នាយករដ្ឋមន្ត្រី កម្ពុជា វៀតណាម និងឡាវ ឯកភាព ពង្រឹងវិស័យពាណិជ្ជកម្ម សេដ្ឋកិច្ច និងការហោះហើរ
ភ្នំពេញ ៖ ក្រសួងការបរទេសនិងសហប្រតិបត្តិការអន្តរជាតិ បានចេញសេចក្តីប្រកាសព័ត៌មានស្តីពីលទ្ធផលនៃជំនួបតាមប្រព័ន្ធវីដេអូរវាងនាយករដ្ឋមន្ត្រីនៃប្រទេសទាំងបី ព្រះរាជាណាចក្រកម្ពុជា សាធារណរដ្ឋប្រជាធិបតេយ្យប្រជាមានិតឡាវ និងសាធារណរដ្ឋសង្គមនិយមវៀតណាម នៅថ្ងៃទី១០ ខែមីនា ឆ្នាំ២០២១ ដោយនាយករដ្ឋមន្ត្រីទាំង៣បានឯកភាពពន្លឿនការ អនុវត្តផែនការការតភ្ជាប់សេដ្ឋកិច្ច CLV ដល់ឆ្នាំ២០៣០ ដោយផ្តោតលើកិច្ចសហប្រតិបត្តិការក្នុងការគៀងគរធនធានពីដៃគូអភិវឌ្ឍន៍ ដើម្បីស្ថាបនាផ្លូវល្បឿនលឿនហាណូយ-វៀងចន្ទន៍ ផ្លូវរថភ្លើង វៀងចន្ទន៍ -វង្សអាន និងផ្លូវរថភ្លើងភ្នំពេញ-ហូជីមិញ។
នៅថ្ងៃទី១០ ខែមីនា ឆ្នាំ២០២១ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឯកឧត្តមបណ្ឌិត ថងលូន ស៊ីសូលីត នាយករដ្ឋមន្ត្រីនៃសាធារណរដ្ឋ ប្រជាធិបតេយ្យប្រជាមានិតឡាវ និង ឯកឧត្តម ង្វៀន សួនហ្វ៊ុក នាយករដ្ឋមន្ត្រីនៃសាធារណរដ្ឋសង្គម និយមវៀតណាម បានជួបគ្នាតាមប្រព័ន្ធវីដេអូ ដើម្បីពិភាក្សាអំពីកិច្ចសហប្រតិបត្តិការរវាងប្រទេសទាំងបី ក្នុងក្របខ័ណ្ឌទ្វេភាគី ត្រីភាគី និងពហុភាគី។
នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ និងសាធារណរដ្ឋសង្គមនិយម វៀតណាម បានថ្លែងអំណរគុណយ៉ាងជ្រាលជ្រៅចំពោះគំនិតផ្តួចផ្តើមដ៏សំខាន់របស់សម្តេចតេជោ នាយករដ្ឋមន្ត្រី ឱ្យមានជំនួបតាមប្រព័ន្ធវីដេអូ ដែលជាការរួមចំណែកពង្រឹង និងពង្រីកបន្ថែមទៀតនូវ មិត្តភាពជាប្រពៃណី និងកិច្ចសហប្រតិបត្តិការប្រកបដោយផ្លែផ្កានៃប្រទេសទាំងបី។
នៅក្នុងអំឡុងជំនួបនេះ នាយករដ្ឋមន្ត្រីទាំងបីបានជម្រាបជូននូវសភាពការណ៍វិវត្តន៍ថ្មីៗនៅ ក្នុងប្រទេសរបស់ខ្លួន រួមទាំងការប្រយុទ្ធប្រឆាំងនឹងការរីករាលដាលជំងឺកូវីដ -១៩។ សម្តេចតេជោ នាយករដ្ឋមន្ត្រី បានសម្តែងការអបសាទសមភាគីវៀតណាម និងឡាវ ចំពោះភាពជោគជ័យនៃមហាសន្និបាត នៃបក្សកម្មុយនីស្តវៀតណាម លើកទី១៣ មហាសន្និបាតនៃបក្សបដិវត្តន៍ប្រជាជនឡាវ លើក ទី១១ ក៏ដូចជាការបោះឆ្នោតមហាសន្និបាតជាតិឡាវ។ សម្តេចតេជោនាយករដ្ឋមន្ត្រី ក៏បានកោត សរសើរវៀតណាមដែលទទួលបានជោគជ័យក្នុងការអភិវឌ្ឍសេដ្ឋកិច្ច សង្គមនៅឆ្នាំ២០២០ ទោះបីជា មានការរីករាលដាលជំងឺកូវីដ-១៩ ក៏ដោយ។
សម្តេចតេជោនាយករដ្ឋមន្ត្រី ហ៊ុន សែន ក៏បានអបអរសាទរឡាវ និងវៀតណាម ក្នុងការគ្រប់គ្រងការីករាលដាលជំងឺកូវីដ-១៩ ដោយមានប្រសិទ្ធភាព។ ជាការឆ្លើយតប ឯកឧត្តមនាយករដ្ឋមន្ត្រី ថងលូន ស៊ីសូលីត បានថ្លែងអំណរគុណចំពោះ សម្តេចតេជោនាយករដ្ឋមន្ត្រី ដែលបានបរិច្ចាគម៉ាស និងបរិក្ខារពេទ្យដល់សាធារណរដ្ឋប្រជាធិបតេយ្យប្រជាមានិតឡាវ ដើម្បីជួយប្រយុទ្ធប្រឆាំងនឹងការរីករាលដាលជំងឺកូវីដ -១៩។
លើសពីនេះ នាយករដ្ឋមន្ត្រីឡាវ និងវៀតណាម បានសម្តែងនូវជំនឿជឿជាក់ថា ជាមួយនឹងការខិតខំប្រឹងប្រែងដ៏មុះមុត និងវិធានការដ៏តឹងរ៉ឹង ដាក់ចេញដោយ សម្តេចតេជោ នាយករដ្ឋមន្ត្រី ហ៊ុន សែន ប្រទេសកម្ពុជានឹងទទួលបានជោគជ័យក្នុងការទប់ស្កាត់ការ ផ្ទុះរាលដាលនៃជំងឺកូវីដ-១៩ នៅក្នុងសហគមន៍ជាថ្មីម្តងទៀត។
នាយករដ្ឋមន្ត្រីទាំងបី បានឯកភាព គ្នាពង្រឹងបន្ថែមនូវកិច្ចសហប្រតិបត្តិការ និងការគាំទ្រ គ្នាទៅ វិញទៅមកក្នុងការប្រយុទ្ធប្រឆាំងការរីករាលដាលនៃជំងឺកូវីដ -១៩។ នាយករដ្ឋមន្ត្រីទាំងបី ក៏បានឯកភាព គ្នាក្នុងការផ្តល់ការចាក់វ៉ាក់សាំងកូវីដ-១៩ ទៅវិញទៅមកដោយមិនគិតថ្លៃដល់មន្ត្រីការទូត និងសិស្ស និស្សិតកម្ពុជា ឡាវ និងវៀតណាម ដែលកំពុងស្នាក់នៅក្នុងប្រទេសនីមួយៗ។
នាយករដ្ឋមន្ត្រីទាំងបី បានសម្តែងនូវការពេញចិត្តរួមគ្នាចំពោះទំនាក់ទំនង និងកិច្ចសហប្រតិបត្តិការ ដែលកំពុងមានការរីកចម្រើនលើគ្រប់វិស័យរវាងប្រទេសទាំងបី ទោះបីស្ថិតក្នុងកាលៈទេសៈ នៃភាពប្រឈមខ្លាំងបណ្តាលពីការរីករាលដាលនៃជំងឺកូវីដ-១៩ក៏ដោយ ។ នាយករដ្ឋមន្ត្រីទាំងបី ក៏បាន កត់សម្គាល់ដោយក្ដីរីករាយនូវការកើនឡើងនៃទំហំពាណិជ្ជកម្មរវាង កម្ពុជា-ឡាវ និង កម្ពុជា-វៀតណាម ។
ថ្នាក់ដឹកនាំទាំងបី បានឯកភាពពង្រឹងបន្ថែមកិច្ចសហប្រតិបត្តិការលើវិស័យនយោបាយ សន្តិសុខ ការពារជាតិ ការគ្រប់គ្រងព្រំដែន ពាណិជ្ជកម្ម និងវិនិយោគ ការតភ្ជាប់ ថាមពល និងអប់រំ។ នាយករដ្ឋមន្ត្រីទាំងបី ក៏បានឯកភាពបន្តរក្សា និងអនុវត្តន៍យ៉ាងមានប្រសិទ្ធភាពនូវយន្តការនៃកិច្ច សហប្រតិបត្តិការដែលមានស្រាប់ – ជំរុញកិច្ចសហប្រតិបត្តិការរវាងបណ្តាខេត្តជាប់ព្រំដែន – អនុវត្តន៍ ឱ្យមានប្រសិទ្ធភាពនូវរាល់កិច្ចព្រមព្រៀងស្តីពីការគ្រប់គ្រងព្រំដែន – សហការបន្ថែមក្នុងការការពារសន្តិសុខ តាមបណ្តោយព្រំដែនរួម – សម្របសម្រួលសកម្មភាពពាណិជ្ជកម្ម និងវិនិយោគ ព្រមទាំងការឆ្លងកាត់ របស់ប្រជាជន និងទំនិញនៅតាមបណ្តាប៉ុស្តិ៍ត្រួតពិនិត្យព្រំដែន។
នៅក្នុងវិស័យការតភ្ជាប់ នាយករដ្ឋមន្ត្រីទាំងបី បានឯកភាពពិចារណាអំពីការដំណើរការឡើង វិញនូវការហោះហើរអន្តរជាតិរវាងកម្ពុជា ឡាវ និងវៀតណាម ដើម្បីជំរុញពាណិជ្ជកម្ម និងការវិនិយោគ ក៏ដូចជាការផ្លាស់ប្តូររវាងប្រជាជននៃប្រទេសទាំងបី។
នៅក្នុងកិច្ចសហប្រតិបត្តិការក្របខ័ណ្ឌអនុតំបន់ នាយករដ្ឋមន្ត្រីទាំង៣បានឯកភាពពន្លឿនការ អនុវត្តផែនការការតភ្ជាប់សេដ្ឋកិច្ច CLV ដល់ឆ្នាំ២០៣០ ដោយផ្តោតលើកិច្ចសហប្រតិបត្តិការក្នុងការគៀងគរធនធានពីដៃគូអភិវឌ្ឍន៍ ដើម្បីស្ថាបនាផ្លូវល្បឿនលឿនហាណូយ-វៀងចន្ទន៍ ផ្លូវរថភ្លើង វៀងចន្ទន៍ -វង្សអាន និងផ្លូវរថភ្លើងភ្នំពេញ-ហូជីមិញ។
ជាងនេះទៅទៀត នាយករដ្ឋមន្ត្រីវៀតណាម និងឡាវ បានបញ្ជាក់សារជាថ្មីនូវការប្តេជ្ញាចិត្តក្នុង ការគាំទ្រយ៉ាងពេញទំហឹងចំពោះកម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលអនុតំបន់មេគង្គលើកទី៧ នៅក្នុងខែមីនា ឆ្នាំ២០២១ កិច្ចប្រជុំកំពូល ASEM លើកទី១៣ នៅចុងឆ្នាំ២០២១ និងប្រធានអាស៊ាន ក្នុងឆ្នាំ២០២២។
ទន្ទឹមនេះ នាយករដ្ឋមន្ត្រីទាំងបី បានឯកភាពចាត់តាំងឱ្យក្រសួង-ស្ថាប័នពាក់ព័ន្ធ និងអាជ្ញាធរ ខេត្តពាក់ព័ន្ធទាំងអស់អនុវត្តន៍នូវការព្រមព្រៀងគ្នា ដែលបានសម្រេចនៅក្នុងជំនួបតាមប្រព័ន្ធវីដេអូ នេះ ក៏ដូចជាការបង្កើនមិត្តភាព និងកិច្ចសហប្រតិបត្តិការពហុវិស័យរវាងបណ្តាប្រទេសទាំងបី កម្ពុជា វៀតណាម និងឡាវ។
ជាចុងបញ្ចប់ ថ្នាក់ដឹកនាំទាំងបីក៏បានផ្លាស់ប្តូរទស្សនៈគ្នា លើបញ្ហាតំបន់ និងអន្តរជាតិ ដែល ជាផលប្រយោជន៍ និងក្តីបារម្ភរួម ផងដែរ៕
