីប្រចាំឆ្នាំ២០២០និងជ្រើសរើសកីឡាករកីឡាការិនីឆ្នើមសម្រាប់ការប្រមូលផ្ដុំក្នុងក្រុមជម្រើសជាតិឆ្នាំ២០២១ជាមួយនឹងការត្រៀមលក្ខណៈសម្រាប់ចេញទៅហ្វឹកហាត់នៅប្រទេសចិនក្នុងឆ្នាំ២០២១នេះ ។ការប្រកួតនេះគឺប្រើប្រាស់ថវិកាសរបស់ក្រសួងអប់រំយុវជន និង កីឡា ។
ការប្រកួតនេះគឺមិនមានការកម្រិតអាយុឡើយតែកីឡាករកីឡាការិនីត្រូវតែមកពីបណ្ដាក្លិបឬសមាគមដែលជាសមាជិករបស់ព័ន្ធកីឡាកាយសម្ព័ន្ធកម្ពុជា។ការប្រកួតនឹងចាប់ផ្ដើមពីថ្ងៃទី១៤ដល់ថ្ងៃទី១៩មករាឆ្នាំ២០២១។សូមបញ្ជាក់ថាកាយសម្ព័ន្ធចែកចេញជា២ប្រភេទគឺកាយសម្ព័ន្ធអាអេរ៉ូប៊ិក(Aerobic) និង កាយសម្ព័ន្ធអាកទីស្ទីក (Artistic) ។
ចំពោះវិញ្ញាសាដែលដាក់ឲ្យប្រកួតនោះមាន៖សម្រាប់ប្រភេទកាយសម្ព័ន្ធអាកទីស្ទីក (Artistic)វិញ្ញាសាប្រកួតជាក្រុម៦នាក់បុរស ការប្រកួតសរុបឧបករណ៍ទាំ៦(ឧបករណ៍កម្រាល សេះលោត សេះកង របាស្រប កង និង របាហ្នឹង ) ។ឧបករណ៍ជំនាញបុរសសេះលោតជំនាញសេះកង ជំនាញកម្រាល ជំនាញកង ជំនាញរបាស្រប និង ជំនាញរបាហ្នឹង ។
ចំពោះកាយសម្ព័ន្ធអាអេរ៉ូប៊ិក(Aerobic) វិញមានវិញ្ញាសាឯកត្តជនបុរស វិញ្ញាសាឯកត្តជននារី វិញ្ញាសាគូចម្រុះ(បុរស នារី )អាអេរ៉ូប៊ិកទ្រីយ៉ូ(TRIO)បុរស នារី និងវិញ្ញាសាអាអេរ៉ូប៊ិកក្រុមចម្រុះ៥នាក់ ៕
