ឃុំខ្លួនក្នុងពន្ធនាគារខេត្តស្វាយរៀង ករណីបុរសម្នាក់បង្កហិង្សាដោយចេតនា ប៉ុនប៉ងមនុស្សឃាត លើលោកយាយអាយុ៧៨ឆ្នាំម្នាក់ដល់ក្រោមផ្ទះ នៅឃុំកំពង់ត្រាច
ស្រុករមាសហែក ៖ ជនសង្ស័យឈ្មោះ ឈឹម សំអុន បង្កហិង្សាដោយចេតនា ប៉ុនប៉ងមនុស្សឃាត លើលោកយាយអាយុ៧៨ឆ្នាំម្នាក់ដល់ក្រោមផ្ទះ នៅឃុំកំពង់ត្រាច ត្រូវបានសមត្ថកិច្ចអធិការដ្ឋាននគរបាលស្រុករមាសហែក ឃាត់ខ្លួន និងកសាងសំណុំរឿង បញ្ជូនទៅសាលាដំបូងខេត្តចាត់ការតាមច្បាប់ បច្ចុប្បន្នបានធ្វើការ ឃុំខ្លួនក្នុងពន្ធនាគារខេត្តស្វាយរៀងរួចហើយ។
អធិការដ្ឋាននគរបាលស្រុករមាសហែក បានឲ្យដឹងថា កាលពីថ្ងៃទី ១៨ ខែកក្កដា ឆ្នាំ២០២១ សារព័ត៌មានបានចេញផ្សាយអត្ថបទដែលមានចំណងជើងថា កំពូលមហាអយុត្តិធម៌ក្នុងលោក ពលរដ្ឋចោទថា ករណីបុរសម្នាក់បង្កហិង្សាដោយចេតនា ប៉ុនប៉ងមនុស្សឃាត លើលោកយាយអាយុ៧៨ឆ្នាំម្នាក់ដល់ក្រោមផ្ទះ ខណៈដែលសមត្ថកិច្ច ទាំងអធិការ និងមេប៉ុស្តិ៍ មិនហ៊ានដោះស្រាយ ថែមទាំងកែសំណុំរឿង ក្រោមហេតុផលថា ជនបង្កមានខ្នងធំណាស់ កើតហេតុស្ថិតនៅភូមិឈើភ្លើង ឃុំកំពង់ត្រាច ស្រុករមាសហែក ខេត្តស្វាយរៀង ។
អធិការដ្ឋាននគរបាលស្រុករមាសហែក សូមធ្វើការបំភ្លឺជូនដូចខាងក្រោម ៖ នៅថ្ងៃទី១៦ ខែកក្កដា ឆ្នាំ២០២១ អធិការដ្ឋាននគរបាលស្រុករមាសហែក បានទទួលពាក្យបណ្តឹងពីឈ្មោះ ពុត សាមិ ភេទស្រី អាយុ៧៨ឆ្នាំ រស់នៅភូមិឈើភ្លើង ឃុំកំពង់ត្រាច ស្រុករមាសហែក ខេត្តស្វាយរៀង បានប្តឹងចោទ ប្រកាន់ទៅលើឈ្មោះ ឈឹម សំអុន ភេទប្រុស អាយុ៥១ឆ្នាំ មានទីលំនៅភូមិឃុំជាមួយគ្នាថា កាលពីថ្ងៃទី១២ ខែកក្កដា ឆ្នាំ ២០២១ វេលាម៉ោង១៩និង២០នាទី មានឈ្មោះ ឈឹម សំអុន បានយកដំបងឫស្សីចូលមកវាយខ្លួនបណ្តាលឲ្យ ខ្លួនដួលទៅលើដី រួចវាយនិងទាត់ខ្លួនបណ្តាលឲ្យរងរបួសជាទម្ងន់ ត្រូវបានក្រុមគ្រួសារដឹកយកទៅព្យាបាលរបួស នៅមន្ទីរពេទ្យបង្អែកស្រុករមាសហែក។
បន្ទាប់ពីទទួលពាក្យបណ្តឹងខាងលើនេះភ្លាម កម្លាំងជំនាញនៃអធិការដ្ឋាននគរបាលស្រុករមាសហែក សហការជាមួយ កម្លាំងប៉ុស្តិ៍នគរបាលរដ្ឋបាលកំពង់ត្រាច បានចុះទៅដល់កន្លែងកើតហេតុ ដើម្បីធ្វើការស្រាវជ្រាវស៊ើប អង្កេត និងបានពិនិត្យឃើញថា ជនរងគ្រោះ និងជនសង្ស័យកំពុងសម្រាកព្យាបាលនៅមន្ទីរពេទ្យបង្អែកស្រុក រមាសហែក ដូចគ្នា។
រហូតមកដល់ថ្ងៃទី១៨ ខែកក្កដា ឆ្នាំ២០២១ ក្រោយពីឈ្មោះ ឈឹម សំអុន ចេញពីមន្ទីរពេទ្យ សមត្ថកិច្ចយើង ក៏បានធ្វើការកោះអញ្ជើញឈ្មោះ ឈឹម សំអុន ឲ្យចូលខ្លួនឆ្លើយបំភ្លឺជុំវិញរឿងហេតុខាងលើភ្លាម ចំពោះមុខសមត្ថកិច្ច ឈ្មោះ ឈឹម សំអុន បានឆ្លើយសារភាព ថាខ្លួនពិតជាបានប្រព្រឹត្តពិតប្រាដកមែន។ ជនសង្ស័យឈ្មោះ ឈឹម សំអុន ត្រូវ បានសមត្ថកិច្ចយើងឃាត់ខ្លួន និងកសាងសំណុំរឿង បញ្ជូនទៅសាលាដំបូងខេត្តចាត់ការតាមច្បាប់ បច្ចុប្បន្នបានធ្វើការ ឃុំខ្លួនក្នុងពន្ធនាគារខេត្តស្វាយរៀងរួចហើយ៕
