សម្ដេចតេជោហ៊ុន សែន នឹងអញ្ជើញ ជាអធិបតីសម្ពោធ ស្ពានស្ទឹងត្រង់ នាថ្ងៃទី២២ខែវិច្ឆិកា
កំពង់ចាម៖ នាថ្ងៃទី១០ខែវិច្ឆិកា យោងតាមសេចក្តីជូនដំណឹងរបស់រដ្ឋបាលខេត្តកំពង់ចាមបានបង្ហាញថា គម្រោងស្ពានឆ្លងទន្លេភ្ជាប់ស្រុកស្ទឹងត្រង់ខេត្តកំពង់ចាមនិងស្រុកក្រូចឆ្មារខេត្តត្បូងឃ្មុំដែលជាជំនួយសាងសង់ដោយរដ្ឋាភិបាលចិន ត្រូវបានបញ្ចប់រួចរាល់។
សម្ដេចតេជោនាយករដ្ឋមន្រ្តី ហ៊ុន សែន នឹងអញ្ជើញជាអធិបតីក្នុងពិធីបើកសម្ពោធស្ពានខាងលើនាថ្ងៃទី២២ខែវិច្ឆិកាខាងមុខនេះ។ នេះគឺជាស្ពានទី៨ដែលជាជំនួយរបស់ភាគីចិនជូនចំពោះភាគីកម្ពុជា។
នៅព្រឹកថ្ងៃសុក្រ, ទី១២ វិច្ឆកា ២០២១ លោកឯម កុសល ស្នងការនគរបាលខេត្តកំពង់ចាម អមដំណើរឯកឧត្តម អ៊ុន ចាន់ដា អភិបាលខេត្តកំពង់ចាម អញ្ជើញចូលរួមក្នុងការចុះត្រួតពិនិត្យទីតាំង និងចូលរួមកិច្ចប្រជុំត្រួតពិនិត្យផែនការ ការពារ សន្តិសុខ ថែរក្សាសុវត្ថិភាព សណ្ដាប់ធ្នាប់ ក្នុងពិធីសម្ភោធដាក់ឲ្យប្រេីប្រាស់ ស្ពានមិត្តភាព កម្ពុជា-ចិន ស្ទឹងត្រង់-ក្រូចឆ្មារ ស្ថិតនៅក្នុងភូមិបឹងដែង ឃុំព្រែកកក់ ស្រុកស្ទឹងត្រង់ ដែលប្រព្រឹត្តទៅក្រោមអធិបតីភាពដ៍ខ្ពង់ខ្ពស់រសប់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាពេលឆាប់ៗខាងមុខនេះ ។
កិច្ចប្រជុំ និងការចុះត្រួតពិនិត្យនេះ ដឹកនាំដោយ ឯកឧត្តម យូ ស៊ុនឡុង រដ្ឋមន្ត្រីប្រតិភូអមដំណើរនាយករដ្ឋមន្រ្តី ឯកឧត្តម រដ្ឋមន្ត្រីអមដំណើរ ឯកឧត្តម រដ្ឋលេខាធិការក្រសួងពាក់ព័ន្ធ ឯកឧត្តម អភិបាល-អភិបាលរងខេត្តកំពង់ចាម-ត្បូងឃ្មុំ ឯកឧត្ដម នាយកដ្ឋានពាក់ព័ន្ធមួយចំនួនផ្សេងទៀត កងកម្លាំងប្រដាប់អាវុធទាំងបី និងមន្រ្តីរាជការពាក់ព័ន្ធជុំវិញស្រុក ផងដែរ ៕