ដុតទៀនមិនប្រុងប្រយ័ត្ន បង្កជាអគ្គិភ័យ ឆាបឆេះអស់ផ្ទះចំនួន ១២ខ្នង នៅខណ្ឌឫស្សីកែវ

ភ្នំពេញ៖ ដុតទៀន មិនប្រយ័ត្នបង្កជាគ្រោះអគ្គិភ័យមួយបាន បំផ្លាញអស់ខ្ទមស្នាក់នៅអនាធិបតេយ្យ ចំនួន១២ខ្ទម និងរាលដល់ផ្ទះសមាគមន៍តំបាញ ចំនួន០១ខ្នង នៅវេលាម៉ោង ១១និង៣៥នាទី ថ្ងៃទី០៥ ខែធ្នូ ឆ្នាំ២០២១ ស្ថិតនៅចំណុចផ្លូវ ជាតិលេខ៥ ភូមិ៥ ក្រុម៤ សង្កាត់ច្រាំងចំរេះទី១ ខណ្ឌឫស្សីកែវ រាជធានីភ្នំពេញ ។

លោកវរសេនីយ៍ឯក ហ៊ាង ថារ៉េត អធិការខណ្ឌប្ញស្សីកែវ បានប្រាប់ឲ្យដឹងថា ម្ចាស់ទីតាំងបង្ករ គឺជាសំណង់ខ្ទមមិនរៀបរយចំនួន ១២ខ្នង ហេីយបានរាលដាលដល់ ផ្ទះអ្នកជិតខាងមានឈ្មោះ ចាន់ សារីម ភេទស្រី អាយុ ៦១ឆ្នាំ មុខរបរ គ្រូតំប្បាញ ចំពោះមូលហេតុ នៃការឆាបឆេះ បណ្តាលមកពីការដុតទៀនបង្កជាអគ្គិភ័យ។

ក្នុងហេតុការណ៍គ្រោះអគ្គិភ័យខាងលេីនេះ បណ្តាលឲ្យឆាបឆេះរាលដាល ដល់ផ្ទះសិប្បកម្មសូត្រតម្បាញ និងហូល សង់ពីឈេីលេីថ្មក្រោម ទំហំ (២០ម៉ែត្រ x ២០ម៉ែត្រ ) ខូចខាតកុំព្យូទ័រចំនួន ៣គ្រឿង, ទូរទឹកកកចំនួន ១គ្រឿង, លុយខ្មែរចំនួន ២លានរៀល និងលុយដុល្លារចំនួន ១០០០ដុល្លារ អស់ទាំងស្រុង។

សម្រាប់ប្រតិបត្តិការសង្គ្រោះវិញ កម្លាំងជំនាញរបស់យេីងបាន ប្រើប្រាស់រថយន្ដការិយាល័យបង្ការ និងពន្លត់អគ្គិភ័យ ប្រើប្រាស់រថយន្តពន្លត់អគ្គីភ័យ អស់ចំនួន ១៤គ្រឿង ប្រើប្រាស់ទឹកអស់២៨ឡាន ស្មើនិង១៥២គីប។ និងរថយន្តពន្លត់អគ្គិភ័យរបស់ សាលាខណ្ឌឫស្សីកែវ ចំនួន ១គ្រឿង ប្រេីប្រាស់ទឹកអស់ ២ឡាន ស្មេីនឹង ៨ម៉ែត្រូគីប ទើបរលត់ទាំងស្រុង នៅវេលាម៉ោង ៨និង៣០នាទី នាថ្ងៃដដែរ៕