រដ្ឋបាលខណ្ឌចំការមន សហការជាមួយក្រសួងប្រៃសនីយ៍ និងទូរគមនាគមន៍ បានបើកវគ្គបណ្ដុះបណ្ដាលការបង្កើត និងការប្រើប្រាស់ប្រព័ន្ធបច្ចេកវិទ្យា QR Code “ទប់ស្កាត់កូវីដ-១៩ Stop Covid”
ភ្នំពេញ៖នៅសាលាខណ្ឌចំការមនកាលពីព្រឹកថ្ងៃទី២២ ខែកុម្ភៈ ឆ្នាំ២០២១ នេះដោយរដ្ឋបាលខណ្ឌចំការមន នៃរាជធានីភ្នំពេញបានសហការជាមួយក្រសួងប្រៃសនីយ៍ និងទូរគមនាគមន៍ បានបើកវគ្គបណ្ដុះបណ្ដាលការបង្កើត និងការប្រើប្រាស់ប្រព័ន្ធបច្ចេកវិទ្យា QR Code “ទប់ស្កាត់កូវីដ-១៩ Stop Covid” ជូនដល់លោកនាយករងរដ្ឋបាលខណ្ឌ, ការិយាល័យចំណុះរដ្ឋបាលខណ្ឌ និងរដ្ឋបាលសង្កាត់ទាំង០៥ ដើម្បីផ្សព្វផ្សាយបន្តឱ្យបានទូលំទូលាយ និងអនុវត្តឱ្យមានប្រសិទ្ធភាពខ្ពស់។ តាមរយៈប្រព័ន្ធនេះ ប្រជាពលរដ្ឋអាចស្កេននៅពេលចូលទីតាំងដែលអញ្ជើញទៅដល់ ហើយអាចទទួលបានដំណឹងឆាប់រហ័ស ប្រសិនបើទីតាំងនោះ មានករណីឆ្លងជំងឺ។
ជាថ្មីម្ដងទៀត រដ្ឋបាលខណ្ឌចំការមន សូមអំពាវនាវ ដល់ម្ចាស់អាជីវកម្ម និងគ្រឹះស្ថាននានា ចូលរួមប្រើប្រាស់ប្រព័ន្ធ QR Code “ទប់ស្កាត់កូវីដ-១៩ Stop Covid” នេះសម្រាប់ទីតាំងរបស់ខ្លួន ដើម្បីរួមចំណែកជាមួយរាជរដ្ឋាភិបាលក្នុងការទប់ស្កាត់ ការរីករាលដាលនៃជំងឺកូវីដ-១៩ ព្រមទាំងកាត់ បន្ថយផលប៉ះពាល់ខ្លាំងដល់សេដ្ឋកិច្ច និងសង្គមដោយសារការរាតត្បាតនៃជំងឺនេះ ដូចបណ្ដាប្រទេសផ្សេងទៀត។ សូមសាធារណជន ទាំងអស់ចូលរួមសហការ ស្កេន QR Code នេះ នៅតាមទីតាំងដែល មានដាក់ QR Code “ទប់ស្កាត់កូវីដ-១៩ Stop Covid” តាមរយៈ គេហទំព័រ stopcovid.gov.kh ដោយចុចលើពាក្យ “ចាប់ផ្តើមស្កេន”។
សម្រាប់ព័ត៌មានបច្ចេកទេសពាក់ព័ន្ធទៅនឹងការប្រើប្រាស់ ប្រព័ន្ធ QR Code “ទប់ស្កាត់កូវីដ-១៩ Stop Covid” សូមទាក់ទងទៅកាន់ មជ្ឈមណ្ឌលទាក់ទងបឋម (Call Center) របស់ក្រសួងប្រៃសណីយ៍និងទូរគមនាគមន៍ តាមរយៈ លេខទូរសព្ទ 123 (ហៅចូលដោយឥត គិតថ្លៃ) ឬ 099 888 516 | 012 979 079 ឬគេហទំព័រ www.mptc.gov.kh និងទំព័រហ្វេសប៊ុក “ក្រសួងប្រៃសណីយ៍និងទូរគមនាគមន៍ – Ministry of Post and Telecommunications”៕