ឧបនាយករដ្ឋមន្រ្តី កែ គឹមយ៉ាន ណែនាំចំនួន ៦ចំណុច ដល់គ្រប់ក្រសួង ស្ថាប័ន និងសមត្ថកិច្ច ដេីម្បីបំពេញការខ្វះខាត បញ្ហាប្រឈម ផលវិបាក និងសំណូមពរ
ភ្នំពេញ: ឯកឧត្តម ឧបនាយករដ្ឋមន្រ្តី កែ គឹមយ៉ាន បានថ្លែងអំណរគុណ និងកោតសរសើរចំពោះការចូលរួម និងបទអន្តរាគមន៍នានាពាក់ព័ន្ធទៅនឹងសមិទ្ធិផលរបស់ក្រសួង ស្ថាប័ន និងសមត្ថកិច្ច ពាក់ព័ន្ធសម្រេចបានព្រមទាំងរកឃេីញនូវបញ្ហាប្រឈម ផលវិបាក និងសំណូមពរដើម្បីដាក់ជូនអង្គ សន្និបាតជួយពិនិត្យ ផ្តល់យោបល់ និងដោះស្រាយ។
ជាការឆ្លេីយតបនឹងបញ្ហាប្រឈម ខ្វះខាត ផលវិបាក និងសំណូមពរ ឯកឧត្តម ឧបនាយករដ្ឋមន្រ្តី កែ គឹមយ៉ាន បានដាក់ការណែនាំដល់គ្រប់ក្រសួង-ស្ថាប័ន អង្គភាពពាក់ព័ន្ធនៅថ្នាក់ជាតិ និងថ្នាក់ក្រោមជាតិ ដេីម្បីពង្រឹងប្រសិទ្ធភាពដូចខាងក្រោម ៖
ទី១.អាជ្ញាធរថ្នាក់ក្រោមជាតិ ត្រូវបន្តពង្រឹងយន្តការត្រួតពិនិត្យគ្រឿងញៀន ដែលមានស្រាប់នៅតាមមូលដ្ឋាន រាជធានី/ខេត្ត ស្រុក/ក្រុង ឃុំ/សង្កាត់ ភូមិ និងត្រូវម្ចាស់ការក្នុងការទទួលខុសត្រូវដោះស្រាយបញ្ហាគ្រឿងញៀន នៅតាមមូលដ្ឋានរបស់ខ្លួន ស្របតាមខ្លឹមសារ នៃបទបញ្ជា០១បប ស្តីពីការពង្រឹងវិធានការប្រយុទ្ធប្រឆាំងគ្រឿងញៀន និងយុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់រាជរដ្ឋាភិបាល។ ជាមួយនេះ ត្រូវបន្តរៀបចំ និងពង្រឹងយន្តការភូមិ ឃុំ សង្កាត់ ស គ្មានគ្រឿងញៀន នៅតាមមូលដ្ឋានរបស់ខ្លួនជាពិសេសខេត្តជាប់ព្រំដែន ។
ទី២.ត្រូវបន្តលើកកម្ពស់ការយល់ដឹងជាសាធារណៈពីបញ្ហាគ្រោះថ្នាក់ដែលបណ្តាលមកពីគ្រឿងញៀន ឱ្យកាន់តែមានប្រសិទ្ធភាពបន្ថែមទៀតតាមគ្រប់រូបភាព គ្រប់ទីកន្លែង និងបន្តយកចិត្តទុកដាក់ធ្វើការផ្សព្វផ្សាយអប់រំអំពីច្បាប់ស្តីពីការត្រួតពិនិត្យគ្រឿងញៀន រួមទាំងការអំពាវនាវដល់តួអង្គពាក់ព័ន្ធទាំងអស់ឲ្យចូលរួមសកម្មភាពក្នុងយុទ្ធនាការប្រយុទ្ធប្រឆាំងគ្រឿងញៀនខុសច្បាប់ សំដៅកាត់បន្ថយបទល្មើសគ្រឿងញៀន ការពារសុខុមាលភាព និងសុវត្ថិភាពសង្គម ឲ្យបានជ្រួតជ្រាបគ្រប់ទីកន្លែង ដោយប្រើប្រាស់គ្រប់មធ្យោបាយ គ្រប់រូបភាព ចំគោលដៅ និងមុខសញ្ញា ព្រមទាំង មានវិធីសាស្ត្រសមស្របក្នុងការផ្សព្វផ្សាយអប់រំ (ងាយស្តាប់ ងាយយល់ និងងាយទទួលយកបាន។
ទី៣.ត្រូវបន្តពង្រឹងដំណើរការ និងការគ្រប់គ្រងមជ្ឈមណ្ឌលជាតិ ព្យាបាល និងស្តារនីតិសម្បទា អ្នកញៀនគ្រឿងញៀនដោយស្ម័គ្រចិត្ត និងផ្អែកលើសហគមន៍ នៅខេត្តព្រះសីហនុ និងបន្តពង្រឹងយន្តការព្យាបាល សេវាព្យាបាល និងស្តារនីតិសម្បទាអ្នកញៀនគ្រឿងញៀន ដែលមានស្រាប់ឲ្យមានប្រសិទ្ធភាព ។ ត្រូវកំណត់តួនាទីការទទួលខុសត្រូវ និងយន្តការគ្រប់គ្រងរបស់មណ្ឌលព្យាបាលបណ្តោះអាសន្នរបស់រដ្ឋ និងឯកជនឲ្យបានច្បាស់លាស់ ជៀសវាងមានការជាន់គ្នាជាមួយ និងមជ្ឈមណ្ឌលជាតិ ព្យាបាល និងស្តារនីតិសម្បទាអ្នកញៀនគ្រឿងញៀនដោយស្ម័គ្រចិត្ត និងផ្អែកលើសហគមន៍ នៅខេត្តព្រះសីហនុ ព្រមទាំងពិនិត្យ និងវាយតម្លៃនូវលក្ខខណ្ឌអ្នកញៀនគ្រឿងញៀនទាំងឡាយណា ដែលមានសភាពធ្ងន់ធ្ងរ ចាំបាច់ត្រូវបញ្ជូនទៅព្យាបាល និងស្តារនីតិសម្បទា នៅមជ្ឈមណ្ឌលជាតិ ខេត្តព្រះសីហនុ ។
ទី៤.ត្រូវបន្តពង្រឹងសម្ថភាពការងារបស់ខ្លួន ក្នុងការប្រយុទ្ធប្រឆាំងគ្រឿងញៀន ជាពិសេសការងារត្រួតពិនិត្យសារធាតុគីមីផ្សំគ្រឿងញៀន ការងារបង្ក្រាបបទល្មើសគ្រឿងញៀនឆ្លងដែន ការដាំដុះ ការផលិត និងការប្រើប្រាស់គ្រឿងញៀន។ ការពង្រឹងនូវការអនុវត្តវិធានការរដ្ឋបាល ចំពោះសណ្ឋាគារ ផ្ទះសំណាក់ កន្លែងសប្បាយដ្ឋាន និងការពន្លឿននីតិវិធី នៃការរឹបអូសទ្រព្យសម្បត្តិ ដែលបានមកពីបទល្មើសគ្រឿងញៀន ។
ទី៥.បន្តពង្រឹងកិច្ចសហប្រតិបត្តិការអន្តរជាតិ ទ្វេភាគី ត្រីភាគី ជាមួយប្រទេសជាប់ព្រំដែន ជាពិសេសព្រំដែនកម្ពុជា-ឡាវ តាមរយៈការអនុវត្តស្មារតីដែលបានព្រមព្រៀងគ្នា ស្តីពីការត្រួតពិនិត្យគ្រឿងញៀន និងការអនុវត្តយន្តការភូមិ ឃុំ/សង្កាត់ ស គ្មានគ្រឿងញៀននៅតំបន់ជាប់ព្រំដែន ។
ទី៦.អគ្គលេខាធិការដ្ឋាន នៃអាជ្ញាធរជាតិប្រយុទ្ធប្រឆាំងគ្រឿងញៀន ដឹកនាំ សម្របសម្រួល ការអនុវត្តការងារផ្សព្វផ្សាយ អប់រំ នៃយុទ្ធនាការប្រយុទ្ធប្រឆាំងគ្រឿងញៀនលើកទី៦ និងការងាររៀបចំបង្កើតភូមិ ឃុំ/សង្កាត់ ស គ្មានគ្រឿងញៀន នៅក្នុងក្របខណ្ឌទូទាំងប្រទេស ដោយយកយន្តការភូមិ ឃុំមានសុវត្ថិភាពដែលមានស្រាប់៕