បុរសម្នាក់បើករថយន្ត ជ្រុលទៅបុកពីក្រោយរថយន្តដឹកស៊ីម៉ងត៍ បានរេចង្កូតធ្លាក់ចូលក្នុងប្រឡាយក្រឡាប់ផ្ងារជើងរងរបួសធ្ងន់ទាំង២នាក់
ភ្នំពេញ ៖ បុរសម្នាក់រួមដំណើរដោយស្ត្រីជាប្រពន្ធម្នាក់ទៀត បានបើករថយន្តមួយគ្រឿងក្នុងល្បឿនលឿន ខ្វះការប្រុងប្រយ័ត្នជ្រុលចង្កូតទៅបុកពីក្រោយរថយន្តដឹកស៊ីម៉ងត៍ ចតចោលនៅលើចិញ្ចើមផ្លូវពេញទំហឹង បានរេចង្កូតធ្លាក់ចូលក្នុងប្រឡាយក្រឡាប់ផ្ងារជើង និងរងរបួសធ្ងន់ទាំងពីរនាក់បញ្ជូនទៅមន្ទីរពេទ្យ។ ចំណែកឯតៃកុងរថយន្តដឹកស៊ីម៉ងត៍បានគេចខ្លួនចេញពីកន្លែងកើតហេតុ បន្សល់ទុកតែរថយន្ត។
ហេតុការណ៍គ្រោះថ្នាក់ចរាចរណ៍នេះដែរកើតឡើងនៅវេលាម៉ោង ៣ និង ៤០ នាទីទៀបភ្លឺឈានចូលថ្ងៃចន្ទ ទី១ ខែមីនា ឆ្នាំ ២០២១ ស្ថិតតាមបណ្ដោយផ្លូវវិមានឈ្នះឈ្នះ ក្នុងសង្កាត់គោករការ ខណ្ឌព្រែកព្នៅ រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុគាត់បានឃើញបុរសម្នាក់ បានបើករថយន្តដឹកស៊ីម៉ងត៍មួយគ្រឿង ម៉ាកហ៊ីយ៉ាន់ដាយក្បាលពណ៌ស ពាក់ផ្លាកលេខភ្នំពេញ3-A 8556 យកទៅចតចោលនៅលើចិញ្ចើមផ្លូវរួចក៏ដើរទៅបាត់ ប្រហែលជាមួយសន្ទុះក្រោយមកដល់ម៉ោងកើតហេតុខាងលើ ស្រាប់តែគាត់បានឃើញរថយន្តមួយគ្រឿងទៀត ប្រភេទរថយន្តបែនដឹកថ្មពាក់ផ្លាកលេខភ្នំពេញ3-F 3040 បើកបរដោយបុរសម្នាក់រួមដំណើរ និងស្ត្រីម្នាក់ទៀតជាប្រពន្ធ ធ្វើដំណើរតាមបណ្តោយផ្លូវវិមានឈ្នះ ឈ្នះ ក្នុងទិសដៅពីលិចមកកើតក្នុងល្បឿនលឿន ខ្វះការប្រុងប្រយ័ត្នបានរេចង្កូតជ្រុលទៅបុករថយន្តដឹកស៊ីម៉ងត៍ពីក្រោយពេញទំហឹង បណ្តាលរេចង្កូតធ្លាក់ចូលក្នុងប្រឡាយក្រឡាប់ខ្ទាតស្ត្រីជាប្រពន្ធទៅមុខ រងរបួសធ្ងន់ ត្រូវបានរថយន្តសង្គ្រោះបន្ទាន់ដឹកយកទៅភ្លាមៗ ។
ចំណែកតៃកុងរថយន្តត្រូវជាប្តីបានជាប់នៅក្នុងរថយន្ត ស្រែកឲ្យសមត្ថកិច្ចនិងប្រជាពលរដ្ឋជួយ តែសមត្ថកិច្ចបានទំនាក់ទំនងទៅខាងក្រុមជួយសង្គ្រោះបន្ទាន់៧១១ បានចុះមកបើកប្រតិបត្តិការជួយទៅលើតៃកុងដែលជាប់នៅក្នុងរថយន្ត ប្រើអស់រយៈពេលជាង២ម៉ោង ទើបជួយសង្គ្រោះតៃកុងជាប់នៅក្នុងរថយន្តបានសម្រេច ចេញក្រៅរួចបញ្ជូនយកទៅ
សង្គ្រោះបន្ទាន់ភ្លាមៗ។
ក្រោយពេលកើតហេតុខាងលើសមត្ថកិច្ចខាងជំនាញចរាចរណ៍ក្រុង ឲ្យចុះមកវាស់វែងនិងធ្វើកំណត់ហេតុយករថយន្ដទាំងពីរគ្រឿង ទៅរក្សាទុកនៅការិយាល័យចរាចរណ៍ផ្លូវគោក រង់ចាំដោះស្រាយនៅពេលក្រោយ៕
