បុរសជនជាតិថៃម្នាក់ ធ្លាក់ពីលើ អគារកាស៊ីណូ សេនផាលេស ស្លាប់ នៅក្រុងប៉ោយប៉ែត
បន្ទាយមានជ័យ ៖ អគ្គស្នងការដ្ឋាននគរបាលជាតិ បានឲ្យដឹងថា បុរសជនជាតិថៃម្នាក់ធ្លាក់ពីលើអគារកាស៊ីណូ និងសណ្ឋាគារ សេនផាលេស កម្ពស់១៤ជាន់មកទើលើអគារកំពុងសាងសង់ថ្មីជាន់ទី១ ស្លាប់ភ្លាមៗ វេលាម៉ោង២១និង០៥នាទី ថ្ងៃទី៣០ ខែកក្កដា ឆ្នាំ២០២១ ស្ថិតនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ករណីនេះ សមត្ថកិច្ចកំពុងស្រាវជ្រាវករណីតើជាករណីលោតសម្លាប់ខ្លួន ឬពាក់ព័ន្ធទៅនឹងករណីឃាតកម្ម ។
បើតាមកាបញ្ជាក់ពីសមត្ថកិច្ចបានឲ្យដឹងថា ជនរងគ្រោះជាតិថៃឈ្មោះ វ៉ារីស ផានថាណាត ស៊ីរីដេឆៃ កើតថ្ងៃទី១៧ ខែកុម្ភៈ ឆ្នាំ ២៩៨២ មានទីលំនៅផ្ទះ11/3ភូមិ៤ ឃុំតាកៀនធៀ ស្រុកបាងឡាមុង ខេត្តឈុនបុរី ប្រទេសថៃ កាន់កាតក្រុមហ៊ុនកាស៊ីណូសេន ផាលេស លេខT-311-04 នៅបន្ទប់លេខ៣១២ជាន់ទី៣។
ក្រោយពីទទួលបានព័ត៌មានសមត្ថកិច្ចបានចុះដល់កន្លែងកើតហេតុភ្លាមៗ និងពិនិត្យចំណុចកើតហេតុអគារកាស៊ីណូសេនផាលេស ជាន់ទី១៤ ឃើញមានបន្សល់ទុកនូវស្បែកជើងផ្ទាត់ពណ៌ក្រហម១គូរ កាបូបក្រវ៉ាត់ចង្កេះពណ៌ប្រផេះមួយក្នុងនោះមាន ៖ ១-អត្តសញ្ញាណប័ណ្ណ១សន្លឹក, ២-កាតចេញចូលកាស៊ីណូ១សន្លឹក, ៣-សៀវភៅធនាគារ២ក្បាល, ៤-កាតធនាគារ២សន្លឹក, ៥-ដបទឹកថ្នាំវែបតូច១ដប, ៦-ដុំសាកថ្មទូរស័ព្ទ១, ដែកកេះ ទឹកអប់១ដប, ម្សៅលាប១កំប៉ុង,អង្កាំជ័រខ្សែដៃ២ខ្សែ។
បន្ទាប់មកសមត្ថកិច្ចបានបន្តនៅលើអគារជាន់ទី១ កំពុងសាងសង់ គ្មានបន្ទប់ កន្លែងជនរងគ្រោះធ្លាប់មកជាន់ទី១ ដែលកំពុងសាងសង់នោះ ឃើញមានទូរស័ព្ទ១គ្រឿង។
ក្រោពីបានពិនិត្យនៅកន្លែងកើតហេតុរួច សមត្ថកិច្ចបានយកសំណាកសាកសពធ្វើតេស្ត អវិជ្ជមានកូវីត១៩ និងធ្វើតេស្តទឹកនោមរកសារធាតុញៀនឃើញថា អវិជ្ជមាន ។ បច្ចុប្បន្ន សមត្ថកិច្ចកំពុងបន្តស្រាវជ្រាវថា តើជាករណី លោតសម្លាប់ខ្លួន ឬពាក់ព័ន្ធទៅនឹងករណីឃាតកម្ម៕ 