មន្ដ្រីជាន់ខ្ពស់ នៅស្រុកបន្ទាយស្រីបង្ហាញ ពីមោទនភាពចំពោះការបង្កើនផលដំណាំ របស់ពលរដ្ឋ ស្ថិក្នុងមូលដ្ឋានខ្លួន
សៀមរាប៖ លោក ឃឹម ហ្វីណង់ អភិបាលស្រុកបន្ទាយស្រី ខេត្ដសៀមរាប បានបង្ហាញ ពីមោទនភាពចំពោះការបង្កើនផលដំណាំ របស់ប្រជាពលរដ្ឋក្នុងមូលដ្ឋាន របស់ខ្លួន កាលពីថ្ងៃទី២០ មករាឆ្នាំ២០២១នេះថា ៖ ទីតាំងចំការតាង៉ែ បន្ទាយស្រីផ្អែមមុតឈ្ងុយឆ្ងាញ់ ស្រស់ថ្មីពីធម្មជាតិ សំខាន់អាចទៅលេងដល់ចម្ការ ហើយដើរកាច់ពីដើម ដោយខ្លួនឯងបានទៀត ។
តោះអ្នកសៀមរាបមកសាកភ្លក់រសជាតិ និងគាំទ្រផ្លែតាង៉ែនក្នុងខេត្តយើងម្តង ប្រហែលជានៅមិនទាន់មានអ្នកដឹងច្រើនទេ ថានៅជើងភ្នំគូលែនមានចម្ការតាង៉ែន ដ៏គួរឱ្យចង់មកលេងមួយនេះ។ ដើម្បីចូលរួមជម្រុញឱ្យមានការរីកចម្រើន និងបង្កើនភាពទាក់ទាញខាងផ្នែកកសិទេសចរណ៍នៅក្នុងស្រុកបន្ទាយស្រី ម្ចាស់ចម្ការបានយល់ព្រមសហការជាមួយរដ្ឋបាលស្រុក ដោយលក់ជូនក្នុងតម្លៃពិសេស(ត្រឹមតែ៥០០០រៀលក្នុងមួយគីឡូ) សម្រាប់អ្នកទេសចរដែលអញ្ជើញមកទិញដល់ចម្ការផ្ទាល់ ហើយអនុញ្ញាតឱ្យដើរកាច់យកខ្លួនឯង និងអាចបេះហូបពីដើមម៉ាសេរីដោយមិនគិតថ្លៃបន្ថែមទៀតផង ។
លោកអភិបាលស្រុកបានលើកឡើងថា៖ ខ្ញុំពិតជាចង់ឃើញបងប្អូនប្រជាកសិករនៅក្នុងស្រុកបន្ទាយស្រី និងអ្នកវិនិយោគ នាំគ្នាដាំដំណាំហូបផ្លែឱ្យបានច្រើន ជាពិសេសប្រភេទដែលលក់បានថ្លៃ មានភាពទាក់ទាញ និងមានទីផ្សារទូលំទូលាយសម្រាប់វិស័យទេសចរណ៍ ហើយរៀបចំចម្ការនិងកសិដ្ឋានរបស់ខ្លួនឱ្យទៅជារមណីយដ្ឋានសម្រាប់មកលេងកម្សាន្តផង។ បើធ្វើបែបនេះបាន ខ្ញុំជឿថាយើងនឹងអាចជម្រុញឱ្យអ្នកទេសចរមកលេងស្រុករបស់យើងកាន់តែច្រើន ព្រមទាំងអាចនាំចេញនៅនឹងកន្លែងនូវកសិផលទាំង នេះទៅផ្គត់ផ្គង់ដល់ក្នុងក្រុងសៀមរាបទៀតផង។ រដ្ឋបាលស្រុកត្រៀមខ្លួនរួចជាស្រេចក្នុងការជម្រុញទីផ្សារ និងផ្តល់ការគាំទ្រគ្រប់រូបភាព ធ្វើយ៉ាងណាដើម្បីឱ្យបន្ទាយស្រី សម្រេចបាននូវចក្ខុវិស័យជាដែនដីកសិទេសចរណ៍ដ៏គួរឱ្យទាក់ទាញមួយនៅក្នុងពេលអនាគត។
លោកបន្តថា៖ តាង៉ែនបន្ទាយស្រី បើបងប្អូន ទៅ លេងបន្ទាយស្រី បងប្អូននិងឃើញ ពាក្យស្លោកមានន័យសម្រាប់ការលើកទឹកចិត្តដល់ប្រជាពលរដ្ឋដែលបានដាំដុះនោះ ។ ដើមតាង៉ែនទាំងនេះមិនមានបាញ់ថ្នាំគីមីឡើយ មានសុវត្ថិភាព ១០០%សម្រាប់ការ បេះហូបភ្លាមៗ ពីដើមផ្ទាល់ តែមានលក្ខខណ្ឌតម្រូវឱ្យបងប្អូនចូលទៅលេង ត្រូវតែទិញចាប់ពី១០គីឡូឡើងទៅ ទើបអាចចូលលេងបាន មូលហេតុ ធ្វើដូច្នេះព្រោះខ្លាចបងប្អូនដើរ លេងហួបឆ្អែតហើយ ទិញតែកន្លះគីឡូ ឬអត់ទិញតែម្ដង ក៏ថាបាន ។ ចំការតាង៉ែន នេះមានទីតាំងនៅ ជើងភ្នំគូលែន ចូលតាមច្រកផ្លូវវត្តស្គន់ ក្នុងភូមិស្គន់ ឃុំត្បែង ស្រុកបន្ទាយស្រី ខេត្តសៀមរាប៕ . សំរិត