មន្ត្រីស៊ើបអង្កេតជាន់ខ្ពស់ផ្នែកប្រឆាំងគ្រឿងញៀនកូរ៉េខាងត្បូង សំណូមពរឲ្យសមត្ថកិច្ចនៃមន្ទីរប្រឆាំងគ្រឿងញៀន ជួយបង្ក្រាប និងតាមចាប់ខ្លួនជនសង្ស័យជាជនជាតិកូរ៉េ នៅលើទឹកដីកម្ពុជា ដែលកំពុងប្រព្រឹត្តិបទល្មើស
ភ្នំពេញ ៖ លោកឧត្តមសេនីយ៍ទោ ឃឹង សារ៉ាត់ នាយកមន្ទីរប្រឆាំងគ្រឿងញៀន បានទទួលជួបពិភាក្សាការងារជាមួយ លោក គីម អ៊ិនស៊ុង (Kim Eunsung) មន្ត្រីស៊ើបអង្កេតជាន់ខ្ពស់ផ្នែកប្រឆាំងគ្រឿងញៀន និងជាតំណាងសមត្ថកិច្ចមកពីការិយាល័យស៊ើបអង្កេតបទល្មើសកូរ៉េខាងត្បូង (Korean International Police Agency) និងនគរបាលអន្តរជាតិ (Korea NCB) អមកុងស៊ុលស្ថានទូតសាធារណរដ្ឋកូរ៉េ ប្រចាំនៅកម្ពុជា នៅមន្ទីរប្រឆាំងបទល្មើសគ្រឿងញៀន នារសៀលថ្ងៃព្រហស្បតិ៍ ទី១៥ ខែធ្នូ ឆ្នាំ២០២២ ។
លោក គីម អ៊ិនស៊ុង (Kim Eunsung) បានថ្លែងអំណរគុណចំពោះកិច្ចសហប្រតិបត្តិការដ៏ល្អរវាងស្ថាប័នអនុវត្តច្បាប់នៃប្រទេសទាំងពីរ កម្ពុជា-កូរ៉េ និងបានកោតសរសើរនូវស្នាដៃមន្ត្រីអនុវត្តច្បាប់របស់មន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ ដែលរយៈពេលលកន្លងមកបានបង្ក្រាប និងចាប់ខ្លួនជនល្មើសជាជនជាតិកូរ៉េ ដែលមាននិវេទន៍ក្រហម និងបានបញ្ជូនខ្លួនទៅកាត់ទោសនៅប្រទេសកូរ៉េវិញ ។
ក្នុងឱកាសនោះ លោកមន្ត្រីស៊ើបអង្កេតជាន់ខ្ពស់ ផ្នែកប្រឆាំងគ្រឿងញៀន និងជាតំណាងសមត្ថកិច្ចមកពីការិយាល័យស៊ើបអង្កេតបទល្មើសកូរ៉េខាងត្បូង ក៏បានសំណូមពរសូមឲ្យសមត្ថកិច្ចនៃមន្ទីរប្រឆាំងគ្រឿងញៀន ជួយបង្ក្រាប និងតាមចាប់ខ្លួនជនសង្ស័យជាជនជាតិកូរ៉េ មួយចំនួនទៀតនៅលើទឹកដីកម្ពុជា ដែលកំពុងប្រព្រឹត្តិបទល្មើស ។
ជាការឆ្លើយតប លោកឧត្តមសេនីយ៍ទោ ឃឹង សារ៉ាត់ នាយកមន្ទីរប្រឆាំងគ្រឿងញៀន បានស្នើសុំសមត្ថកិច្ចកូរ៉េអោយធ្វើការផ្តល់នូវព័ត៌មានលម្អិត ដើម្បីងាយស្រួលក្នុងការរាយការណ៍ជូនថ្នាក់ដឹកនាំ និងស្នើសុំគោលការណ៍ស៊ើបអង្កេតបន្ត និងឈានទៅបង្ក្រាបចាប់ខ្លួនជនល្មើស។
ក្នុងឱកាសនោះដែរ លោកឧត្តមសេនីយ៍ទោ ឃឹង សារ៉ាត់ នាយកមន្ទីរប្រឆាំងគ្រឿងញៀន និងលោកឧត្តមសេនីយ៍ទោ អ៊ិន សុង នាយករងមន្ទីរប្រឆាំងគ្រឿងញៀន ក៏បានសម្តែងនូវក្តីរីករាយ និងស្វាគមន៍ជានិច្ចនូវកិច្ចសហការជាមួយសមត្ថកិច្ចមកពីការិយាល័យស៊ើបអង្កេតបទល្មើសកូរ៉េខាងត្បូង។
ក្នុងជំនួបពិភាក្សាគ្នានេះដែរ ភាគីទាំងពីរបានថ្លែងអំណរគុណគ្នាទៅវិញទៅមកចំពោះកិច្ចសហការល្អនាពេលកន្លងមក ក្នុងការប្រយុទ្ធប្រឆាំងបទល្មើសគ្រឿងញៀន និងបានប្តេជ្ញាបន្តពង្រឹងកិច្ចសហប្រតិបត្តិការរវាងសមត្ថកិច្ចប្រទេសទាំងពីរ សំដៅបង្ក្រាបឧក្រិដ្ឋជនគ្រឿងញៀនឲ្យបានដល់ប្ញសគល់ ៕
