រកឃើញអ្នកកើតកូវីដ១៩ ចំនួន៤ករណីទៀត ក្នុងខណ្ឌឫស្សីកែវ,តែអាជ្ញាធរថាមិនមានករណីកូវីដ១៩កើតឡើងនៅសង្កាត់ច្រាំងចំរេះទី២
ភ្នំពេញ៖ គណៈបញ្ជាការឯកភាពរដ្ឋបាលខណ្ឌឫស្សីកែវ សហការជាមួយក្រុមការងារក្រសួងសុខាភិបាល បានបន្តរកឃើញអ្នកមានវិជ្ជមានមេរោគកូវីដ១៩ ចំនួន៤ករណីទៀត ស្មើ៣ទីតាំង និងមានអ្នកពាក់ព័ន្ធចំនួន៦នាក់ផ្សេងទៀត បាននិងកំពុងធ្វើចត្តាឡីស័កនៅតាមផ្ទះ ខណៈកើនឡើង៩កន្លែងហើយ ក្រោយទីតាំងចត្តាឡីស័ក២កន្លែង (ផ្ទះអ្នកជំងឺកូវីដ១៩) ឈ្មោះ ឡាយ គា និងឈ្មោះ Ho Ming Jie ពាក់ព័ន្ធព្រឹត្តិការណ៍សហគមន៍២០កុម្ភៈ ត្រូវបានបើកដំណើរការឡើងវិញ។នេះតាមការឱ្យដឹងរបស់មន្ត្រីរដ្ឋបាលខណ្ឌនៅរសៀលថ្ងៃទី១៣មីនានេះ។
ក្នុងនោះលោក ជា ពិសី បានឲ្យដឹងថា៖ ក្រសួងសុខាភិបាល បានបន្តរកឃើញអ្នកមានវិជ្ជមានជំងឺកូវីដ១៩ នៅយប់ថ្ងៃទី១២ ខែមីនា ឆ្នាំ២០២១ ចំនួន០៤នាក់ ស្មើនឹង៣ទីតាំងបន្ថែមទៀត រួមមានដូចខាងក្រោម៖១ស្ត្រីអាយុ៣៤ឆ្នាំ២បុរសអាយុ៣៥ឆ្នាំ៣ស្ត្រីអាយុ៣១ឆ្នាំ់៤ស្ត្រីអាយុ៣៩ឆ្នាំ។
ចំណែកអ្នកពាក់ព័ន្ធ៦នាក់ ដែលមានកុមារ៣នាក់ផងដែរ ត្រូវបានគ្រូពេទ្យយកសំណាក និងបញ្ជូនទៅកាន់អតីតសណ្ឋាគារ The Great Duke ហើយសម្រេចបិទទីតាំងបណ្ដោះអាសន្នចំនួន៣កន្លែង ទាំងផ្ទះ និងបន្ទប់ជួល ស្ថិតនៅក្រុមទី៣-ក្រុមទី៤ ភូមិស្ពានខ្ពស់ និងស្ថិតនៅផ្ទះលេខ២៣ដេ ផ្លូវលេខ៩៩ ភូមិក្រោលគោ សង្កាត់គីឡូម៉ែត្រលេខ៦។
នៅយប់ដដែលនេះ រដ្ឋបាលខណ្ឌ ក៏បានចុះបើកឲ្យដំណើរការជាសាធារណៈឡើងវិញនូវទីតាំងធ្វើចត្តាឡីស័ក (ផ្ទះអ្នកជំងឺកូវីដ១៩) ១កន្លែងផងដែរ ក្រោយពីបានធ្វើចត្តាឡីស័ករយៈពេល១៤ថ្ងៃ ដែលមានឈ្មោះ Ho Ming Jie ស្ថិតនៅក្រុមទី១ ភូមិពោងពាយ សង្កាត់ទួលសង្កែទី២។
ជាមួយការរកឃើញអ្នកជំងឺកូវីដ១៩ ចំនួន៣ទីតាំងទៀត និងការបើកឲ្យដំណើរការជាសាធារណៈឡើងវិញនូវទីតាំងចត្តាឡីស័ក (ផ្ទះអ្នកជំងឺកូវីដ១៩) ២កន្លែងនេះ, ប្រធានគណៈបញ្ជាការឯកភាពខណ្ឌឫស្សីកែវ និងជាសមាជិកក្រុមលេខាសម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា លោក ជា ពិសី បានប្រកាសច្រានចោលទាំងស្រុងចំពោះព័ត៌មានមិនពិតមួយតាមគណនីឈ្មោះ Sep Lacy ដែលបានបង្ហោះផ្សព្វផ្សាយថា នៅសង្កាត់ច្រាំងចំរេះទី២ «មានការឲ្យដំណឹងមកថា អាជ្ញាធរខណ្ឌឫស្សីកែវ កំពុងចុះប្រតិបត្តិការពិនិត្យករណីសង្ស័យមានកូវីដ១៩ ម្ដុំផ្លូវអាងទឹកគីឡូលេខ៧ សូមមេត្តាប្រុងប្រយ័ត្នអ្នកគីឡូ ៧, ៨, និង ៩»។
សូមជម្រាបថា៖ សម្រាប់ខណ្ឌឫស្សីកែវ រាជធានីភ្នំពេញ មកទល់ពេលនេះ មានទីតាំងចត្តាឡីស័កចំនួន០៩កន្លែងហើយ ក្រោយពីបានរកឃើញអ្នកមានវិជ្ជមានមេរោគកូវីដ១៩ ៤ករណី ស្មើនិង៣ទីតាំងបន្ថែមទៀត រួមមាន*សម្រាប់សង្កាត់ទួលសង្កែទី២គឺ៖ ផ្ទះ សួស តូនី ភូមិទួលថ្ងាន់ សង្កាត់ទួលសង្កែទី២។ទីតាំងផ្ទះលេខ០៨២J ផ្លូវកាំកូស៊ីធី ក្រុមទី៧ ភូមិគង្គាផុស សង្កាត់ទួលសង្កែទី២ ដែលមានអ្នកអាយុ៤០ឆ្នាំ មុខរបរតន្ត្រីករ មានអ្នកពាក់ព័ន្ធ ១០នាក់ (ស្រី០៦នាក់)។សង្កាត់ឫស្សីកែវ គឺផ្ទះ គិន កូលាប ផ្ទះ១១៣២ ភូមិឃ្លាំងសាំង សង្កាត់ឫស្សីកែវ។សង្កាត់គីឡូម៉ែត្រលេខ៦ ទីតាំងផ្ទះលេខ១៤ ផ្លូវលេខ៩ ក្រុមទី៤ ភូមិស្ពានខ្ពស់ សង្កាត់គីឡូម៉ែតលេខ៦ ដែលមានអ្នកជម្ងឺឈ្មោះ សុគន្ធ នីសា អាយុ៣៨ឆ្នាំ មុខរបរតារាចម្រៀង និងមានអ្នកពាក់ព័ន្ធ០៥នាក់ (ស្រី០៤នាក់)។ផ្ទះឈ្មោះ ឡាយ គា ស្ថិតក្នុងភូមិស្ពានខ្ពស់ សង្កាត់គីឡូម៉ែតលេខ៦។
ឈ្មោះ Ho Ming Jie ផ្ទះលេខ១០៣ ភូមិពោងពាយ សង្កាត់ទួលសង្កែទី២។ តែចំនួន២ទីតាំងនេះ អាជ្ញាធរបានសម្រេចបើកឲ្យដំណើរការជាសាធារណៈឡើងវិញហើយ ក្រោយពីបានបិទជាបណ្ដោះអាសន្ន ដើម្បីធ្វើចត្តាឡីស័ក១៤ថ្ងៃ ពាក់ព័ន្ធ (ព្រឹត្តិការណ៍សហគមន៍២០កុម្ភៈ) កាលពីរសៀលថ្ងៃទី០៩ និងយប់ថ្ងៃទី១២ ខែមីនា ឆ្នាំ២០២១៕
