ការរត់ពាក់កណ្ដាលម៉ារ៉ាតុង អន្តរជាតិ ត្រូវបានប្ដូរឥរិយាបថ
ភ្នំពេញ៖ទិវាអន្តរជាតិរត់ពាក់កណ្តាលម៉ារ៉ាតុងនៅអង្គរវត្តនៅខេត្តសៀមរាបត្រូវបានប្ដូរឥរិតាបថបន្ទាប់ពីស្ថានភាពនៃកូវីដ ១៩នៅមិនទាន់ស្ងប់ស្ងាត់នោះ ។
បន្ទាប់ការអាក់ខានដោយសារកូវីដ១៩នោះគណៈកម្មាធិការជាតីអូឡាំពិកកម្ពុជាមានគម្រោងរៀបចំព្រឹត្តិការណ៍ទិវាអន្តរជាតិរត់ពាក់កណ្តាលម៉ារ៉ាតុងនៅអង្គរវត្តនៅខេត្តសៀមរាបនាថ្ងៃទី២៤មករា២០២១តែពេលនេះស្ថានភាពនៅមិនទាន់អំណោយផលនៅឡើយទេហើយអ្នកចុះឈ្មោះក៏បានចុះរួចដែរហេតុនេះគណៈកម្មាធិការជាតិអូឡាំពិកកម្ពុជានិងដៃគូឧបត្ថម្ភសម្រេចចិត្តប្ដូរឥរិយាបថនៃការរត់ទៅជារត់ដោយស្ម័គ្រចិត្តខ្លួនឯង(VIRTUAL)ដែលនឹងធ្វើនៅថ្ងៃទី៦ និង៧កុម្ភៈ ។
ក្នុងសន្និសីទកាសែតនាព្រឹកថ្ងៃទី១៥មករាឯកឧត្តមវ៉ាត់ ចំរៀនអគ្គលេខាធិការគណៈកម្មាធិការជាតិអូឡាំពិកកម្ពុជាមានប្រសាសន៍ថាយើងមិនអាចរៀបចំប្រឹត្តិការណ៍នេះឲ្យដូចរៀងរាល់ឆ្នាំបាននោះទេព្រោះសន្ទុះកើនឡើងនៃមេរោគកូវីដ១៩នៅប្រទេសជិតខាងស្ថិតក្នុងកម្រិតខ្ពស់ ។
ក្នុងបរិបទនៃកូវីដ១៩យើងត្រូវធ្វើអ្វីឲ្យស្របទៅតាមយុគសម័យនៃសង្គមដែលកំពុងតែរងនូវឥទ្ធិពលមួយនេះ។ហេតុនេះអ្នកដែលបានចុះឈ្មោះរួចរាល់ហើយត្រូវតែរត់ដោយខ្លួនហើយរត់នៅទីកន្លែងណាក៏បានដែរ ។ហើយចំពោះលទ្ធផលគឺសាមីខ្លួនត្រូវផ្ញើតាមរយៈManulife MOVE App)ដើម្បីទទួលមេដាយក្នុងករណីដែលការរត់នោះបានទទួលថិរវេលាល្អ ។
អ្នករត់ត្រូវតែមានភាពស្មោះត្រង់លើលទ្ធផលរបស់ខ្លួនទាំងអ្នករត់៣គីឡូម៉ែត្រ ៥គីឡូម៉ែត្រ ១០គីឡូម៉ែត្រ និង២១គីឡូម៉ែត្រ ។
ប្រសិនបើគេផ្ញើលទ្ធផលដែលមិនស្មោះត្រង់មកមានន័យថាគេមិនស្មោះត្រង់ចំពោះខ្លួនឯងឡើយ ។ហេតុនេះអ្នកចូលរួមរត់ត្រូវតែបំពេញកាតព្វកិច្ចរត់ឲ្យដល់គិលដៅរបស់ខ្លួន ។
ឯកឧត្តមអគ្គលេខាធិការទទួលស្គាល់ថាការធ្វើនូវរបៀបថ្មីនេះប្រៀបដូចជាអាវុធមុខពីរយ៉ាងអញ្ចឹងគឺវាអាចបរាជ័យ និង ជោគជ័យតែទោះជាយ៉ាងណាក៏ត្រូវតែធ្វើព្រោះនៅលើពិភពលោកនេះគេបានប្ដូរឥរិយាបថមករត់តាមរបៀបស្ម័គ្រចិត្តដោយខ្លួនឯង(VIRTUAL)នេះអស់ហើយ ។
សូមបញ្ជាក់ថាដំបូងឡើយគណៈកម្មាធិការជាតិអូឡាំពិកកម្ពុជានិងគណៈកម្មការរៀបចំការប្រកួតគ្រោងបើកការប្រកួតទិវារត់ប្រណាំងអន្តរជាតិពាក់កណ្តាលម៉ារ៉ាតុងអង្គរវត្តលើកទី២៥នៅខេត្តសៀមរាបនៅថ្ងៃទី២៤ខែមករាឆ្នាំ២០២១។សម្រាប់ទិវារត់នេះយើងមិនអនុញ្ញាតឲ្យបរទេសដែលរស់នៅក្រៅប្រទេសចូលរួមឡើយដោយអនុញ្ញាតឲ្យជនបរទេសរស់នៅក្នុងប្រទេសតែប៉ុណ្ណោះ៕