កម្ពុជានៅតែដាក់គោលដៅ បង្កើនចំណាត់ថ្នាក់ស៊ីហ្គេម ឲ្យបានល្អជាងការប្រកួត៣លើកចុងក្រោយ
ភ្នំពេញ៖ប្រទេសកម្ពុជាបានប្ដេជ្ញាចិត្តហើយថាស៊ីហ្គេមលើកទី៣១ នៅទីក្រុងហាណូយប្រទេសវៀតណាមនាឆ្នាំ២០២១នេះចំណាត់ស៊ីហ្គេមរបស់កម្ពុជាត្រូវតែល្អប្រសើរជាងការប្រកួត៣លើកចុងក្រោយនេះ ។
ការប្រកួតស៊ីហ្គេមចំនួន៣លើកកន្លងមកគឺស៊ីហ្គេមលើកទី២៨នៅប្រទេសសឹង្ហបូរីឆ្នាំ២០១៥ ស៊ីហ្គេមលើកទី២៩នៅប្រទេសម៉ាឡេស៊ីឆ្នាំ២០១៧ និង ស៊ីហ្គេមលើកទី៣០ឆ្នាំ២០១៩នៅប្រទេសហ្វីលីពីន ក្នុងចំណោមប្រទេសចំនួន១១ក្នុងតំបន់អាស៊ីអាគ្នេយ៍ដែលចូលរួមប្រទេសកម្ពុជាឈរនៅចំណាត់ថ្នាក់ទី៨ទាំង៣លើកជាប់ៗគ្នា ។
សម្រាប់ឆ្នាំ២០២១នេះគឺជាឆ្នាំយុទ្ធសាស្ត្រដែលកម្ពុជាត្រូវតែធ្វើឲ្យចំណាត់ថ្នាក់របស់ខ្លួន បានប្រសើរជាងការប្រកួត៣លើកកន្លងមក ពេលនេះសហព័ន្ធជាតិនានាត្រូវមានការប្ដេជ្ញាចិត្តខ្ពស់ក្នុងការប្រជែងយកមេដាយ ។
ឯកឧត្តមបណ្ឌិតថោង ខុនប្រធានគណៈកម្មាធិការជាតិអូឡាំពិកកម្ពុជា និង ជាអនុប្រធានអចិន្ត្រៃយ៍រឿបចំស៊ីហ្គេមលើកទី៣២ឆ្នាំ២០២៣មានប្រសាសន៍ថាស៊ីហ្គេមលើកទី៣១ឆ្នាំ២០២១នេះ គឺជាការត្រួតពិនិត្យមើលពីសសក្ដានុពលនៃក្រុមកីឡាករ កីឡាការិនី ពិសេសការពិនិត្យមើលពីលើគ្រប់ផ្នែកទាំងអស់ ។
ជាមួយគ្នានេះឯកឧត្តមបានអះអាងថាស៊ីហ្គេមនៅកម្ពុជាគឺជាស៊ីហ្គេមដែលស្អាតគឺប្រទេសណាមានសមត្ថភាពត្រូវតែដណ្ដើមបានមេដាយច្រើន ។ស៊ីហ្គេមនៅកម្ពុជានឹងលុបបំបាត់ចោលនូវវប្បធម៌ ដែលប្រទេសជាម្ចាស់ផ្ទះត្រូវតែមានឧត្តមភាពខ្ពស់ក្នុងការប្រមូលយកមេដាយ ឬ វប្បធម៌ចែកមេដាយគ្នាឲ្យទាត់តែបាន ។
ការដាក់ចេញនូវគោលដៅយុទ្ធសាស្ត្រចំនួន៣ដែលសំខាន់នោះ ជាកត្តាកំណត់ប្រជែងយកមេដាយ។ គោលដៅយុទ្ធសាស្ត្រទាំង៣នោះ គឺទី១៖សហព័ន្ធកីឡាជាតិមួយត្រូវបង្កើតគោលការណ៍យន្តការច្បាស់លាស់មួយ ផ្តល់ការគាំទ្រដល់ក្រុមនេះឲ្យមានភាពកក់ក្តៅក្នុងការអភិវឌ្ឍជំនាញរបស់ខ្លួន។ ទី២៖អភិវឌ្ឍបច្ចេកទេសដល់ក្រុមពិសេសនេះឲ្យមានគុណផលកីឡាកាន់តែខ្ពស់។ ទី៣៖ត្រូវស្វែងរកនូវមូលនិធិដើម្បីទ្រទ្រង់ឧបត្ថម្ភគាំទ្រទៅដល់ក្រុមពិសេសនេះ ដើម្បីសម្រួចគោលដៅបាញ់ឆ្ពោះទៅស៊ីហ្គេម ២០២៣ ។
កម្ពុជាមានប្រភេទកីឡាដែលមានសក្ដានុពល ជាច្រើនដូចជាប៉េតង់ ចំបាប់ វូស៊ូ វ៉ូវីណាម តេក្វាន់ដូ សូហ្វតិន្នីស វាយកូនបាល់វាយសីនិងប្រភេទកីឡាជាទៀត។ មិនតែប៉ុណ្ណោះប្រភេទកីឡាមួយចំនួនដែលកន្លងមក ពុំធ្លាប់ប្រជែងបានមេដាយនោះក៏កំពុងតែធ្វើឲ្យបណ្ដាប្រទេស ក្នុងតំបន់ចាប់អារម្មណ៍ខ្លាំងណាស់ដែរ ។
ឯកឧត្តមវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជាអគ្គលេខាធិការគណៈកម្មាធិការជាតិរៀបចំស៊ីហ្គេមឆ្នាំ២០២៣(CAMSOC)បានប្រាប់ឲ្យដឹងថាពេលនេះមានប្រទេសចំនួន១២ដែលបានប្រកាស់ទទួលយកអត្តពលិកកម្ពុជាហ្វឹកហាត់ត្រៀមស៊ីហ្គេមឆ្នាំ២០២៣ដែលកម្ពុជាធ្វើជាម្ចាស់ផ្ទះ ។
បណ្ដាប្រទេសទាំងនោះមានទាំងនៅទ្វីបអឺរុប និង ពិសេសទ្វីបអាស៊ីដូចជាប្រទេសចិន ជប៉ុន កូរេជាដើម ។ជាមួយគ្នានេះកម្ពុជាត្រៀមនឹងបញ្ជូនកីឡាករ កីឡាការិនីទៅហ្វឹកហាត់រយៈពេលវែងនៅតាមបណ្ដាប្រទេសទាំងនោះ ។
សម្ដេចពិជ័យសេនាទៀ បាញ់ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិរៀបចំស៊ីហ្គេមឆ្នាំ២០២៣កំពុងតែជម្រុញក្នុងការបញ្ជូនកីឡាករកីឡាការិនី ទៅហ្វឹកហាត់រយៈពេលវែង នៅក្រៅប្រទេសដើម្បីបង្កើនសមត្ថភាពកីឡាករ កីឡាការិនីឲ្យកាន់តែឈានទៅរកកម្រិតខ្ពស់បន្ថែមទៀត ៕
