មន្ដ្រីអភិរក្សសត្វព្រៃ ប្រចាំមណ្ឌលគិរី អំពាវនាវ ឲកយពលរដ្ឋថែរក្សា កុំរំខានដល់ហ្វូងសត្វដំរីព្រៃចុះផឹកទឹក ម្ដងៗ
មណ្ឌលគិរី៖ មន្ដ្រី អភិរក្សសត្វព្រៃ នៃក្រសួងបរិស្ថាន បានឱ្យដឹងថា ដំរីព្រៃមួយហ្វូង មានចំនួនប្រមាណជាង១០ ក្បាល បានចុះផឹកទឹកនៅក្រោយសាលា ស្រុកកែវសីម៉ា ក្នុងដែនជម្រកសត្វព្រៃកែវសីម៉ា ស្រុកកែវសីម៉ា ខេត្តមណ្ឌលគិរី កាលពីល្ងាចថ្ងៃទី២៥ ខែកុម្ភៈ ឆ្នាំ២០២១។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានស្នើដល់ប្រជាពលរដ្ឋ កុំរំ ខានសត្វដំរីព្រៃទាំងនេះ និងសូមចូលរួមការពារ និងអភិរក្ស ខណៈបច្ចុប្បន្ន សត្វដំរីព្រៃនៅប្រទេសកម្ពុជា ត្រូវបានប៉ាន់ប្រមាណមានចន្លោះពី៤០០ទៅ៦០០ ក្បាល ដែលកំពុងរស់នៅក្នុងតំបន់ ការពារធម្មជាតិនៃភូមិភាគឦសានដែលរួមមាន ខេត្តមណ្ឌលគិរី និងរតនគិរី។ លោកបានឱ្យដឹងថា នៅអំឡុងខែកុម្ភៈនេះជារៀងរាល់ឆ្នាំ ហ្វូងដំរីព្រៃតែងតែមកទីតាំងខាងលើនេះ ដើម្បីរកចំណីស៊ី និងផឹកទឹក។
បើតាមការអះអាងរបស់លោក នេត្រ ភក្ត្រា បានឱ្យដឹងថា នៅក្នុងរយៈពេលជាង ១០ឆ្នាំចុងក្រោយនេះ កម្រិតនៃបទល្មើសបរបាញ់សម្លាប់សត្វដំរីព្រៃយកភ្លុកនិងកន្ទុយ ដើម្បីប្រើប្រាស់តាមជំនឿពីបុរាណមកនៅកម្ពុជា មានការធ្លាក់ចុះយ៉ាងខ្លាំង ពោលគឺ ស្ទើរតែគ្មាន ដោយសារតែការអនុវត្តច្បាប់តឹងរុឹងប៉ុន្តែមានការកត់ សម្គាល់ឃើញថា ជម្លោះរវាងមនុស្ស និងសត្វដំរីព្រៃ បានកើតឡើងនៅតាមតំបន់ការពារធម្មជាតិមួយចំនួន ដោយសារតែការផ្លាស់ទីទាំងចម្ងាយឆ្ងាយ និងចម្ងាយជិតតាមរដូវកាល និងការស្វែងរកចំណី អាចរងការរំខានដោយសារតែវត្តមានរបស់មនុស្សនៅក្នុងតំបន់ដែនជម្រករបស់ពួកវា។ លើសពីនេះ ដំរីព្រៃអាចទទួលរងការវាយតបពីសំណាក់ប្រជាជនរហូតដល់រងរបួស ឬឈានដល់ការសម្លាប់ជាការសងសឹក នឹងដំរីព្រៃដែលបានចូលមក ស៊ីដំណាំរបស់ពួកគេ។
ដំរីអាស៊ី កំពុងតែទទួលរងការគំរាមកំហែងធ្ងន់ធ្ងរ នៅទូទាំងដែនជម្រករបស់វានៅលើសកលលោក ហើយត្រូវបានចាត់បញ្ចូលជាប្រភេទជិតផុតពូជនៅ ក្នុងបញ្ជីក្រហមរបស់អង្គការសហភាពអន្ដរជាតិដើម្បីការអភិរក្សធម្មជាតិ(IUCN)។ ការរិចរិលទីជម្រកបានធ្វើឱ្យដំរីអាស៊ីរស់នៅបែកខ្ញែកពីគ្នា និងជះឥទ្ធិពលអវិជ្ជមានដល់ស្ថិរភាពយូរអង្វែងរបស់ប្រភេទដ៏សំខាន់នេះ។
លោក នេត្រ ភក្ត្រា មានប្រសាសន៍ថា បើយោងតាមរបាយការណ៍សិក្សា នៅក្នុងតំបន់ជួរភ្នំក្រវាញមិនមានរបាយការណ៍ណាមួយស្តីពីឧបទ្ទវហេតុនៃការបរបាញ់សត្វដំរីខុសច្បាប់តាំងពីឆ្នាំ២០០៣ មកម្ល៉េះ។ ចំណែកនៅក្នុងតំបន់ទេសភាពភាគខាងកើត មានការកត់ សម្គាល់ថា មានដំរីស្លាប់ចំនួន៨ក្បាល ក្នុងនោះមានទាំងកូនដំរី និងដំរីធំ ដែលករណីដំរីធំស្លាប់ត្រូវបានសង្ស័យថា មានការពាក់ព័ន្ធនឹងការបរបាញ់៕
សំរិត