ការអនុវត្តគម្រោងរោងចក្រកាន់តែប្រសើរនៅកម្ពុជាលើវិស័យនាំចេញវាយនភណ្ឌ និងកាត់ដេរសម្លៀកបំពាក់ និងផលិតផលធ្វើដំណើរនិងកាបូប
ភ្នំពេញ៖ ក្រសួងពាណិជ្ជកម្មនិងក្រសួងការងារបណ្ដុះបណ្ដាលវិជ្ជាជីវៈបានរួមគ្នាចេញសេចក្ដីណែនាំស្ដីពី៖ ការអនុវត្តគម្រោងរោងចក្រកាន់តែប្រសើរនៅកម្ពុជាលើវិស័យនាំចេញវាយនភណ្ឌ និងកាត់ដេរសម្លៀកបំពាក់ និងផលិតផលធ្វើដំណើរនិងកាបូប។
យោងប្រកាសអន្តរក្រសួងលេខ៣៦៤/២០ ក.ប/ប្រ.ក.គ.ប.ក ចុះថ្ងៃទី២៧ ខែតុលា ឆ្នាំ២០២០ ស្តីពី ការអនុវត្តគម្រោងរោងចក្រកាន់តែប្រសើរនៅកម្ពុជាលើវិស័យនាំចេញវាយនភណ្ឌ និងកាត់ដេរសម្លៀកបំពាក់ និងផលិតផលធ្វើដំណើរនិងកាបូប និងយោងអនុស្សរណៈនៃការយោគយល់គ្នារវាងរាជរដ្ឋាភិបាលនៃព្រះរាជា ណាចក្រកម្ពុជា សមាគមរោងចក្រកាត់ដេរនៅកម្ពុជា និងអង្គការអន្តរជាតិខាងការងារ ចុះថ្ងៃទី២១ ខែវិច្ឆិកា ឆ្នាំ២០១៩ ស្ដីពីគម្រោងរោងចក្រកាន់តែប្រសើរនៅកម្ពុជា ក្រសួងការងារ និងបណ្តុះបណ្តាលវិជ្ជាជីវៈ និង ក្រសួងពាណិជ្ជកម្ម សូមធ្វើការណែនាំដល់ម្ចាស់ ឬនាយករោងចក្រ សហគ្រាស ព្រមទាំងការិយភាវីនៃផ្នែក វាយនភណ្ឌនិងកាត់ដេរសម្លៀកបំពាក់ និងរោងចក្រ សហគ្រាសផលិតផលិតផលធ្វើដំណើរនិងកាបូបទាំងអស់ ដែលស្នើសុំចុះបញ្ជីទទួលសិទ្ធិនាំចេញទំនិញក្រោមប្រព័ន្ធអនុគ្រោះពាណិជ្ជកម្ម ស្របតាមប្រកាសលេខ២៣២ ព.ណបអព .ប្រក ចុះថ្ងៃទី២៦ ខែវិច្ឆិកា ឆ្នាំ២០១៣ ស្តីពីការកែសម្រួលនីតិវិធីក្នុងការបំពេញបែបបទចុះបញ្ជី ទទួលសិទ្ធិនាំចេញទំនិញក្រោមប្រព័ន្ធអនុគ្រោះពាណិជ្ជកម្ម ត្រូវអនុវត្តដូចខាងក្រោម៖
១. ចុះបញ្ជីជាមួយគម្រោងរោងចក្រកាន់តែប្រសើរនៅកម្ពុជា (Better Factories Cambodia – BFC) ជាមុនសិន។ លោក លោកស្រី ត្រូវបង់វិភាគទានហិរញ្ញវត្ថុទ្រទ្រង់គម្រោងរោងចក្រកាន់តែប្រសើរនៅកម្ពុជា តាមរយៈសមាគមរោងចក្រកាត់ដេរនៅកម្ពុជា ដើម្បីអាចស្នើសុំចុះបញ្ជីជាមួយគម្រោងនេះ។
២. ចាប់ពីឆ្នាំ២០២២តទៅ ត្រូវមានវិញ្ញាបនបត្របញ្ជាក់អនុលោមភាពលក្ខខណ្ឌការងារដែលចេញដោយអធិការការងារនៃក្រសួងការងារ និងបណ្តុះបណ្តាលវិជ្ជាជីវៈ ដើម្បីបញ្ជាក់អំពីស្ថានភាពលក្ខខណ្ឌការងារប្រចាំរោងចក្រ សហគ្រាសរបស់លោក លោកស្រី ស្របតាមប្រកាសលេខ៤៣៤/២០ ក.ប/ប្រ.ក.ខ.ល ចុះថ្ងៃទី៣១ខែធ្នូ ឆ្នាំ២០២០ ស្តីពីការផ្តល់វិញ្ញាបនបត្របញ្ជាក់អនុលោមភាពលក្ខខណ្ឌការងារ និងផែនការសកម្មភាពរួមរបស់គម្រោងរោងចក្រកាន់តែប្រសើរនៅកម្ពុជា និងក្រសួងការងារ និងបណ្តុះបណ្តាលវិជ្ជាជីវៈ។ ក្នុងករណ៏ លោក លោកស្រីមិនបានបំពេញលក្ខខណ្ឌខាងលើ លោក លោកស្រីនឹងមិនទទួលបាន សិទ្ធិនាំចេញទំនិញទៅបរទេសនោះទេ។
ក្រសួងសង្ឃឹមយ៉ាងមុតមាំថា លោក លោកស្រីដែលជាម្ចាស់ ឬនាយករោងចក្រ សហគ្រាស ព្រមទាំង ការិយភារីនៃផ្នែកវាយនភណ្ឌនិងកាត់ដេរសម្លៀកបំពាក់ និងរោងចក្រ សហគ្រាសផលិតផលិតផលធ្វើដំណើរ និងកាបូបទាំងអស់ចូលរួមអនុវត្តតាមសេចក្តីណែនាំនេះប្រកបដោយប្រសិទ្ធភាព៕