គណៈកម្មាធិការជាតិអូឡាំពិកកម្ពុជា នឹងធ្វើមហាសន្និបាត ចុងខែកុម្ភៈនេះ
ភ្នំពេញ៖ ឯកឧត្តមបណ្ឌិត ថោង ខុន ប្រធានគណៈកម្មាធិការជាតិអូឡាំពិកកម្ពុជាបានដឹកនាំកិច្ចប្រជុំ នៅល្ងាចថ្ងៃទី១០ ខែកុម្ភៈ ឆ្នាំ២០២១ នៅទីស្នាក់ការរបស់ខ្លួន ដើម្បីត្រួតពិនិត្យតាមដានសកម្មភាពការងារ ក៏ដូចជាត្រៀមរៀបចំមហាសន្និបាតបូកសរុបលទ្ធផលការងារ និងលើកទិសដៅបន្ត សម្រាប់ឆ្នាំ២០២១ ដែលគ្រោងនឹងធ្វើឡើងនាថ្ងៃទី២៥ ខែកុម្ភៈ ឆាប់ៗនេះ។
ក្រោយបញ្ចប់កិច្ចប្រជុំ, ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា មានប្រសាសន៍ថា នេះជាកិច្ចប្រជុំជាទៀងទាត់រៀងរាល់៣ខែម្តងដែលនេះជាយន្តការត្រួតពិនិត្យតាមដានក៏ដូចជាត្រៀមរៀបចំមហាន្និបាតបូកសរុបលទ្ធផលការងារ និងលើកលើកទិសដៅបន្ត ប្រចាំឆ្នាំ២០២១ នាថ្ងៃទី២៥ ខែកុម្ភៈខាងមុខឆាប់ៗនេះ។
ក្នុងកិច្ចប្រជុំនេះ ឯកឧត្តមបណ្ឌិត ថោង ខុន បានត្រួតពិនិត្យមើលលើលទ្ធផលការងារឆ្នាំ២០២០ កន្លងមក ដែលជាឆ្នាំនៅក្នុងស្ថានភាពវិបត្តិជំងឺកូវីដ១៩ប៉ុន្តែយើងអ្វីដែលជាស្នាដៃនៃសមិទ្ធផលរបស់គណៈកម្មាធិការជាតិអូឡាំពិកកម្ពុជាដែលសម្រេចបានក្នុងឆ្នាំ២០២០ ក៏ត្រូវបាលើកបង្ហាញ រួមទាំងបញ្ហាប្រឈម ចំណុចខ្វះខាត ដើម្បីកែសម្រួលតម្រង់ទិសស្វែងរកផែនការយុទ្ធសាស្ត្រថ្មីៗ សម្រាប់គោលដៅបន្ត ក្នុងការសម្រួចគោលដៅចូលរួមរៀបចំជាមួយគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (SEA Games) លើកទី៣២ ឆ្នាំ២០២៣ (CAMSOC) ដោយបានកំណត់ថា ឆ្នាំ២០២១នេះ គឺជាពេលវេលាចាប់ផ្តើមរៀបចំស៊ីហ្គេម (Games Operation Time)។
ឯកឧត្តមអគ្គលេខាធិការបន្ថែមថានៅក្នុងមហាសន្និបាតរបស់គណៈកម្មាធិការជាតិអូឡាំពិកកម្ពុជានាចុងខែកុម្ភៈនេះនឹងរំលេចចេញនូវគោលការណ៍វិធានការក៏ដូចជាការសម្រេចចិត្តនូវនយោបាយមួយចំនួនដើម្បីបន្តការអភិវឌ្ឍវិស័យកីឡាជាតិជាពិសេសលើផ្នែកជំនាញបច្ចេកទេសគុណផលកីឡា រួមជាមួយនឹងក្រសួងអប់រំ យុវជន និងកីឡាក្នុងគោលដៅឈានទៅទៅរកប្រសិទ្ធភាពពិតប្រាកដចាប់ពីឆ្នាំ២០២១ រហូតដល់អំឡុងពាក់កណ្តាលឆ្នាំ២០២៣ ដែលកម្ពុជាទទួលរៀបចំស៊ីហ្គេម លើកទី៣២តែម្តង។
ពេលនេះយើងត្រូវតែត្រៀមលក្ខណៈឲ្យបានរួចរាល់ដោយត្រូវបានវិធានការរបៀបថ្មីនៃរបត់ថ្មីសម្រាប់ផែនការហ្វឹកហាត់របស់កីឡាករ កីឡាការិនីជម្រើសជាតិឲ្យបានទាន់ពេលវេលា។
ឯកឧត្តមបណ្ឌិត ថោង ខុន បានសង្កត់ធ្ងន់ហើយថា អ្វីដែលប៉ះពាល់ដល់ដំណើរការនៃការអភិវឌ្ឍបច្ចេកទេស ឬសហព័ន្ធកីឡាជាតិណាខ្លះដែលមិនទាន់រឹងមាំដែលជាក្តីបារម្ភក្នុងការអភិវឌ្ឍបច្ចេកទេសនោះគឺយើងត្រូវតែរួមគ្នាកែសម្រួលលើកិច្ចការទាំងអស់នោះ ដើម្បីកសាងសមត្ថភាពរបស់កីឡាករ កីឡាការិនីជម្រើសជាតិឲ្យកាន់តែរឹងមាំ ក្នុងរយៈពេល២ឆ្នាំកន្លះ។
អ្វីដែលសំខាន់ក្នុងកិច្ចប្រជុំនេះ គឺសមាជិកប្រតិបត្តិទាំងអស់មានមូលមតិគ្នា ឯកភាពគ្នា ជាមួយឯកឧត្តម អ៊ុក សិទ្ធិជាតិ អគ្គនាយកកីឡាតំណាងក្រសួងអប់រំយុវជននិងកីឡាដើម្បីបន្តកិច្ចពិភាក្សារួមគ្នាដោយរៀបចំនូវចំណុចខ្វះខាតឲ្យទៅជាកម្លាំងបង្គុំពិសេស
មួយឆ្ពោះទៅរកភាពរីកចម្រើនលើផ្នែកបច្ចេកទេសដែលក្នុងនោះយើងនឹងពិនិត្យចាប់តាំងពីពេលវេលានៃការហ្វឹកហាត់បញ្ហាប្រឈមរបស់អត្តពលិក គ្រូបង្វឹក មន្ត្រីកីឡាទាំងអស់។
ជាមួយគ្នានោះ ឯកឧត្តមក៏បានចាត់ទុកថា កិច្ចប្រជុំនេះគឺជាការឆ្លុះបញ្ចាំងអំពីខ្លឹមសារនៃអង្គមហាសន្និបាត ចុងខែកុម្ភៈនេះផងដែរ ដែលយើងនឹងទទួលបានធាតុចូលបន្ថែមទៀតពីសហព័ន្ធកីឡាជាតិនានា ដើម្បីដាក់ចេញនូវផែនការពិសេសមួយ ក្នុងដំណើរឆ្ពោះទៅរួមគ្នា នៃការទទួលរៀបចំធ្វើជាម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ ឲ្យទទួលបានជោគជ័យ៕
