ផ្ទុះស្សេកាប៊ីនភ្លើង ឆេះរោងចក្រផលិតពូក ខ្ទេចអស់ទាំងស្រុង
ភ្នំពេញ ៖ អគ្គិភ័យឆាបឆេះរោងចក្រផលិតពូកមួយកន្លែងកាលពីវេលាម៉ោង៨និង២០នាទីព្រឹកថ្ងៃទី១៦ខែមីនាឆ្នាំ២០២១ ស្ថិតនៅតាមបណ្តោយផ្លូវបេតុងមួយកន្លែងក្នុងភូមិកាកាប២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុមានកម្មករកម្មការិនីទាំងខ្មែរនិងថែកែចិន កំពុងតែបំពេញការងាររៀងៗខ្លួន ស្រាប់តែមានអណ្តាតចេញពីប្រអប់កាប៊ីនភ្លើងនៅក្នុងរោងចក្រ ដែលគ្មានយីហោខាងលើបង្កឲ្យមានការភ្ញាក់ផ្អើល និងនាំគ្នារត់ចេញមកខាងក្រៅរោងចក្រមួយសន្ទុះក្រោយមកក៏ផ្សែងហុយចេញខ្មួលខ្មួញពេញមេឃ និងមានកម្មករខ្មែរនិងចិននាំគ្នា ជួយយកបំពង់បាញ់ពន្លត់អគ្គិភ័យជាច្រើនបំពង់ជួយបាញ់ទប់ស្កាត់ តែដោយសារស្ថានភាពខាងលើមិនអាចគ្រប់គ្រងស្ថានការណ៍បាន ទើបសមត្ថកិច្ចមូលដ្ឋានបានស្នើសុំរថយន្តពន្លត់អគ្គិភ័យឲ្យជួយចេញទៅអន្តរាគមន៍ ភ្លាមៗនោះដែរ ក៏មានរថយន្តពន្លត់អគ្គិភ័យរបស់កងតម្រួតបទបញ្ជារថយន្តពន្លត់អគ្គិភ័យរបស់ស្នងការរាជធានីភ្នំពេញ រថយន្តពន្លត់អគ្គិភ័យសាលារាជធាភ្នំពេញ និងរថយន្តពន្លត់អគ្គិភ័យអាវុធហត្ថរាជធានីភ្នំពេញ រួមនិងរថយន្តពន្លត់អគ្គិភ័យរបស់ក្រុមហ៊ុនឯកជនជាច្រើនគ្រឿងទៀត ចេញទៅជួយបាញ់ទឹកការពារនិងទប់ស្កាត់កុំឲ្យរាលដាល ដល់រោងចក្រនិងផ្ទះប្រជាពលរដ្ឋដែលនៅក្បែរៗនោះបន្តទៀត។
សមត្ថកិច្ចបានបញ្ជាក់ឲ្យដឹងថា មូលហេតុដែលបង្កឲ្យមានករណីអគ្គិភ័យកើតឡើងខាងលើនេះ គឺបណ្តាលមកពីឆ្លងចរន្តអគ្គិសនីក្នុងហេតុការណ៍អគ្គិភ័យឆាបឆេះនេះ មិនបានបណ្តាលឲ្យមាននរណាម្នាក់រងរបួសនោះទេ
ទំហំនៃការខូចខាត គឺរលំអគារសាងសង់ពីដែកប្រក់ស័ង្កសីអស់មួយអគារនិងខូចខាតសម្ភារ:របស់ថៅកែរោងចក្រអស់ទាំងស្រុង សរុបជាទឹកប្រាក់រាប់សិបម៉ឺនដុល្លារ ហើយអគ្គីភ័យខាងលើបានរលត់ជាស្ថាពរទៅវិញ នៅម៉ោង៩និង៥០នាទីព្រឹកថ្ងៃដដែល៕