រថយន្តព្រូស បើកបំពានស្តុបក្រហម បុករថយន្តLexusRX300 ខ្ទេចទាំងសងខាង
ភ្នំពេញ ៖ បុរសម្នាក់ បានបើករថយន្តក្នុងល្បឿនលឿន ទាំងបំពានស្តុបបុករថយន្ត LexusRX300 កំពុងតែឆ្លងផ្លូវចំពាក់កណ្តាលពេញទំហឹង បណ្តាលឲ្យខ្ទាតទៅបុកបង្គោលស្លាកសញ្ញាបាក់អស់២ដើមបន្តែមទៀត។ ចំណែកឯរថយន្តវិញ រងការខូចខាតខ្ទេចទាំងសងខាង។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ៤ និង៣០នាទីទៀបភ្លឺ ឈានចូលថ្ងៃចន្ទទី៨ ខែកុម្ភៈ ឆ្នាំ២០២១ ស្ថិតនៅតាមបណ្តោយផ្លូវហាណូយ ត្រង់ចំណុចស្តុប២៤ម៉ោង ក្នុសង្កាត់គោកឃ្លាង ខណ្ឌសែនសុខ រាជធានីភ្នំពេញ។
បើយោងតាមប្រភពព័ត៌មានពីសមត្ថកិច្ច នៅប្រចាំការជាប់នឹងកន្លែងកើតហេតុ បានឲ្យដឹងថា មុនពេលកើតហេតុ គាត់បានឃើញរថយន្តម៉ាក LexusRX300 ពណ៌សមួយគ្រឿងពាក់ផ្លាកលេខ2-AT 2849 បើកបរដោយបុរសម្នាក់ និងអ្នករួមដំណើរ២នាក់ទៀត ធ្វើដំណើរតាមបណ្តោយផ្លូវម៉ុងឬទ្ធី ក្នុងទិសដៅពីកើតមកលិចក្នុងល្បឿនមធ្យម ខណៈមកដល់ចំណុចកើតហេតុខាងលើ ស្រាប់តែមានរថយន្តមួយគ្រឿងទៀត ម៉ាកព្រូសពណ៌ឈាមជ្រូកពាក់ផ្លាកលេខ ភ្នំពេញ2-AS 8446 បើកបរដោយបុរសម្នាក់រួមអ្នកដំណើរជាស្ត្រីម្នាក់ ធ្វើដំណើរតាមបណ្តោយផ្លូវភ្នំពេញហាណូយ ក្នុងទិសដៅពីត្បូងមកជើងក្នុងល្បឿនលឿនទាំងបំពានស្តុបក្រហម មិនគោរពច្បាប់ចរាចរណ៍មកបុកចំពាក់កណ្តាលពេញទំហឹង បណ្តាលឲ្យរថយន្តLexusRX300 ខ្ទាតទៅបុកនឹងបង្គោលស្លាកសញ្ញាបាក់អស់២ដើមបន្តែមទៀត។ សំណាងល្អក្នុងហេតុការណ៍គ្រោះថ្នាក់ចរាចរណ៍នេះ មិនបង្កឲ្យមានបួសស្នាមទៅដល់ភាគីម្ចាស់រថយន្តទាំងសងខាងនោះទេ និងមិនបង្កឲ្យមានប៉ះពាល់ទៅដល់បងប្អូនប្រជាពលរដ្ឋ ដែលគាត់កំពុងតែរួមដំណើរ នៅតាមដងផ្លូវនោះដែរ រងការខូចខាតតែរថយន្ត។
ក្រោយពេលកើតហេតុសមត្ថកិច្ចមូលដ្ឋាន សហការជាមួយនឹងខាងជំនាញចរាចរណ៍ខណ្ឌសែនសុខ ចុះមកដល់រួចក៏បានប្រគល់តួនាទីនេះទៅឲ្យខាងចរាចរណ៍ជំនាញក្រុង វាស់វែងយករថយន្តស្ទូចមកស្ទូចយករថយន្តទាំង២គ្រឿង យកទៅរក្សាទុកនៅខាងការិយាល័យចរាចរណ៍ផ្លូវគោក ៕