ផ្ទុះឆេះការិយាល័យក្រុមហ៊ុនអ៊ិនធើណិត Opennet នៅខណ្ឌចំការមន
(ភ្នំពេញ)៖ អគ្គិភ័យបានឆាបឆេះក្នុងក្រុមហ៊ុនអ៊ិនធើណិត opennet ដែលស្ថិតនៅតាមបណ្ដោយផ្លូវលេខ ៣០៦ ក្នុងសង្កាត់បឹងកេងកង១ ខណ្ឌចំការមន រាជធានីភ្នំពេញ នាវេលាម៉ោង ១១ យប់ថ្ងៃទី ២៦ ខែកញ្ញាឆ្នាំ ២០១៨ ។ ជាមួយគ្នាក្រុមរថយន្តពន្លត់អគ្គិភ័យជាច្រើនគ្រឿង រួមទាំងកម្លាំងសមត្ថកិច្ចមូលដ្ឋាន បានចុះអន្តរាគមន៍ ភ្លាមៗនៅកន្លែងកើតហេតុ ។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឮសំឡេងផ្ទុះ នៅជិតរបងក្រុមហ៊ុន Opennet បង្កឲ្យមានអណ្តាតភ្លើងយ៉ាងខ្លាំងចាប់ឆេះ ហើយក៏បានឃើញកម្លាំងបង្ការ និងពន្លត់អគ្គិភ័យ បានចេញជួយសង្រ្គោះ រហូតដល់ម៉ោងជិត២រំលងអធ្រាត្រ ឈានចូលថ្ងៃទី២៧ ខែកញ្ញា ឆ្នាំ២០១៨ ទើបអគ្គិភ័យរលត់ទាំងស្រុង។
សមត្ថកិច្ចជំនាញនៅមិនទាន់អាចបញ្ជាក់ថា ចំពោះអគ្គិភ័យដែលឆាបឆេះចេញពីក្នុងកន្លែងក្រុមហ៊ុន openet ខាងលើនេះបណ្តាលមកពីមូលហេតុអ្វីនៅឡើយទេ ដោយ ពេលនេះ សមត្ថកិច្ចកំពុងតែធ្វើការស្រាវជ្រាវ និងធ្វើការបញ្ជាក់បន្ថែមទៀតផងដែរ ។
គួរបញ្ជាក់ផងដែរថា សមត្ថកិច្ចប្រើប្រាស់រថយន្តពន្លត់អគ្គិភ័យជាច្រើនគ្រឿង ជួយអន្តរាគមន៍បាញ់ពន្លត់ភ្លាមៗ ទើបអាចទប់ស្កាត់នៃការឆេះមិនឲ្យរាលដាលទៅផ្ទះផ្សេងទៀត។ ហេតុការណ៍នេះមិនបណ្តាលឲ្យមាននរណាម្នាក់រងរបួសឡើយ គឺគ្រាន់តែខូចខាតសម្ភារៈមួយចំនួនតែប៉ុណ្ណោះ៕
