UN ស្វែងរកថវិកាចំនួន ៦០០ លានដុល្លារ ដើម្បីបញ្ចៀសវិបត្តិមនុស្សធម៌នៅប្រទេសអាហ្វហ្គានីស្ថាន
បរទេស ៖ អង្គការសហប្រជាជាតិកំពុងរៀបចំសន្និសីទស្វែងរកជំនួយមួយនៅទីក្រុងហ្សឺណែវនៅថ្ងៃចន្ទក្នុងកិច្ចខិតខំប្រឹងប្រែងដើម្បីរៃអង្គាសប្រាក់ជាង ៦០០ លានដុល្លារសហរដ្ឋអាមេរិកសម្រាប់ជួយប្រទេសអាហ្វហ្គានីស្ថាន ដោយព្រមានពីវិបត្តិមនុស្សធម៌ក្នុងប្រទេសនោះ បន្ទាប់ពីក្រុមតាលីបង់ដណ្តើមបាន ។
មន្ត្រីនិងក្រុមជំនួយរបស់អង្គការសហប្រជាជាតិព្រមានថា ទោះបីជាមុនពេលដែលក្រុមតាលីបង់ដណ្តើមបានទីក្រុងកាប៊ុលកាលពីខែមុនក៏ដោយ ក៏ប្រជាជនជាងពាក់កណ្តាល ឬ ១៨ លាននាក់ បានពឹងផ្អែកលើជំនួយរួចទៅហើយ។ ហើយតួលេខកើនឡើងដោយ សារតែគ្រោះរាំងស្ងួត និងកង្វះខាតសាច់ប្រាក់ រួមទាំងស្បៀងអាហារផងដែរ។
ការបញ្ចប់ភ្លាមៗនូវជំនួយបរទេសជាទឹកប្រាប់រាប់ពាន់លានដុល្លារសហរដ្ឋអាមេរិក បន្ទាប់ពីរដ្ឋាភិបាល ដែលគាំទ្រដោយប្រទេសលោកខាងលិចដួលរលំ និងក្រុមតាលីបង់បានទទួលជ័យជម្នះជាបន្តបន្ទាប់បណ្តាលឲ្យមានសម្ពាធកាន់តែធ្ងន់លើកម្មវិធីផ្តល់ជំនួយរបស់អង្គការសហប្រជាជាតិ។
អគ្គលេខាធិការអង្គការសហប្រជាជាតិលោក Antonio Guterres និយាយថា អង្គការកំពុងជួបវិបតិ្តហិរញ្ញវត្ថុ “ បច្ចុប្បន្នអង្គការសហប្រជាជាតិមិនអាចសូម្បីតែបើកប្រាក់ខែឲ្យបុគ្គលិកខ្លួនឯង” ។
សន្និសីទទីក្រុងហ្សឺណែវដែលនឹងចាប់ផ្តើមនៅរសៀលថ្ងៃច័ន្ទនេះ មានការចូលរួមពីមន្ត្រីកំពូលៗ របស់អង្គការសហប្រជាជាតិ រួមទាំងលោក Guterres និងប្រធានគណៈកម្មាធិការអន្តរជាតិកាកបាទក្រហមលោក Peter Maurer ព្រមទាំងតំណាងរដ្ឋាភិបាលរាប់សិបនាក់ រួមទាំងរដ្ឋមន្ត្រីការបរទេសអាល្លឺម៉ង់ លោក Heiko Maas ផងដែរ។
ទឹកប្រាក់ប្រហែលមួយភាគបីនៃទឹកប្រាក់ចំនួន ៦០៦ លានដុល្លារសហរដ្ឋអាមេរិក នឹងត្រូវបានប្រើប្រាស់ដោយកម្មវិធីស្បៀងអាហារពិភពលោករបស់អង្គការសហប្រជាជាតិដែលបានរកឃើញថា ប្រមាណ ៩៣% នៃប្រជាជនអាហ្វហ្គានីស្ថានចំនួន ១.៦០០ នាក់ដែលបានស្ទង់មតិនៅខែសីហា និងកញ្ញាមិនមានអាហារគ្រប់គ្រាន់ទេ ដែលភាគច្រើនដោយសារតែពួកគេមិនអាចរកប្រាក់បានសម្រាប់ថ្លៃអាហារ។
លោកស្រី Anthea Webb អនុប្រធានប្រចាំតំបន់របស់អង្គការស្បៀងអាហារពិភពលោកបានមានប្រសាសន៍ថា “នាពេលបច្ចុប្បន្ននេះ យើងកំពុងធ្វើការប្រកួតប្រជែងជាមួយពេលវេលា និងការងារជា ច្រើនដើម្បីផ្តល់ជំនួយសង្គ្រោះជីវិតដល់ប្រជាជនអាហ្វហ្គានីស្ថានដែលត្រូវការបំផុត។ យើងពិតជាសុំអង្វរ និងខ្ចីប្រាក់ដើម្បីបង្ការកុំឲ្យម្ហូបអាហារអស់ពីឃ្លាំង” ។
