គ្រោះថ្នាក់ចរាចរណ៍ បង្កឡើងរវាងរថយន្ដ FORDនិងរថយន្ដដឹកប្រេងPtt
កំពង់ស្ពឺ ៖ នៅគីឡូម៉ែត្រ៨២_៨៣ វេលាម៉ោង ០៥:៥៤នាទីព្រឹកព្រលឹមនៅព្រឹកថៃ្ងទី២៧ ខែមិនា ឆ្នាំ២០២១ មានករណីគ្រោះថ្នាក់ចរាចរណ៍នៅផ្លូវជាតិលេខ ៤ ចំណុចភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ បង្កឡើងរវាងរថយន្តFORD ប្រភេទ ដឹកទំនិញ ពណ៌ស ពាក់ស្លាកលេខ 2AQ-6556 បើកបរឈ្មោះ គង់ រ៉ាឌី ភេទប្រុស អាយុ៥៣ឆ្នាំ រស់នៅភូមិទី៦ ឃុំត្រែងត្រយឹង ស្រុកភ្នំស្រួច និងរថយន្ត ដឹកប្រេងឥន្ធនៈ ក្រុមហ៊ុន PTT ស្លាកលេខ ភ្នំពេញ3E-9559 អ្នកបើកបររថយន្ដដឹកប្រេង គេចខ្លួន។
តាមព័ត៌មានបឋម រថយន្តទាំងពីរ បើកបរក្នុងទិសដៅបញ្រ្ចាសគ្នា រថយន្តដឹកប្រេងបើកបរពីទិសខាងកើត ឆ្ពោះទៅទិសខាងលិច លុះមកដល់ចំណុចខាងលើ បានរេចង្កូតចូលទៅចំណែកផ្លូវម្ខាងឆ្វេង រួចទៅបុករថយន្ត ម៉ាក FORD។
ក្នុងហេតុការណ៍ខាងលើ មិនបណ្តាលឱ្យមានមនុស្សរងរបួស ឬគ្រោះថ្នាក់ដល់អាយុជីវិតឡើយ សមត្ថកិច្ចបន្ដសម្រួលចរាចរណ៍ នៅចំណុចកើតហេតុ ចរាចរណ៍មានលក្ខណៈធម្មតាទៅវិញ ទៅមក។
មធ្យោបាយរថយន្តទាំងពីគ្រឿង សមត្ថកិច្ចបានយកមករក្សាទុកបណ្ដោះអាសន្ន នៅអធិការដ្ឋាននគរបាលស្រុកភ្នំស្រួច ដើម្បីចាត់ការតាមនិតិវិធី ៕
