ស្ថានទូតអូស្ត្រាលី បន្តកិច្ចសហការជាមួយ គណៈកម្មាធិការសិទ្ធិមនុស្សកម្ពុជា គាំទ្រចំពោះការរៀបចំ សេចក្ដីព្រាងច្បាប់ បង្កើតស្ថាប័នសិទ្ធិមនុស្សជាតិ
ភ្នំពេញ ៖ នៅព្រឹកថ្ងៃចន្ទទី២២ ខែវិច្ឆិកា ឆ្នាំ២០២១ ឯកឧត្តម កែវ រ៉េមី រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានគណៈកម្មាធិការសិទ្ធិមនុស្សកម្ពុជា(គ.ស.ម.ក.) បានអញ្ជើញទទួលជួបជាមួយ ឯកឧត្តម Pablo Kang ឯកអគ្គរាជទូតអូស្រ្តាលីប្រចាំកម្ពុជា ដើម្បីពិភាក្សាការងារពាក់ព័ន្ធនឹងបច្ចុប្បន្នភាពនៃសិទ្ធិមនុស្សមួយចំនួន។
កិច្ចជំនួបក៏បានលើកឡើង អំពីសេចក្តីព្រាងច្បាប់ស្តីពីការបង្កើត គណៈកម្មាធិការជាតិសិទ្ធិមនុស្ស ដែលបច្ចុប្បន្ន គ.ស.ម.ក. បានរៀបចំនូវសេចក្តីព្រាងច្បាប់ដំបូង និងបានដាក់ដំណើរការឱ្យសាធារណជនផ្តល់មតិ និងរៀបចំដាក់ឱ្យមានកិច្ចពិភាក្សា ពីគ្រប់ភាគីពាក់ព័ន្ធជាបន្តបន្ទាប់។ ភាគីស្ថានទូតអូស្ត្រាលី នៅតែបន្តការគាំទ្រក្នុងការបង្កើតច្បាប់នេះ ដោយពិចារណាពិនិត្យលទ្ធភាព សម្របសម្រួល ឱ្យក្រុមការងារវេទិកាអាស៊ីប៉ាស៊ីហ្វិក (APF) បានមកជួបពិភាក្សាដោយផ្ទាល់ ជាមួយ គ.ស.ម.ក. ពាក់ព័ន្ធនឹងការបង្កើតច្បាប់ខាងលើ។
ឯកឧត្តមឯកអគ្គរាជទូត ក៏បានលើកឡើងពីបញ្ហានយោបាយ សិទ្ធិមនុស្ស និងដំណើរការឆ្ពោះទៅកាន់ការបោះឆ្នាត។
ស្ថានទូតអូស្ត្រាលីនៅតែបន្តកិច្ចសហការជាមួយគ.ស.ម.ក ជាពិសេសការគាំទ្រចំពោះការរៀបចំ សេចក្ដីព្រាងច្បាប់បង្កើតស្ថាប័នសិទ្ធិមនុស្សជាតិ៕
