អាជ្ញាធរខេត្តកំពង់ចាម គ្រោងនឹង បង្កើតក្រុមការងារមួយ ដើម្បីសាកល្បងលើការសិក្សា អំពីស្ថានភាពប្រជាជន ដែលរងគ្រោះដោយការបាក់ច្រាំងទន្លេ
កំពង់ចាម ៖ អភិបាល នៃគណៈអភិបាលខេត្តកំពង់ចាម លោក គួច ចំរើន និងលោកស្រីអមដំណើរដោយប្រធានមន្ទីរ មន្ត្រីជំនាញពាក់ព័ន្ធ កាលពីព្រឹកថ្ងៃទី៦ ខែកញ្ញា ឆ្នាំ២០១៨ បានអញ្ជើញចុះពិនិត្យការបាក់ច្រាំងទន្លេ និងដឹកនាំកម្លាំងសមត្ថកិច្ច ចុះជួយរុះរើ ផ្ទះពលរដ្ឋរងគ្រោះ នៅភូមិទី៩ ឃុំអង្គរបាន និងភូមិបឹងសាងលិច ឃុំសូគង ស្រុកកងមាស ខេត្តកំពង់ចាម និងបានរកដំណោះស្រាយ ជូនប្រជាពលរដ្ឋ ដែលទទួលការគំរាមកំហែង ដោយការបាក់ច្រាំងទន្លេ បណ្ដាលឲ្យប៉ះពាល់ដល់លំនៅដ្ឋានរបស់ពួកគាត់ផងដែរ។
បន្ទាប់ពីចុះពិនិត្យការបាក់ច្រាំងទន្លេ នៅភូមិទី៩ ឃុំអង្គរបាន លោកអភិបាលខេត្ត និងក្រុមការងារ បានចុះលុយទឹកទៅជួយរុះរើផ្ទះបងប្អូនប្រជាពលរដ្ឋ នៅភូមិបឹងសាងលិច ដែលកំពុងទទួលរងនូវការគំរាមកំហែងដោយការបាក់ស្រុតដីច្រាំងទន្លេជាបន្តបន្ទាប់ ព្រមទាំងបាននាំយកអំណោយមនុស្សធម៌កាកបាទក្រហមកម្ពុជា ទៅចែកជូនដល់ពលរដ្ឋរងគ្រោះទាំង២៣គ្រួសារផងដែរ ។
ក្នុងឱកាសនោះ លោក គួច ចំរើន បានផ្តួចផ្តើម បង្កើតក្រុមការងារមួយ ដើម្បីសាកល្បងសិក្សា អំពីស្ថានភាពប្រជាជន ដែលរងដោយការបាក់ច្រាំងទន្លេ។លោកអភិបាលបានមានប្រសាសន៍ថា រៀងរាល់ឆ្នាំ នៅខេត្តកំពង់ចាមតែងតែ មានប្រជាជន រងគ្រោះដោយការបាក់ច្រាំងទន្លេ ធ្វើឲ្យប៉ះពាល់ដល់លំនៅដ្ឋានរបស់ពួកគាត់ ហើយរុះរើទៅកាន់ទីលំនៅថ្មី មានប្រជាជនខ្លះមិនបានដឹងមុន បាក់ច្រាំងស្រុតផ្ទះចូលទន្លេបាត់ក៍មាន។
លោកបន្តថា ចំពោះគ្រួសារដែលបានរុះរើ ចាប់ផ្ដើមកសាងលំនៅឋានឡើងវិញ ទៅតាមស្ថានភាពជាក់ស្ដែងរបស់គ្រួសារនីមួយៗ ខ្លះទៅជិត ខ្លះទៅឆ្ងាយ ខ្លះចាកចោលស្រុក ទៅតាមលទ្ធភាពរៀងៗខ្លួន។ ក្រុមការងារនេះ សាកល្បងប្រមូលផ្ដុំគិតរកវិធីដើម្បីជួយពួកគាត់ ក្នុងការស្ដារស្ថានភាពឡើងវិញ ទៅតាមលទ្ធភាព សមត្ថភាព ដែលអាចធ្វើទៅបាន ៕