នគរបាលស្រុកកៀនស្វាយ ចុះអប់រំណែនាំ និងកិច្ចសន្យាដល់ម្ចាស់ទីតាំងហាងកាហ្វេ បើកឲ្យបញ្ឈប់មានការលេងល្បែងស៊ីសង ជល់មាន់តាមទូរទស្សន៍អនឡាញនៅឃុំគគីរ
កណ្តាល ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល មានកិត្តិយសសូមឆ្លើយតបចំពោះសាធារណជន និងគណនីហ្វេសបុកសុំមិនបញ្ចេញឈ្មោះ ដែលបានរាយការណ៍ក្នុងប្រអប់សារផេកហ្វេសបុកស្នងការដ្ឋាននគរបាលខេត្តកណ្តាល មានខ្លឹមសារថា ៖ ជំរាបសួរលោកពូ ខ្ញុំមានបញ្ហានិងការព្រួយបារម្ភនៅភូមិទួលដូង ឃុំគគីរ ស្រុកកៀនស្វាយ មានកន្លែងកាហ្វេភ្នាល់ជល់មាន់តាមទូរទស្សន៍ចាប់ពីម៉ោង ១២ រហូតដល់ម៉ោង ៦យប់មានមនុស្សមកលេងប្រហែល ៣០ទៅ៤០នាក់ មកពីភូមិផ្សេងៗគ្នារំខានរកតែសម្រាកមិនបានពេលថ្ងៃណាមួយភ័យខ្លាចរឿងកូវីដ ទៀតសំណូមពរសុំបញ្ឈប់បានទេ ហើយសុំលាក់ផេកខ្ញុំឆាតទៅផង កុំឲ្យគេខឹងព្រោះជាមុខរបររបស់គេ អរគុណជំរាបលាជួយឲ្យប៉ូលិសប៉ុស្តិ៍គាត់មកមើលផងបើនៅតែចឹងងាប់ហើយ នៅជិតមណ្ឌលក្លារ៉ាពូជួយផង។
ក្រោយទទួលបានពត៌មាននេះ ដោយមានការចង្អុលបង្ហាញពីក្រុមការងារប្រតិកម្មរហ័សខេត្ត លោកអធិការនិងក្រុមប្រតិកម្មរហ័សនៃអធិការដ្ឋាននគរបាលស្រុកកៀនស្វាយ បានដាក់បទបញ្ជាឲ្យប៉ុស្តិ៍នគរបាលរដ្ឋបាលគគីរ ចុះស្រាជ្រាវទីតាំងខាងលើ ។
ជាលទ្ធផល ៖នៅថ្ងៃពុធ ១០រោច ខែចេត្រ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី០៧ ខែមេសា ឆ្នាំ២០២១ វេលាម៉ោង ១៤:៣០នាទី កម្លាំងប៉ុស្តិ៍នគរបាលរដ្ឋបាលគគីរ សហការជាមួយអាជ្ញាធរមូលដ្ឋានបានចុះទៅដល់ចំណុចទីតាំងខាងលើដែលម្ចាស់ឈ្មោះ សុទ្ធ ចិន្តា ភេទស្រី អាយុ៣១ឆ្នាំ ស្ថិតនៅភូមិទួលដូង ឃុំគគីរ ស្រុកកៀនស្វាយ ខេត្តកណ្តាល។ បន្ទាប់មកកម្លាំងសមត្ថកិច្ចប៉ុស្តិ៍ និងអាជ្ញាធរមូលដ្ឋាន បានអប់រំណែនាំ និងកិច្ចសន្យាដល់ម្ចាស់ទីតាំងឲ្យបិទដំណើរការល្បែង(ជល់មាន់តាមទូរទស្សន៍អនឡាញ) របស់ខ្លួនចាប់ពីថ្ងៃនេះតទៅ ។
អាស្រ័យហេតុនេះ សូមសាធារណជន ដែលប្រើប្រាស់បណ្តាញទំនាក់ទំនងសង្គមមេត្តាជ្រាប ៕
