អគ្គស្នងការនគរបាលជាតិ និងអគ្គនាយកអន្តោប្រវេសន៍ ដឹកនាំកិច្ចប្រជុំ ដកពិសោធការងារ គ្រប់គ្រងវត្តមានជនបរទេស
ភ្នំពេញ៖ នារសៀលថ្ងៃអង្គារ៍ ទី៨ ខែកុម្ភៈ ឆ្នាំ២០២២ លោកនាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ អញ្ជើញចូលរួមកិច្ចប្រជុំដកពិសោធការងារគ្រប់គ្រងវត្តមានជនបរទេស ក្នុងព្រះរាជាណាចក្រកម្ពុជា ក្រោមអធិបតីភាពលោក នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិនៅអគ្គនាយកដ្ឋានអន្តោប្រវេសន៍ ។
បន្ទាប់ពីបានទទួលស្ដាប់នូវរបាយការណ៍ បទបង្ហាញ និងបទរាយការណ៍ របស់លោក ឧត្តមសេនីយ៍ឯក អគ្គនាយករង និងប្រធាននាយកដ្ឋានរួចមក លោក នាយឧត្តមសេនីយ៍ គៀត ច័ន្ទថារិទ្ធ អគ្គនាយកដ្ឋានអន្តោប្រវេសន៍ បានមានប្រសាសន៍ពីគោលបំណងពីកិច្ចប្រជុំថ្ងៃនេះគឺដេីម្បីឲ្យតាមបណ្ដាលស្នងការដ្ឋាននគរបាលរាជធានី ខេត្តយល់ច្បាស់ពីការប្រេីប្រាស់ប្រព័ន្ធគ្រប់គ្រងវត្តមានជនបរទេស FPCS ជាពិសេសការបញ្ចូលទិន្នន័យរបស់ជនបរទេសនៅក្នុងមូលដ្ឋានរបស់ខ្លួន ។
លោក នាយឧត្តមសេនីយ៍សន្តិបណ្ឌិតនេត សាវឿនបានកោតសរសើរចំពោះលោក នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍និងមន្ត្រីជំនាញដែលបានរៀបចំកម្មវិធីបែបទំនើបកម្មមួយសំរាប់ការងារគ្រប់គ្រងជនបរទេស ដែលជាបច្ចេកទេសមួយល្អប្រសើរ។
លោកបញ្ជាក់ថាចំពោះប្រព័ន្ធគ្រប់គ្រងវត្តមានជនបរទេសក្នុងព្រះរាជណាចក្រកម្ពុជា(FPCS) មានការពាក់ព័ន្ធចំនួន២ចំនុចទី១គឺការអប់រំនិងផ្សព្វ ផ្សាយបន្តទៀតចំពោះម្ចាស់គោលដៅរ គិតទាំងអាជីវកម្ម និងការស្នាក់នៅរបស់ជនបរទេស ដែលត្រូវគៀងគរអោយអ្នកទាំងអស់នោះចូលរួមដើម្បីអនុវត្តជាពិសេសគឺការស្ម័គ្រចិត្តបំពេញ ក្នុងលក្ខខណ្ឌរបស់មន្ត្រី ។
ក្នុងនោះដែរលោកនាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ បានបញ្ជាក់ថា កិច្ចការនេះជាកិច្ចការរបស់ស្នងការរាជធានី ខេត្តដែលមានមន្ត្រីជំនាញឯកទេស ស្នងការរងទទួលបន្ទុកអន្តោប្រវេសន៍ មាននាយការិយាល័យ និងអធិការរងគ្រប់គ្រងជនបរទេស នៅខណ្ឌ ស្រុក ក្រុង សម្រាប់អនុវត្ត លោក សន្តិបណ្ឌិត ក៏បានជំរុញឲ្យស្នងការនគរបាលរាជធានីខេត្តទាំង២៥ ត្រូវចាប់ផ្តើមអនុវត្តចាប់ពីពេលនេះដើម្បីឲ្យនាយរងប៉ុស្តិ៍បានទទួលភារកិច្ចនេះ ទាំងការបង្រៀនបច្ចេកទេស ដើម្បីធ្វើការងារនេះដែលមានអ្នកទទួលបន្ទុក ។
លោកអគ្គស្នងការនគរបាលជាតិ បានមានប្រសាសន៍បន្ថែមអោយដឹងថា បទពិសោធក្នុងការគ្របគ្រងកិច្ចការសន្តិសុខ សណ្តាប់ធ្នាប់សង្គមក្នុងប្រទេសមួយទៅបានអាស្រ័យទៅលើការគ្រប់គ្រងលើបញ្ហាមួយចំនួនដែល ទី១ការគ្របគ្រងមនុស្សបានល្អគឺជាដើមចមនៃសន្តិសុខជាតិ ទី២គ្រប់គ្រងមធ្យោបាយយាន្តយន្តធ្វើដំណើរ ទី៣ការគ្រប់គ្រងមុខរបរនិងទី៤គឺកាគ្រប់គ្រងប្រព័ន្ធបច្ចេកវិទ្យាសង្គម។ លោក នាយឧត្តមសេនីយ៍ សន្តិបណ្ឌិត នេត សាវឿន បានបន្តថា កិច្ចការគ្រប់គ្រងអន្តោប្រវេសន៍ គឺជាកិច្ចការមួយផ្នែកដែលគ្រប់គ្រងមនុស្សក្នុងនោះមានពលរដ្ឋ និងជនបរទេស។ ឯកឧត្តម បញ្ជាក់ថា បញ្ហាប្រឈមក្នុងការងារគ្រប់គ្រងជនបរទេសនៅក្នុងព្រះរាជាណាចក្រកម្ពុជា មាន៤សំខាន់ ក្នុងនោះប្រឈមទី១គឺអ្នកដឹកនាំតាមថ្នាក់ខ្វះការទទួលខុសត្រូវ ខ្វះការយកចិត្តទុកដាក់ ដូច្នេះក្រោយទទួលបានអនុសាសន៍ណែនាំស្នងការនគរបាលទាំង២៥រាជធានី ខេត្ត ត្រូវតែទទួលអនុវត្ត និងបែងចែកភារកិច្ចបន្តដើម្បីយកទៅអនុវត្ត។ រីឯបញ្ហាប្រឈមទី២គឺ មន្ត្រីជំនាញឯកទេសប្រើប្រាស់ប្រូក្រាម ឧបករណ៍ទំនើបដែលទាមទារអោយអ្នកប្រាស់ចាំបាច់ទំនើបដែរ ដែលចាំបាច់ត្រូវទទួលការហ្វឹកហាត់បន្ថែមចំនុចដែលខ្វះខាត។ ចំណុចទី៣ ជនបរទេសដែលមានគំនិតមិនស្មោះត្រង់ដែលអាជ្ញាធរចាំបាច់ត្រូវធ្វើការអប់រំហើយបើមិនស្តាប់ ត្រូវចាត់វិធានការរដ្ឋបាល និងផាកពិន័យ បើនៅតែមិនស្តាប់ទៀតត្រូវចងក្រងឯកសាទៅតាមច្បាប់។ លោក បានបញ្ជាក់ថា ប្រឈមទី៤ គឺពាក់ព័ន្ធទៅនឹងអាជ្ញាធរមានសមត្ថកិច្ចដែលឃុបឃិតជាមួយគោលដៅ ជាមួយទីតាំងដែលជនបរទេសប្រព្រឹត្តបទល្មើសប្រឈម បើរកឃើញមានបែបនេះគឺអនុវត្តតាមច្បាប់។
បើតាមរបាយការណ៍ស្តីពីលទ្ធផល នៃការងារគ្រប់គ្រងវត្តមានជនបរទេស ក្នុងព្រះរាជាណាចក្រកម្ពុជា បានអោយដឹងថា ក្រោយពីទទួលបានការបណ្តុះបណ្តាលរួចហើយ ស្នងការនគរបាលរាជធានីខេត្តទាំងអស់បានស្នើសុំមកអគ្គនាយកដ្ឋានអន្តោប្រវេសន៍ ដើម្បីបង្កើតគណនីជូនមន្ត្រីជំនាញ និងមន្ត្រីនគរបាលនៅតាមប៉ុស្តិ៍រដ្ឋបាលឃុំ សង្កាត់ សរុបចំនួន ៤១០០ករណី ដើម្បីប្រើប្រាស់ក្នុងការតាមដានគ្រប់គ្រងជនបរទេសនៅក្នុងមូលដ្ឋានរបស់ខ្លួន។ ជាមួយគ្នានោះមន្ត្រីនគរបាលបានចុះធ្វើការផ្សព្វផ្សាយ និងណែនាំដល់ម្ចាស់ទីតាំងលំនៅដ្ឋាន ដែលមានជនបរទេសស្នាក់នៅ អោយចុះឈ្មោះបង្កើតគណនី ដើម្បីរាយការណ៍ពីវត្តមានជនបរទេសស្នាក់នៅទីតាំងរបស់ខ្លួន។ ជាលទ្ធផលមកដល់ខែមករា ឆ្នាំ២០២២នេះ មានម្ចាស់អ្នកកាន់កាប់លំនៅដ្ឋានបានស្នើបង្កើតគណនីសរុបចំនួន៧១,៩៥៥គណនី ហើយបានរាយការណ៍ពីវត្តមានជនបរទេសក្នុងប្រព័ន្ធសរុបចំនួន៣៨ម៉ឺន២ពាន់៨៣១នាក់៕
