ផ្អាកជួបជុំថ្វាយបង្គំជុំអាត់(ថ្ងៃសុក្រ) និងថ្វាយបង្គំពើរជើម៉ាអះ(ថ្វាយបង្គំរួមគ្នា) នៅគ្រប់ម៉ាស្ជិទ និងស៊ូរ៉ាវ សម្រាប់រាជធានីភ្នំពេញ ខេត្តកណ្ដាល និងខេត្តព្រះសីហនុ
ភ្នំពេញ ៖ គណៈដឹកនាំជាន់ខ្ពស់នៃសាសនាឥស្លាមកម្ពុជា ចេញសេចក្តីជូនដំណឹងបន្ទាន់ ស្តីពីការផ្អាកជួបជុំថ្វាយបង្គំជុំអាត់(ថ្ងៃសុក្រ) និងថ្វាយបង្គំពើរជើម៉ាអះ(ថ្វាយបង្គំរួមគ្នា) នៅគ្រប់ម៉ាស្ជិទ និងស៊ូរ៉ាវ សម្រាប់រាជធានីភ្នំពេញ ខេត្តកណ្ដាល និងខេត្តព្រះសីហនុ ចាប់ពីថ្ងៃសុក្រទី២៦ ខែកុម្ភៈ រហូតដល់ថ្ងៃសៅរ៍ទី១៣ ខែមីនា ឆ្នាំ២០២១។
ឧកញ៉ា សុះ កំរ៉ី ចាងហ្វាង គណៈដឹកនាំជាន់ខ្ពស់នៃសាសនាឥស្លាមកម្ពុជា បានប្រកាស ការផ្អាកជួបជុំសឡាតជុំអាត់ថ្ងៃសុក្រ និងសឡាតពើរជើម៉ាអះ នៅគ្រប់ម៉ាស្ជិទ និងស៊ូរ៉ាវ សម្រាប់រាជធានីភ្នំពេញ ខេត្តកណ្តាល និងខេត្តព្រះសីហនុ គិតចាប់ពីថ្ងៃសុក្រ ទី២៦ ខែកុម្ភៈ រហូតដល់ថ្ងៃសៅរ៍ ទី១៣ ខែមីនា ឆ្នាំ២០២១។
ដើម្បីចូលរួមបង្ការ និងទប់ស្កាត់ការរាតត្បាតជំងឺកូវីដ-១៩ នៃព្រឹត្តិការណ៍សហគមន៍ ២០ កុម្ភៈ និងយោងតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា ចាងហ្វាងនៃគណៈដឹកនាំជាន់ខ្ពស់នៃសាសនាឥស្លាមកម្ពុជា សូមជម្រាបដល់គណៈ អ៊ីម៉ាំរាជធានី គណៈអ៊ីម៉ាំខេត្តកណ្តាល គណៈអ៊ីម៉ាំខេត្តព្រះសីហនុ គណៈអ៊ីម៉ាំម៉ាស្ជិទ គ្រូបង្រៀន និងបងប្អូនឥស្លាម សូមផ្អាកការជួបជុំដើម្បីសឡាតជុំអត់ថ្ងៃសុក្រ និងសឡាតពើរជើម៉ាអះ នៅគ្រប់ម៉ាស្ជិទ និងស៊ូរ៉ាវ ចាប់ពីថ្ងៃសុក្រ ទី ២៦ ខែកុម្ភៈ រហូតដល់ថ្ងៃសៅរ៍ ទី១៣ ខែមីនា ឆ្នាំ២០២១។
គណៈដឹកនាំជាន់ខ្ពស់នៃសាសនាឥស្លាមកម្ពុជា សូមធ្វើការណែនាំដល់គណៈអ៊ីម៉ាំរាជធានី ខេត្ត ក្រុង ស្រុក ខណ្ឌ គណៈអ៊ីម៉ាំម៉ាស្ជិទ គ្រូបង្រៀន និងបងប្អូនសាសនិកឥស្លាម សូមបន្តរឹតបន្តឹងការអនុវត្តវិធានសុខភាព និង អនុវត្តអនុសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដូចតទៅ៖
– បន្តរឹតបន្តឹងការប្រុងប្រយ័ត្ន និងពង្រឹងការអនុវត្តវិធានការពារ – ៣ការពារ និង៣កុំ ” ឲ្យបានម៉ឺងម៉ាត់ – ត្រូវរក្សាគម្លាតសុវត្ថិភាពសង្គមឲ្យបានខ្ជាប់ខ្លួនក្នុងចន្លោះយ៉ាងតិច១,៥ ម៉ែត្រ
– ត្រូវពាក់ម៉ាស វាស់កម្ដៅ សម្អាតដៃនឹងសាប៊ូ អាល់កុល ឬដែលជាប្រចាំ – រក្សាអនាម័យ សំអាតខ្លួនប្រាណ សម្លៀកបំពាក់ និងរបស់របរប្រើប្រាស់ផ្សេងៗ
– មិនត្រូវចាប់ដៃនៅពេលធ្វើគារវកិច្ចទេ ត្រូវជំនួសដោយការលើកដៃជាសញ្ញា ឬផ្តល់សាឡាម – ករណីមានអាការៈសង្ស័យ សូមទាក់ទងបន្ទាន់ទៅអាជ្ញាធរមូលដ្ឋានដែលនៅជិតបំផុត។
គណៈដឹកនាំជាន់ខ្ពស់នៃសាសនាឥស្លាមកម្ពុជា មានជំនឿយ៉ាងមុតមាំថា៖ គណៈអ៊ីម៉ាំរាជធានី ខេត្ត ក្រុង ស្រុក ខណ្ឌ គណៈអ៊ីម៉ាំម៉ាស្ជិទ គ្រូបង្រៀន ព្រមទាំងបងប្អូនសាសនិកឥស្លាម នឹងសហការអនុវត្តដោយស្មារតីទទួល ខុសត្រូវខ្ពស់៕