តំណាងលោកឧកញ៉ា ពុង ឃាវសែ ចែកអំណោយសប្បុរសធម៏ ជូនពលរដ្ឋទីទាល់ក្រីក្រសហគមន៏បុរីរុងរឿង២៣៤ គ្រួសារ ក្នុងឱកាសចូលឆ្នាំចិន
ភ្នំពេញ៖ លោក ផន សុភាព ប្រធានការដ្ឋានសាងសង់ក្រុមហ៊ុនអភិវឌ្ឍន៏OCIC តំណាងឲ្យលោកឧកញ៉ា ពុង ឃាវសែ អគ្គនាយកក្រុមហ៊ុនOCIC នៅថ្ងៃទី០៨ ខែកុម្ភៈ ឆ្នាំ២០២១នេះ បានចែកអំណោយ សប្បុរសធម៏ ជូនដល់ប្រជាពលរដ្ឋទីទាល់ក្រីក្រ ដែលរស់នៅសហគមន៏ក្នុងបុរីរុងរឿងតំបន់អភិវឌ្ឍន៍ជ្រោយ ចង្វារ ក្នុងឱកាសចូលឆ្នាំចិន ។
អំណោយដែលអាជ្ញាធរខណ្ឌ និងក្រុមហ៊ុន OCICនាំយកមកផ្ដល់ជូនបងប្អូនពលរដ្ឋទីទាល់ក្រីក្រ២៣៤គ្រួសារនេះ រួមមាន១គ្រួសារទទួលបានអង្ករ៣០គីឡូក្រាម, ថវិកា៥ម៉ឺនរៀលរួមជាមួយសម្ភារជាច្រើនមុខទៀត ។
លោក ផន សុភាព បានបញ្ជាក់ថា ជារៀងរាល់ឆ្នាំវប្បធម៌ចែករំលែកក្នុងឱកាសបុណ្យចូលឆ្នាំ, ភ្ជុំបិណ្ឌ និងពិធីបុណ្យជាតិផ្សេងទៀត តាមប្រពៃណីជាតិយើង ថ្នាក់ដឹកនាំ រដ្ឋបាលខណ្ឌ សង្កាត់ រួមសហការជាមួយក្រុមហ៊ុនOCICតែងតែគិតគូរយកចិត្ដទុកដាក់ពីសុខទុក្ខបងប្អូនប្រជាពលរដ្ឋក្រីក្រ នៅមូលដ្ឋាន ពិសេសជីវភាពគ្រួសារប្រចាំថ្ងៃ អាជ្ញាធរតែងតែកៀរគរសប្បុរសជនឲ្យជួយរំលែកទុក្ខលំបាកជានិច្ច ។
លោកបន្ដថា៖ ការងារសប្បុរសធម៌បែបនេះ រដ្ឋបាលរាជធានី ខណ្ឌ សង្កាត់បានធ្វើជូនគាត់ ចំនួន២៧ លើកមកហើយដែរ បើគិតជាទឹកប្រាក់មានជាង៧រយលានរៀល។ មិនតែប៉ុណ្ណោះ រដ្ឋបាលខណ្ឌ-សង្កាត់ ក៏បានធ្វើការងារផ្នែកសន្តិសុខ សណ្តាប់ធ្នាប់សាធារណៈនិងបានធ្វើការសហការយ៉ាងជិតស្និទ្ធជាមួយគណៈ បញ្ជាការឯកភាពគ្រប់លំដាប់ថ្នាក់ ជាពិសេស គឺគណៈបញ្ជាការសង្កាត់ ព្រែកតាសេក គណៈបញ្ជាការ សង្កាត់ព្រែកលៀប គណៈបញ្ជាការ សង្កាត់ជ្រោយចង្វារ និងគណៈបញ្ជាការខណ្ឌជ្រោយចង្វារ ក្នុងការចូលរួមថែរក្សាសុខសុវត្ថិភាពជូនប្រជាពលរដ្ឋក្នុងមូលដ្ឋានយ៉ាងល្អប្រសើផងដែរ ។
សូមបញ្ជាក់ថា៖ ប្រជាពលរដ្ឋ ដែលមកទទួល អំណោយនៅពេលនេះ កាលពីមុនពួកគាត់ រស់នៅផ្ទះតូចៗ ធ្វើអំពីឈើប្រក់ស័ង្កសី ឬប្រក់ស្បូវនៅឡើយ មិនតែប៉ុណ្ណោះពួកគាត់រស់នៅ ជួបការលំបាកយ៉ាងខ្លាំងដូចជា៖ គ្មានទឹកស្អាតប្រើប្រាស់ គ្មានភ្លើងអគ្គិសនី រស់នៅលើទឹកកខ្វក់ បរិស្ថានមិនល្អ ងាយរងគ្រោះជាដើម។ ក្រោយពីតំបន់ជ្រោយចង្វារនេះ ត្រូវបានរាជរដ្ឋាភិបាលកម្ពុជា សម្រេចប្រគល់សិទ្ធិ ឲ្យក្រុមហ៊ុនវិនិយោគទុន
អណិកជនកម្ពុជាOCIC ដើម្បីធ្វើការអភិវឌ្ឍ នៅតំបន់នេះ ឲ្យទៅជាទីក្រុងរណបថ្មីមួយទៀត នៅក្នុងរាជធានីភ្នំពេញ ឃើញថា តំបន់នេះ ត្រូវបានផ្លាស់ប្តូរមុខមាត់ថ្មី ស្របតាមការអភិវឌ្ឍរបស់ប្រទេសជាតិ៕ . សំរិត
