ក្រសួងសុខាភិបាលរៀបចំ មន្ទីរពេទ្យ ៦កន្លែង ចាប់ផ្ដើមចាក់វ៉ាក់ សាំងការពារជំងឺកូវីដ-១៩ ជូនមន្ត្រីសុខាភិបាល និងកងកម្លាំងសមត្ថកិច្ចដំណាក់កាលដំបូងនៅ ខេត្តស្វាយរៀង
ស្វាយរៀង៖ លោកបណ្ឌិត កែរ រដ្ឋា បានប្រាប់អ្នកសារព័ត៌មាន នៅថ្ងៃទី២៣ ខែកុម្ភៈ ឆ្នាំ២០២១នេះថា ៖ វ៉ាក់សាំងកូវីដ-១៩ ចំនួន ៣០០០ដូស ត្រូវបានក្រសួងសុខាភិបាលបញ្ជូនមកកាន់ខេត្តស្វាយរៀង ដោយអនុញ្ញាតឲ្យចាក់ទៅលើមន្ត្រីសុខាភិបាល និងកង កម្លាំងក្នុងខេត្តដែលមានមន្ទីរពេទ្យចំនួន៦ សម្រាប់ពិគ្រោះ និងចាក់វ៉ាក់សាំងនេះ។
លោកបានបន្ដថា៖ មន្ទីរសុខាភិបាលបានជូនដំណឹងដល់ប្រធានមន្ទីរពេទ្យខេត្ត ប្រធានការិយាល័យស្រុកប្រតិបត្តិទាំង៤ និងលោកប្រធានមន្ទីរពេទ្យបង្អែកទាំង៥ ដោយមានការអនុញ្ញាតពីក្រសួងសុខាភិបាល មន្ទីរពេទ្យខេត្តរៀបចំចាក់វ៉ាក់សាំងកូវីដ-១៩ ដល់កង កម្លាំងសមត្ថកិច្ច និងមន្ត្រីសុខាភិបាលនៅដំណាក់កាលទីមួយ និងជួយផ្ដល់ដំណឹង ដល់មន្ត្រីសុខាភិបាល មន្ត្រីជាប់កិច្ចសន្យា បុគ្គលិកជួល កម្មករ និងអ្នកបើកបរទាំងអស់ដែលកំពុងបម្រើការងារនៅតាមគ្រឹះស្ថានសុខាភិបាលរដ្ឋទាំងអស់ទូទាំងខេត្ត ឲ្យទៅចាក់វ៉ាក់សាំង ដោយស្ម័គ្រចិត្តព្រមទាំងយក អត្តសញ្ញាណប័ណ្ណ និងប័ណ្ណសម្គាល់ខ្លួនមន្ត្រីរាជការទៅជាមួយផង។
លោកបានបន្តថា ទីតាំងដែលត្រូវចាក់វ៉ាក់សាំងការពារជំងឺកូវីដមានចំនួន៦កន្លែង រួមមាន៖ ទី១៖ មន្ទីរពេទ្យខេត្តស្វាយរៀង ។
ទី២៖ មន្ទីរពេទ្យបង្អែកស្វាយជ្រំ ។ ទី៣៖ មន្ទីរពេទ្យបង្អែកស្វាយទាប ។ ទី៤៖ មន្ទីរពេទ្យបង្អែកសាមគ្គីរំដួល ។ ទី៥៖ មន្ទីរពេទ្យបង្អែកជីភូ ។ ទី៦៖ មន្ទីរពេទ្យបង្អែករមាសហែក។
លោកបានបន្តថា ៖ ការចាក់វ៉ាក់សាំងនេះ អាចមានលទ្ធភាពចាក់ជូនមន្ត្រីនគរបាលចំនួន ៥០នាក់ និងមន្ត្រីសុខាភិបាលចំនួន៥០នាក់យ៉ាងច្រើនបំផុត ក្នុងមួយកន្លែងក្នុងមួយថ្ងៃ ដូច្នេះដើម្បីកុំឲ្យមានការរង់ចាំយូរ និងខាត ពេលវេលាធ្វើការងារ គឺបានបែងចែកវេនទៅចាក់វ៉ាក់សាំងការពារកូវីដ តាមទី តាំង ៦កន្លែង ដែលស្ថិតនៅជិតបំផុតក្នុងមួយថ្ងៃ ៥០នាក់ចាប់ពីថ្ងៃទី២២ ខែកុម្ភៈ ឆ្នាំ២០២១ តទៅនៅរៀងរាល់ម៉ោងធ្វើការ ៕ សំរិត
