ប្រធានាធិបតីអ៊ុយក្រែនថា កងកម្លាំងប្រដាប់អាវុធ របស់លោក មានសមត្ថភាព ទប់ទល់នឹងការ វាយប្រហារណាមួយរបស់រុស្ស៊ី
ទីក្រុង KYIV ៖ កាលពីថ្ងៃចន្ទ ប្រធានាធិបតីអ៊ុយក្រែនលោក Volodymyr Zelenskiy បាននិយាយថា កងកម្លាំងប្រដាប់អាវុធរបស់លោក មានសមត្ថភាពទប់ទល់នឹងការវាយប្រហារណាមួយរបស់រុស្ស៊ី ខណៈដែលប្រទេសអ៊ុយក្រែនបានប្រារព្ធទិវាកងទ័ពជាតិរបស់ខ្លួន ជាមួយនឹងការបង្អួតរថពាសដែក និងនាវាល្បាតរបស់សហរដ្ឋអាមេរិកជាច្រើនគ្រឿង។
នៅថ្ងៃអង្គារិ៍នេះ ប្រធានាធិបតីសហរដ្ឋអាមេរិកលោក Joe Biden បានសន្យាការ “គាំទ្រដោយឥតងាករេ” ចំពោះអ៊ុយក្រែនក្នុងការប្រឈមមុខជាមួយទីក្រុងម៉ូស្គូ ហើយនឹងបើកកិច្ចពិភាក្សាជាមួយប្រធានាធិបតីរុស្ស៊ីលោក Vladimir Putin ដើម្បីព្យាយាមបន្ធូរបន្ថយវិបត្តិនេះ។ កាលពីថ្ងៃច័ន្ទ ប្រធានាធិតីលោក Zelenskiy បានពិភាក្សាជាមួយរដ្ឋមន្ត្រីក្រសួងការបរទេសសហរដ្ឋអាមេរិកលោក Antony Blinken។
ប្រទេសអ៊ុយក្រែនបានចោទប្រកាន់រុស្ស៊ីពីការប្រមូលផ្តុំកងទ័ពរាប់ម៉ឺននាក់នៅក្បែរព្រំដែនរបស់ខ្លួន ដើម្បីរៀបចំការវាយលុកយោធាទ្រង់ទ្រាយធំដែលអាចកើតឡើង ដោយបង្កើនលទ្ធភាពនៃសង្គ្រាមដោយបើកចំហរវាងប្រទេសជិតខាងទាំងពីរនេះ។
នៅក្នុងសេចក្តីថ្លែងការណ៍មួយ ប្រធានាធិបតីលោក Zelenskiy បាននិយាយថា “ទាហាននៃកងកម្លាំងប្រដាប់អាវុធអ៊ុយក្រែនបន្តបំពេញបេសកកម្មដ៏សំខាន់បំផុត ដើម្បីការពារសេរីភាព និងអធិបតេយ្យភាពរបស់ប្រទេសពីការឈ្លានពានរបស់ប្រទេសរុស្ស៊ី”។
លោកបាននិយាយបន្ថែមទៀតថា “កងទ័ពអ៊ុយក្រែនមានការជឿជាក់លើភាពរឹងមាំរបស់ខ្លួន និងអាចរារាំងផែនការឈ្លានពានណាមួយរបស់សត្រូវបាន” ៕
