រថយន្តស្ទូចដឹកសសរគ្រឹះ ថយបុកម៉ូតូបុរសម្នាក់ជិះម៉ូតូ បណ្តាលឲ្យស្លាប់
កណ្តាល ៖ បុរសម្នាក់ជិះម៉ូតូមួយគ្រឿងត្រូវរថយន្តស្ទូចដឹកសសរគ្រឹះ ថយទៅបុកបណ្តាលឲ្យដួលស្លាប់នៅនឹងកន្លែងកើតហេតុភ្លាមៗ។ ចំណែកឯតៃកុងរថយន្តបង្ករត់គេចខ្លួនបាត់ស្រមោល។
ហេតុការណ៍គ្រោះថ្នាក់ចរាចរណ៍នេះ ដែរកើតឡើងនៅវេលាម៉ោង ៥ និង ៥០នាទីល្ងាចថ្ងៃសៅរ៍ទី ២៧ ខែកុម្ភៈឆ្នាំ ២០២១ ស្ថិតនៅតាមបណ្ដោយផ្លូវជាតិលេខ២ ក្នុងភូមិទួលក្រសាំង សង្កាត់រការខ្ពស់ ក្រុងតាខ្មៅ ខេត្តកណ្តាល។
សពជនរងគ្រោះ មានឈ្មោះ ញៀមតាំង ឃីម ភេទប្រុស អាយុ៤៧ឆ្នាំ មុខរបរលក់ដូរមានប្រពន្ធនិងកូន។ មានស្រុកកំណើតនៅភូមិស្វាយជួ ឃុំកោះខែល ស្រុកស្អាង ខេត្តកណ្តាល។
ប្រភពព័ត៌មានពីប្រជាពលរដ្ឋនៅកន្លែងកើតហេតុ បានឲ្យដឹងថា មុនពេលកើតហេតុគេឃើញបុរសម្នាក់ជិះម៉ូតូមួយគ្រឿង ម៉ាកគុបជ្រុង ពណ៌ទឹកប៊ិចពាក់ផ្លាកលេខកណ្តាល1X 5728 ធ្វើដំណើរតាមបណ្តោយផ្លូវ២១B ក្នុងទិសដៅពីកើតមកលិចក្នុងល្បឿនមធ្យម ខណៈមកដល់ចំណុចកើតហេតុនៅមុខនិងការដ្ឋានចាក់សសរគ្រឹះ ស្រាប់មានរថយន្តស្ទូចមួយគ្រឿងក្បាលពណ៌សពាក់ផ្លាកលេខភ្នំពេញ3-E 3294 បើកបរដោយបុរសម្នាក់ ដឹកសសរ៤ដើម នៅលើរថយន្តបានបើកថយក្រោយចេញពីការដ្ឋានមកបុកចំផ្ទៃមុខ របស់ជនរងគ្រោះពេញទំហឹង បណ្តាលឲ្យដួលបោកក្បាលនឹងថ្នាល់ស្លាប់ភ្លាមៗ។
ត្រូវពេលកើតហេតុសមត្ថកិច្ចមូលដ្ឋាន សហការជាមួយនឹងខាងចរាចរណ៍ជំនាញសង្កាត់រការខ្ពស់ ចរាចរណ៍ជំនាញខេត្តកណ្ដាល ចុះមកវាស់វែងយករថយន្តនិងម៉ូតូ ទៅរក្សាទុកនៅស្នងការខេត្តកណ្តាល និងធ្វើកំណត់ហេតុប្រគល់សពឲ្យទៅក្រុមគ្រួសារ យកទៅស្រុកកំណើតធ្វើបុណ្យតាមប្រពៃណី៕
