ការរកឃើញនូវពពួកបម្លែងថ្មី នៅក្នុងសហគមន៍កន្លងមក យើងរកឃើញនៅក្នុងចំណោម ពលករមកពីថៃ ឥឡូវកំពុងចរាចរណ៍នៅកម្ពុជា

ភ្នំពេញ៖ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិលបាល និងជាប្រធានគណៈកម្មការចំពោះកិច្ច ចាក់វ៉ាក់សាំងការពារជំងឺកូវីដ១៩ បានមានប្រសាសន៍ថា ការរកឃើញនូវពពួកបម្លែងថ្មី នៅក្នុងសហគមន៍កន្លងមក យើងរកឃើញនៅក្នុងចំណោម ពលករមកពីថៃ ប៉ុន្ដែឥឡូវនេះបានឆ្លងបន្ដទៀត គឺចេញពីការប៉ះពាល់ពលករ ដែលត្រឡប់មកពីប្រទេសថៃ។

លោកជំទាវ ឱ វណ្ណឌីន បានថ្លែងថា វីរុសបម្លែងថ្មីនេះបានឆ្លងចូលសហគមន៍របស់យើងហើយ ពិសេសប្រភេទ Delta ដែលលទ្ធភាពនៃការឆ្លងមានល្បឿនលឿន ហើយបានឆ្លងតាមតាមរយៈពលករ ធ្វើដំណើរពីប្រទេសថៃ ដែលពេលនេះបានឆ្លងបន្ដទៅ ដល់ក្រុមគ្រូពេទ្យ និងពលរដ្ឋនៅក្នុងសហគមន៍យើង នៅក្នុងខេត្ដឧត្ដរមានជ័យ ព្រះវិហារ សៀមរាប និងខេត្ដកំពង់ធំ ដែលយើងទាំងអស់ត្រូវប្រុងប្រយ័ត្ន។

លោកជំទាវបានថ្លែង ក្នុងឱកាសនាំយកថវិកាលើកទឹកចិត្ដ ចំនួន១០លានរៀល និងសម្ភារមួយចំនួនទៀត របស់សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា ប្រគល់ជូនលោកយាយ ចាន់ ឃីម រស់នៅខេត្ដសៀមរាប ដែលជាអ្នកទី៧លាន ស្ម័គ្រចិត្ដចាក់វ៉ាក់សាំងការពារជំងឺកូវីដ១៩ នៅរសៀលថ្ងៃទី២៩ ខែកក្កដា ឆ្នាំ២០២១នេះ។

លោកជំទាវរដ្ឋលេខាធិការ ក្រសួងសុខាភិបាល បានថ្លែងបន្ដថា ការរកឃើញនូវពពួកបម្លែងថ្មីនៅក្នុងសហគមន៍របស់យើង កន្លងមកយើងរកឃើញនៅក្នុងចំណោម ពលករមកពីថៃ ប៉ុន្ដែឥឡូវនេះបានឆ្លងបន្ដទៀត គឺចេញពីការប៉ះពាល់ពលករ ដែលត្រឡប់មកពីប្រទេសថៃ ដែលឆ្លងនិងឈឺដោយជំងឺកូវីដ១៩ ទៅដល់ក្រុមគ្រូពេទ្យ និងពលរដ្ឋយើងនៅក្នុងសហគមន៍ ដែលរស់នៅ សៀមរាប កំពង់ធំ ឧត្ដរមានជ័យ និងខេត្ដព្រះវិហារ។ ដើម្បីកុំឱ្យវីរុសបម្លែងថ្មីនេះ វាធ្វើចរាចរណ៍ទៅទៀត ទាល់តែមនុស្សកុំចរាចរណ៍ ដូច្នេះសូមមេត្ដាអនុវត្ដវិធានការសុខាភិបាល ៣ការពារ ៣កុំ ឱ្យមានខ្ជាប់ខ្ជូន។

លោកជំទាវថ្លែងបន្ដថា វិធានការការពារយើងមានហើយយ៉ាងល្អ និងសុវត្ថិភាព នៅឡើយតែការអនុវត្ដរបស់ប្រជាពលរដ្ឋយើង ជោគជ័យមិនជោគជ័យអាស្រ័យលើការចូលរួម របស់ប្រជាពលរដ្ឋ ប្រសិនបើមិនមានការចូលរួមឱ្យបានត្រឹមត្រូវទេនោះ ការចម្លងនឹងបន្ដទៅហើយ ដូច្នេះហើយឆ្លងមួយដំណាក់ទៀត យើងនឹងហួសបន្ទាប់ក្រហម នៅពេលដែលហួសបន្ទាប់ក្រហមហើយ យើងនឹងពិបាកជាងពេលនេះទៅទៀត សូម្បីតែមូលដ្ឋានសាធារណៈក៏រកកន្លែងដាក់អ្នកជំងឺមិនបាន អ្នកដែលត្រូវការជួយសង្គ្រោះបន្ទាន់អ្នកជំងឺធ្ងន់ៗ ពិសេសជនចាស់ជរាជាដើមក៏គ្មានលទ្ធភាព៕