ជនបំពុលសង្គម បានផ្សព្វផ្សាយព័ត៌មានក្លែងក្លាយថា “មន្ត្រីនគរបាលក្រសួងមហាផ្ទៃម្នាក់ ធ្លាក់ខ្លួនពិការ ក្រោយពីចាក់ វ៉ាក់សាំងចិន ”
ភ្នំពេញ ៖ នាយកដ្ឋានសន្តិសុខផ្ទៃក្នុង នៃអគ្គស្នងការដ្ឋាននគរបាលជាតិ នៅថ្ងៃទី២៨ ខែកុម្ភៈឆ្នាំ២០២១នេះបានធ្វើការបដិសេធចំពោះការបង្ហោះរបស់គណនីហ្វេសប៊ុកឈ្មោះ “Chhun Vean II” ដែលបានបង្ហោះពត៌មានថា មន្ត្រីនគរបាលក្រសួងមហាផ្ទៃម្នាក់ ធ្លាក់ខ្លួនពិការក្រោយពីចាក់វ៉ាក់សាំងចិន គឺជាការមិនពិត និងមានចរិកញុះញង់ធ្វើឲ្យមានការភ័ន្តច្រឡំ។
ជាមួយគ្នានេះ នាយកដ្ឋានសន្តិសុខផ្ទៃក្នុងបានធ្វើការបដិសេធខ្លឹមសារដែលបានបង្ហោះខាងលើទាំងស្រុង និងសូមបញ្ជាក់ជូនសាធាណៈជនមេត្តាជ្រាបថា លោកឧត្តមសេនីយ៍ត្រី ជា ឧត្តម បម្រើការងារនៅក្នុងនាយដ្ឋានសន្តិសុខផ្ទៃក្នុង មានជម្ងឺគៀបសរសៃប្រាសាទឆ្អឹងខ្នង (Hernir Crural) និងលើសអាស៊ីតធ្ងន់ធ្ងរ ជាយូរមកហើយ និងថ្មីៗនេះ បានបណ្តាលឲ្យប៉ះពាល់សរីរាង្គផ្នែកខាងក្រោមចង្កេះ ធ្វើឲ្យជើងទាំងពីរស្ពឹកទន់ដើរពុំរួច មិនដូចអ្វីដែល គណនីហ្វេសប៊ុកឈ្មោះ “Chhun Vean II” លើកឡើងឡើយ។
ទាក់ទងនឹងករណីនេះដែរ នាយកដ្ឋានសន្តិសុខផ្ទៃក្នុង នៃអគ្គស្នងការដ្ឋាននគរជាតិ ក៏បានបដិសេធចំពោះគណនីហ្វេសប៊ុកឈ្មោះ «Chhun Vean II»នេះដែរ ដែលបានបង្ហោះព័ត៌មានដូចមានខ្លឹមសាខាងលើនេះ ហើយជាមួយគ្នា នាយកដ្ឋានសន្តិសុខផ្ទៃក្នុង ក៏បានថ្កោលទោសចំពោះការបង្ហោះព័ត៌មានដែលមានចរិតញុះញង់ខុសការពិតនេះ និងតម្រូវឲ្យម្ចាស់គណនីខាងលើ ធ្វើការកែតម្រូវនិងសុំទោសជាសាធារណៈផងដែរ។ បើមិនដូច្នោះទេ នាយកដ្ឋាននឹងចាត់វិធានការតាមផ្លូវច្បាប់ជាធរមាន។
ឧត្តមសេនីយ៍ត្រី ជា ឧត្តម អនុប្រធាននាយករដ្ឋានទទួលបន្ទុកការិយាល័យការពារសម្ងាត់រដ្ឋ បានធ្វើការបដិសេធទាំងស្រុងចំពោះជនអគតិមួយ នៅក្នុងគណនីហ្វេសបុកឈ្មោះ Chhun Vean II បានបង្ហោះថា រូបលោកបានធ្លាក់ខ្លួនពិការដោយសារមកពីការចាក់ថ្នាំវ៉ាក់សាំងការពារមេរោគគូវីដ១៩របស់ចិន ខណៈលោកមិនទាន់បានធ្វើការចាក់នៅឡើយ ហើយលោកក៏បានអំពាវនាវាដល់អាជ្ញាធរជំនាញស្វែងរកចាប់ខ្លួន ជននេះមកផ្តន្ទាទោសទៅតាមផ្លូវច្បាប់ផងដែរ។
ការបដិសេធរបស់លោកឧត្តមសេនីយ៍ត្រី ជា ឧត្តម បានធ្វើឡើងបន្ទាប់ពីគណនីហ្វេសបុកឈ្មោះ Chhun Vean II បានបង្ហោះភ្ជាប់ជាមួយរូបលោកដោយដើរកាន់ឈឺច្រត់នៅថ្ងៃទី២៨ ខែកុម្ភៈ ឆ្នាំ២០២១នេះថា «ដំណឹងក្តៅៗផ្លូវការ មន្ត្រីនគរបាលក្រសួងមហាផ្ទៃម្នាក់ ធ្លាក់ខ្លួនពិការក្រោយពិចាក់វ៉ាក់សាំងចិន»។
លោកឧត្តមសេនីយ៍ត្រី ជា ឧត្តម បានបញ្ជាប់ថា ការបង្ហោះរបស់ជនអគតិខាងលើនេះ គឺជាចេតនា ញុះញង់ទុច្ចរិត បំពុលសង្គម ឲ្យមានការភន្តច្រឡំពីសាធារណៈជន និងការរើសអើងជាតិសាសន៍ជាដើម។
ចំណែកនាយកដ្ឋានប្រឆាំងបទល្មើសបច្ចេកវិទ្យា បានចេញផ្សាយព័ត៌មានថា នាពេលថ្មីៗនេះមានការផ្សព្វផ្សាយដោយចេតនាទុច្ចរិត នូវព័ត៌មានមិនពិតក្នុងគណនីហ្វេសប៊ុកមួយ ដោយបានធ្វើការបង្ហោះព័ត៌មានក្លែងក្លាយថា “មន្ត្រីនគរបាលក្រសួង មហាផ្ទៃម្នាក់ធ្លាក់ខ្លួនពិការ ក្រោយពីចាក់វ៉ាក់សាំងចិន ” ក្នុងគោលបំណងបង្កឱ្យមានភាពចលាចលក្នុងប្រទេស តែតាមការពិតរូបភាពដែលបានយកមកបង្ហោះនោះគឺជារូបភាពដែលថ្នាក់ដឹកនាំនាយកដ្ឋានសន្តិសុខផ្ទៃក្នុង បាននាំយកថវិកានិងសម្ភារៈមួយចំនួនទៅចុះសួរសុខទុក្ខលោកឧត្តមសេនីយ៍ត្រី ជាឧត្តម ដែលមានជំងឺ គៀបសរសៃប្រាសាទឆ្អឹងខ្នង។
ទាក់ទងនឹងការផ្សព្វផ្សាយព័ត៌មានក្លែងក្លាយនេះលោកឧត្តមសេនីយ៍ត្រី ជាឧត្តម បានធ្វើការបដិសេធនៅក្នុងទំព័រហ្វេសប៊ុកផ្ទាល់ខ្លួន ហើយជាមួយគ្នានេះ នាយកដ្ឋានសន្តិសុខផ្ទៃក្នុង ក៏បានធ្វើការបដិសេធខ្លឹមសារដែលបានបង្ហោះខាងលើផងដែរ។
នាយកដ្ឋានប្រឆាំងបទល្មើសបច្ចេកវិទ្យា សូមណែនាំដល់ប្រជាពលរដ្ឋទាំងអស់ ត្រូវមានការទទួលខុសត្រូវចំពោះព័ត៌មានដែលខ្លួនយកមកបង្ហោះ ឬចែកចាយ ទោះជាចេតនា ឬអចេតនាក្ដី ព្រោះលោកអ្នកអាចប្រឈមនឹងច្បាប់នូវរាល់ការផ្សព្វផ្សាយក្លែងបន្លំណាដែលបង្កឱ្យមានភាពចលាចលដល់សង្គម៕
