កម្មករ៣នាក់ស្លាប់ និងរងរបួសជាច្រើននាក់ ពេលរថយន្តដឹកកម្មករ បុកជាមួយរថយន្តមួយគ្រឿងទៀត នៅស្រុកសំរោងទង
កំពង់ស្ពឺ ៖ លោកឧត្តមសេនីយ៍ត្រី តាប់ លន ស្នងការរងនគរបាលខេត្តកំពង់ស្ពឺ បានឲ្យដឹងថា មានករណីរថយន្តដឹកកម្មករ (ឡានកូរ៉េ ២,៥តោន) បានបុកជាមួយរថយន្តមួយគ្រឿងទៀត បណ្តាលឲ្យកម្មករ៣នាក់ស្លាប់ និងរងរបួសជាច្រើននាក់។
យោងតាមរបាយការណ៍ អធិការនគរបាលស្រុកសំរោងទង នៅម៉ោងប្រមាណ ១៨និង៣០នាទី ថៃ្ងទី១១ ខែសីហា ឆ្នាំ២០២១ មានករណីរថយន្តដឹកកម្មករ បុកជាមួយរថយន្ត មួយគ្រឿងទៀតដឹកឥដ្ឋ លេីកំណាត់ផ្លូវជាតិលេខ ៤១ ចន្លោះគីឡូម៉ែត្រលេខ ៣-៤ ស្ថិតក្នុងភូមិសំរោង ឃុំត្រពាំងគង ស្រុកសំរោងទង ខេត្តកំពង់ស្ពឺ ។
តាមការបញ្ជាក់ រថយន្តជួបគ្រោះថ្នាក់ខាងលេីមានកម្មករ កម្មការិនី ជិះសរុប ៣៥ នាក់ ក្នុងឧប្បវហេតុនេះបណ្ដាលឱ្យកម្មករស្លាប់ ចំនួន ០៣ នាក់ ប្រុសម្នាក់ ជិះនៅផ្នែកខាងក្រោយរថយន្ដ ។
លោកអធិការបន្ថែមឱ្យដឹងទៀតថា ក្រៅពីអ្នកស្លាប់ខាងលេី ក៏មានអ្នករបួសធ្ងន់ ១៧ នាក់ របួសស្រាល ០៨ នាក់ និងតៃកុងរថយន្ដ ០២នាក់ ព្រូរថយន្ដម្នាក់ សរុបក្នុងហេតុការណ៍ អ្នករងរបួស ២៨ នាក់ ស្លាប់ ០៣ នាក់ ក្រៅពីរនោះ របួសតិចតួច។ មូលហេតុជំនាញបន្ដស្រាវជ្រាវ ចំណែកវត្ថុតាង កម្លាំងនគរបាលបានចំណាត់ការស្ទួចយកមករក្សាទុក ជាបណ្ដោះអាសន្ន ដេីម្បីកសាងសំណុំរឿងចាត់ការនីតិវិធីបន្ដ៕