ការប្រកួតកីឡាវាលកូនបាល់ ជើងឯកថ្នាក់ជាតិ២០២០ ចាប់ផ្ដើមពីម្សិលម៉ិញ
ភ្នំពេញ៖ការប្រកួតកីឡាវាលកូនបាល់កម្ពុជាជ្រើសរើសជើងឯកថ្នាក់ជាតិប្រចាំឆ្នាំ២០២០ បានចាប់ផ្ដើមហើយកាលពីថ្ងៃទី៧ហើយ ដែលការប្រកួតនេះនឹងបញ្ចប់នៅថ្ងៃទី១០កុម្ភៈ ។
លោក ជា ពៅ អគ្គលេខាធិការរងសហព័ន្ធកីឡាវាលកូនបាល់កម្ពុជាបានប្រាប់ឲ្យដឹងថា ការប្រកួតឆ្នាំនេះមានកីឡាករ-កីឡាការិនីចូលរួមចំនួន៤៨នាក់ក្នុងកីឡាករ៤៤នាក់ និងកីឡាការិនី៤នាក់មកពី១០ខេត្តក្រុងរួមមានក្លិបខេមរភូមិន្ទ ក្លិបឌីវេនខូ ក្លិបខេត្តបាត់ដំបង ក្លិបខេត្តសៀមរាប ក្លិបអង្គការអរុណរៈ ក្លិបសុខារិទ្ធ ក្លិបខេត្តកែប ក្លិបកណ្តាល ក្លិបក្រសួងសេដ្ឋកិច្ច និងហិរញ្ញវត្ថុ និងក្លិបខេត្តព្រះវិហារ។
សម្រាប់អ្នកដែលប្រជែងបានជើងឯកក្នុងព្រឹត្តិការណ៍នេះនឹងក្លាយជាកីឡាករ កីឡាការិនីជម្រើសជាតិ និង ក្លាយជា
បេក្ខជនសម្រាប់ស៊ីហ្គេមលើកទី៣១ឆ្នាំ២០២១នៅទីក្រុងហាណូយប្រទេសវៀតណាម ។នេះជាការប្រកួតដោយប្រើប្រាស់ថវិការបស់ក្រសួងអប់រំយុវជន និង កីឡា ។
វិញ្ញាសា ដែលដាក់ឲ្យប្រកួតប្រជែងមានចំនួន៤រួមមាន វិញ្ញាសាវាយឯកត្តជនបុរស១នាក់ទល់១នាក់ វិញ្ញាសាវាយឯកត្តជននារី ១នាក់ទល់១នាក់ វិញ្ញាសាវាយឯកត្តជនអាយុក្រោម១៨ឆ្នាំ ១នាក់ទល់១នាក់ និងវិញ្ញាសាវាយគូ។
សូមបញ្ជាក់ថាសម្រាប់ប្រភេទកីឡាវាយកូនបាល់ គឺជាប្រភេទកីឡាដ៏មានសក្ដានុពលមួយដែលកម្ពុជា តែងតែដណ្ដើមបានមេដាយនៅក្នុងព្រឹត្តិការណ៍ស៊ីហ្គេម មិនតែប៉ុណ្ណោះកីឡាវាយកូនបាល់កម្ពុជាបានរក្សាវត្តមាន នៅក្នុងព្រឹត្តិការណ៍Davis-Cup ជាច្រើនឆ្នាំមកហើយ ៕