ចំណាយថវិកាអស់ ១៤មុឺនដុល្លារសាងសង់កាំជណ្តើរឡើងភ្នំត្បែងមានជ័យ ខេត្តព្រះវិហារ ក្រោយបាក់ស្រុតដោយជំនន់ទឹកភ្លៀង
ព្រះវិហា៖ កាំជណ្តើរឡើងភ្នំត្បែងមានជ័យ នៅក្នុងខេត្តព្រះវិហារ ប្រមាណ២០០កាំ ដែលបានរងការបាក់ស្រុតខូចខាតដោយជំនន់ទឹកភ្លៀង នារដូវវស្សាកន្លងមក ពេលនេះត្រូវបានដំណើរសាងសង់ជួសជុលឡើងវិញហើយ ដោយបានរៀបចំពិធីសែនក្រុងពាលីសុំអ្នកតាម្ចាស់ទឹក ម្ចាស់ដី ព្រៃភ្នំ ដើម្បីសាងសង់ជាផ្លូវការ នៅព្រឹកថ្ងៃទី២៣ ខែមករាឆ្នាំ២០២១នេះ ដោយគ្រោងនឹងចំណាយថវិកា ប្រមាណ ១៤ម៉ឺនដុល្លារអាមេរិក។
ពិធីក្រុងពលីនេះ ប្រព្រឹត្តធ្វើឡើងក្រោមវត្តមានលោកទេសរដ្ឋមន្ត្រី មាស សុភា ប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តព្រះវិហារ និងលោក ឡុង សុវណ្ណ ប្រធានក្រុមប្រឹក្សាខេត្ត លោក ប្រាក់ សុវណ្ណ អភិបាលខេត្តព្រះវិហារ ព្រមទាំងថ្នាក់ដឹកនាំ មន្ត្រីរាជការជាច្រើនរូបទៀត។
លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ ដែលជាអ្នកទទួលការសាងសង់កាំជណ្តើរឡើងភ្នំត្បែងមានជ័យនេះ បានឱ្យដឹងថា៖ កាំជណ្តើរឡើងភ្នំត្បែងមានជ័យ ដែលបាក់ស្រុតរងការខូចខាតដោយជំនន់ទឹកភ្លៀងកាលពីរដូវវស្សាកន្លងមក ពេលនេះបានចាប់ផ្តើមសាងសង់ឡើងវិញ ដោយធ្វើអំពីដែកដូចដែលក្រុមជាងបានធ្វើជាគំរូស្រាប់ ដោយចំណាយថវិកាចំនួន ១៤មុឺនដុល្លារ ហើយគ្រឿងមួយចំនួនទៀតគឺមានការកុម្មង់ទិញពីប្រទេសចិន ។ លោកថាបើយើងកែច្នៃពីដែកសុទ្ធ គឺត្រូវចំណាយអស់ថវិកាច្រើន ហើយមានការលំបាកទៀត។
លោក សំ លាងទ្រី បានរំឮកឱ្យដឹងទៀតថា ភ្លាមៗនៃការបាក់ស្រុតកាំជណ្តើរឡើងភ្នំត្បែងមានជ័យនេះ បានធ្វើឱ្យប្រជាពលរដ្ឋ ក៏ដូចជាភ្ញៀវទេសចរជិតឆ្ងាយ មានការពិបាកក្នុងការឡើងភ្នំខ្លាំងណាស់។ ដូច្នេះ ដើម្បីសម្រួលដល់ការធ្វើដំណើរឡើងភ្នំរបស់ប្រជាពលរដ្ឋនិងភ្ញៀវទេសចរឱ្យមានភាពងាយស្រួល និងជៀសផុតពីគ្រោះថ្នាក់ផ្សេងៗនោះលោក ប្រាក់ សុវណ្ណ អភិបាលខេត្តព្រះវិហារ បានដឹកនាំក្រុមការងារចុះទៅពិនិត្យផ្ទាល់ដល់ទីតាំង និងបានណែនាំឱ្យរៀបចំផ្លូវវាងជាបណ្តោះអាសន្ន ដើមសម្រួលដល់ការធ្វើដំណើរ។
ប្រធានមន្ទីរសាធារណការខេត្តព្រះវិហាររូបនេះ បានគូសបញ្ជាក់ថា ថវិកាសម្រាប់សាងសង់កាំជណ្តើរឡើងភ្នំត្បែងមានជ័យនេះ គឺបានមកពីការដង្ហែរអង្កឋិនទានសាមគ្គី ក្រោមគំនិតផ្តួចផ្តើមរបស់លោកទេសរដ្ឋមន្ត្រី មាស សុភានិងលោក ប្រាក់ សុវណ្ណ អភិបាលខេត្ត ហើយថវិកានេះ នៅមិនទាន់គ្រប់គ្រាន់សម្រាប់ការកសាងកាំជណ្តើរនោះទេប៉ុន្តែទោះជាយ៉ាងណាលោកអភិបាលខេត្តព្រះវិហារប្តេជ្ញា និងគៀងគររកថវិកាបន្ថែមទៀត ដើម្បីសាងសង់កាំជណ្តើរនេះឱ្យរួចរាល់ជាស្ថាពរ។
គួរបញ្ជាក់ថាភ្នំត្បែងមានជ័យ ស្ថិតក្នុងភូមិក្រាំងដូង ឃុំព្រះឃ្លាំង ស្រុកត្បែងមានជ័យ ខេត្តព្រះវិហារ។ ភ្នំត្បែងមានជ័យ គឺជាតំបន់ទេសចរណ៍ធម្មជាតិមួយនៅលើកំពូលភ្នំ ដែលមានភាពទាក់ទាញ ដោយសារនៅលើកំពូលភ្នំត្បែងមានវត្តថ្ម៣ដុំ វត្តដំបូកខ្មៅក្របៅជ្រុំ មានទឹកជ្រោះ ក៏ដូចជាតំបន់ជាច្រើនទៀត ដែលមានទំនាក់ទំនង និងបារមីលោកតា «សួង» អ្នកសច្ចាំងភ្នំត្បែង ដ៏ពូកែស័ក្កសិទ្ធរបស់ខ្មែរយើងពីបុរាណកាលមក៕