ក្រុមស្រាវជ្រាវអង្គការ WWF បានរកឃើញមានវត្តមានសត្វក្រពើភ្នំក្នុងទន្លេស្រែពក
ភ្នំពេញ៖ វត្ថុសំណាកដូចជាដានជើង និងលាមកសត្វក្រពើភ្នំជាង២០សំណាក ត្រូវបានប្រទះឃើញក្នុងតំបន់ទន្លេស្រែពក ស្ថិតក្នុងតំបន់ស្នូលនៃដែនជម្រកសត្វព្រៃស្រែពក ក្នុងខេត្តមណ្ឌលគិរី។ នេះបើតាមការឱ្យដឹងពីកញ្ញា Milou Groenenberg ប្រធានផ្នែកតាមដាន និងស្រាវជ្រាវជីវៈចម្រុះនៃអង្គការមូលនិធិសកលសម្រាប់ធម្មជាតិ ហៅកាត់ WWF ប្រចាំនៅកម្ពុជា ។
អ្នកស្រាវជ្រាវរូបនេះ បានបញ្ជាក់ឲ្យដឹងនៅថ្ងៃនេះថា តាមរយៈវត្ថុសំណាកនេះ នឹងឈានដល់ការរៀបចំផែនការឱ្យបានស៊ីជម្រៅ ខណៈ វត្តមានពួកវាត្រូវបានកត់ត្រាថាមានចំនួនច្រើនជាងគេនៅលើពិភពលោក។
កញ្ញា Milou បានបន្តថា សត្វក្រពើភ្នំនៅកម្ពុជា ត្រូវបានប៉ាន់ប្រមាណនៅសេសសល់ចន្លោះពី២០០ ទៅ៣០០ក្បាល ដែលវត្តមានរបស់ពួកវា ប្រទះឃើញមាននៅតំបន់ ជួរភ្នំក្រវាញ តំបន់អារ៉ែង និងនៅទន្លេស្រែពក ខេត្តមណ្ឌលគិរី។
កញ្ញា Milou បានបន្តថា សត្វក្រពើភ្នំ ជាប្រភេទសត្វដែល អៀនច្រើន ហេតុនេះគេកម្រឃើញវាដោយផ្ទាល់ភ្នែកណាស់។
តាមការឱ្យដឹងបន្ថែមពីមន្ត្រីឧទ្យានុរក្ស បានបញ្ជាក់ថា នៅរដូវប្រាំង ធ្លាប់ប្រទះឃើញសត្វក្រពើភ្នំ ព្រមទាំងក្រពើត្រីម្តងម្កាលដែរ ហែលចេញពីល្អាងថ្មីក្រោមបាតទន្លេស្រែពក ដើម្បីរកចំណី។ ការប្រទះ ឃើញនេះ ដោយសារនៅចន្លោះខែមីនា និងមេសា ទឹកស្រកខ្លាំង និងមានសភាពថ្លា។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ចាត់ទុកការរកឃើញនូវសំណាកនេះថា ជាការជំរុញ ការសិក្សាស្រាវជ្រាវឱ្យបានច្បាស់លាស់បន្ថែមទៀត ដើម្បីឈានដល់ការការពារ និងអភិរក្សដល់សត្វដែលកំពុងរងការ គំរាម កំហែងជិតផុតពូជបំផុតលើពិភពលោកនេះ។
បើតាមការបញ្ជាក់របស់មន្ត្រីស្រាវជ្រាវអង្គការ WWF បានឱ្យដឹងថា កាលពីឆ្នាំ២០១៩ គេបានធ្វើការសិក្សា
ស្រាវជ្រាវទៅលើ សត្វក្រពើភ្នំនេះម្តងរួចមកហើយ ប៉ុន្តែក្នុងឆ្នាំ២០២១នេះ គេនឹងធ្វើការសិក្សាស្រាវជ្រាវឱ្យបានទូលំទូលាយបន្ថែមទៀត ដើម្បី ប្រយោជន៍ដល់ការអភិរក្ស ក៏ដូចជាស្តារនូវពូជសត្វប្រភេទនេះឱ្យកាន់តែមានច្រើននៅកម្ពុជា ខណៈសត្វប្រភេទនេះបាននិង កំពុងរងការគំរាមកំហែងដោយការនេសាទខុសច្បាប់ ដើម្បីយកស្បែក និងសាច់ទៅធ្វើអាជីវកម្មអាហារ ព្រមទាំងការបាត់បង់ ទីជម្រក។
ក្រពើភ្នំ ត្រូវបានចាត់ថ្នាក់ជាសត្វទទួលរងគ្រោះជិតផុតពូជក្នុងឆ្នាំ១៩៩៤ ហើយបន្ទាប់មកត្រូវបានគេចាត់ថ្នាក់ជាប្រភេទសត្វ ទទួលរងគ្រោះជិតផុតពូជខ្លាំងបំផុតក្នុងឆ្នាំ១៩៩៦ ក្នុងបញ្ជីក្រហមរបស់អង្គការ សហភាពអន្ដរជាតិដើម្បីការអភិរក្សធម្មជាតិ ហៅកាត់ IUCN ខណៈរបាយនៃការរស់នៅ និងចំនួនតិចតួចបំផុតរបស់ពួកវា ត្រូវបានប្រទះឃើញនៅក្នុងប្រទេសកម្ពុជា ឥណ្ឌូណេស៊ី ឡាវ ថៃ និងវៀតណាម៕ សំរិត
