ព្រឹត្តិការណ៍ជិះកង់ផ្សព្វផ្សាយ សក្ដានុពលទេសចរណ៍ ខេត្តព្រះសីហនុនិងប្ដូរឥរិយាបថយុវវ័យសម្រាប់ថ្ងៃបុណ្យសេចក្ដីស្រឡាញ់
ភ្នំពេញ៖គណៈកម្មាធិការជាតិអូឡាំពិកកម្ពុជានឹងរៀបចំព្រឹត្តិការណ៍កីឡាជិះកង់នៅខេត្តព្រះសីហនុដើម្បីបំផុសចលនាទេសចរណ៍និងផ្សព្វផ្សាយពីសក្តានុពលរបស់ខេត្ត និងដើម្បីផ្លាស់ប្ដូរឥរិយាបថយុវវ័យចំពោះថ្ងៃបុណ្យនៃសេចក្ដីស្រឡាញ់ ។
ឯកឧត្តម វ៉ាត់ ចំរើន អគ្គលេខាធិការគណៈកម្មា ធិការជាតិអូឡាំពិកកម្ពុជា បានមានប្រសាសន៍ឱ្យដឹងថាក្រសួងទេសចរណ៍និងគណៈកម្មាធិការជាតិអូឡាំពិកកម្ពុជានឹងរៀបចំព្រឹត្តិការណ៍កីឡាជិះកង់ទេស ចរណ៍នៅខេត្តព្រះសីហនុនេះ នឹងរៀបចំរយៈពេ លមួយថ្ងៃ នៅថ្ងៃទី១៤ ខែកុម្ភៈឆ្នាំ ២០២១ដែមចំថ្ងៃបុណ្យនៃសេចក្ដីស្រឡាញ់។
ឯកឧត្តមអគ្គលេខាធិការ បានបញ្ជាក់ថាការរៀប ចំព្រឹត្តិការណ៍កីឡាជិះកង់នេះ គឺជាការបំផុសចលនាឱ្យប្រជាពលរដ្ឋលេងកីឡា ដើម្បីពង្រឹងសមត្ថភាពផ្លូវកាយ ផ្លូវចិត្ត ដែលការជិះកង់ធ្វើឱ្យសរសៃ សាច់ដុំ ផ្លូវដង្ហើម មានភាពរឹងមាំនិងសុខ ភាពល្អ ។
ព្រឹត្តិការណ៍ជិះកង់នេះមិនមែនជាការអភិវឌ្ឍន៍ជំនាញកម្រិតខ្ពស់ក៏ប៉ុន្តែវាជាការបំផុសចលនាកីឡាមួយដែលស្របគ្នាទៅនឹងយុទ្ធនាការប្រជាជនម្នាក់លេងកីឡាមួយមុខ ដែលគណៈកម្មាធិការជាតិរៀបចំប្រកួតកីឡាស៊ីហ្គេមឆ្នាំ២០២៣ នឹងដាក់ចេញនៅថ្ងៃទី១៨ ខែ មករាខាងមុខនេះហើយ ។ជាមួយនេះ នឹងធ្វើឱ្យតំបន់ឆ្នេរសមុទ្រក្លាយជាការទាក់ទាញថ្មីមួយ ទៀត ក្នុងការស្តារមុខមាត់ឡើងវិញ ក្រោយពីជំងឺកូវីដ១៩ មានការធូរស្រាល និងជាការស្តារធុរកិច្ចទេសចរណ៍ ។
ឯកឧត្តមវ៉ាត់ចំរើនបញ្ជាក់ថា«អ្វីដែលយើងទទួលអនុសាសន៍ណែនាំពីថ្នាក់ដឹកនាំលោករដ្ឋមន្ត្រីក្រសួងទេសចរណ៍និងជាប្រធានគណ:កម្មាធិការជាតិអូឡាំពិកកម្ពុជា លោកចង់ឱ្យមានព្រឹត្តិការណ៍ខ្លះ ដើម្បីឱ្យចលនាភ្ញៀវទេសចរក្នុងស្រុក មានចលនាទៅ ដល់ទេសចរណ៍មួយចំនួនដែលកំពុងមានការអភិវឌ្ឍ ជាពិសេសក្រុងព្រះសី ហនុ ដែលជាតំបន់កំពុងធ្វើការអភិវឌ្ឍផ្នែកហេដ្ឋា រចនាសម្ព័ន្ធ ផ្លូវ ថ្នល់ សណ្តាប់ធ្នាប់តាមឆ្នេរ សមុ ទ្ររបស់យើងឱ្យបានស្អាតល្អ ហើយរួចរាល់ពេលឆាប់ៗនេះ ។
ការត្រៀមបង្ហាញសក្តានុពលថ្មីនៃតំបន់ដែលមានបរិយាកាសថ្មី ល្អស្អាត មានហេដ្ឋារចនា សម្ព័ន្ធថ្មី ឱ្យវាលេចត្រដែតឡើងដែលជាគោលបំណងនៃការរៀបចំព្រឹត្តិការណ៍កីឡាទេសចណ៍មួយគឺការជិះកង់កម្សាន្តមួយដ៏ធំនៅទីនោះនៅតាមឆ្នេរអូឈើទាលនិងឆ្នេររាមដោយសោភ័ណភាពវាល្អមែនទែន »។
ព្រឹត្តិការណ៍ជិះកង់នេះមានចំនួន៣វិញ្ញាសាគឺប្រភេទកង់ភ្នំដែលមានចម្ងាយ៤០គីឡូម៉ែត្រដោយចេញដំណើរពីឆ្នេរអូឈើទាលទៅរាមដែលមានចម្ងាយ២០គីឡូម៉ែត្រនិងជិះត្រឡប់មកវិញដើម្បីបង្គ្រប់ ។ជិះកំសាន្ដចម្ងាយ២៥គីឡូម៉ែត្រពីឆ្នេរអូឈើទាលឆ្ពោះទៅអូត្រេះនិងជីងជាដៃគូ និង ជាលក្ខណៈគ្រួសារដែលមានចម្ងាយ១៥គីឡូម៉ែត្រ ។
បើតាមការឲ្យដឹងបន្ថែមពីឯកឧត្តមវ៉ាត់ ចំរើននោះថាខេត្តព្រះសីហនុសព្វថ្ងៃនេះមានផ្លូវតាមឆ្នេរសមុទ្រពីឆ្នេរអូឈើទាលរហូតដល់រាមតែម្ដង ៕