អភិបាលរងរាជធានី ណែនាំមន្ត្រីចំណុះឲ្យរដ្ឋបាលរាជធានី ខិតខំបណ្ដុះបណ្ដាលការរៀនសូត្របន្ថែម

ភ្នំពេញ ៖ លោក កើត ឆែ អភិបាលរងរាជធានីភ្នំពេញតំណាងឲ្យលោក ឃួង ស្រេង អភិបាលនៃគណៈអភិបាលរាជធានីភ្នំពេញ បានធ្វើការណែនាំទៅដល់មន្ត្រីរដ្ឋបាលរាជធានីភ្នំពេញ មន្ត្រីរបស់ខណ្ឌទាំង១៤ ក៏ដូចជាមន្ត្រីសង្កាត់ទាំងអស់ ត្រូវតែខិតខំបណ្ដុះបណ្ដាលការរៀនសូត្របន្ថែម សំដៅធ្វើយ៉ាងណាឲ្យលទ្ធផលការងារ ទទួលបានជោគជ័យបន្ថែមទៀត។

ការជម្រុញបែបនេះ បានធ្វើឡើងនាព្រឹកថ្ងៃទី១៤ ខែសីហា ឆ្នាំ២០២៣នេះ ក្នុងវគ្គបណ្តុះបណ្តាលស្ដីពីការពង្រឹង និងអភិវឌ្ឍសមត្ថភាពដឹកនាំក្នុងអង្គភាព ប្រកបដោយសុខដុមនីយកម្ម នៅសាលារាជធានីភ្នំពេញ។

លោក កើត ឆែ បានមានប្រសាសន៍ថា មន្ត្រីរបស់យើងទាំងអស់ ត្រូវតែយកចិត្តទុកដាក់រៀនសូត្រ ដុសខាត់ចំណេះវិជ្ជា ឲ្យកាន់តែខ្លាំងឡើង ប្រៀបបាននឹងអាវុធអញ្ចឹងដែរ បើយើងមិនបានសម្លៀងដុសខាត់ទេ កាំបិតនោះ វានឹងមិនមុតស្រួចនោះដែរ។ ការងារនេះតម្រូវឲ្យយើងដុះខាត់រៀនសូត្ររាល់ថ្ងៃ ទើបការងាររបស់យើងកាន់តែល្អប្រសើរឡើង។

លោក កើត ឆែ បានបញ្ជាក់ផងដែរថា ទិន្នផលការងារ មិនអាចបានមក ដោយគ្មានការលះបង់នោះទេ ហើយការងារដែលទទួលបានជោគជ័យ គឺជាការងារដែលមានសុខដុមនីយកម្មជាមួយគ្នា ។

លោកបានបន្ថែម ក្នុងនាមជាថ្នាក់ដឹកនាំ ជាមេកើយរបស់គេ ត្រូវតែមានព្រហ្មវិហារធម៌ ចំពោះកូនចៅ មិនអាចបំផ្លិចបំផ្លាញកូនចៅរបស់ខ្លួននោះទេ។ លោកបានបញ្ជាក់ថា អំណាចគឺជាភ្លើង ប្រសិនបើយើងយកភ្លើងនេះទៅប្រើឲ្យខុសគោលដៅ នោះវានឹងបំផ្លិចបំផ្លាញគេហើយ ប៉ុន្តែបើយើងយកភ្លើងនេះទៅប្រើត្រឹមត្រូវគោលដៅ វានឹងធ្វើឲ្យថ្នាក់ក្រោមរបស់យើង មានភាពរីកចម្រើន ។ ប៉ុន្តែផ្ទុយទៅវិញ បើយើងយកភ្លើងនេះ ទៅបំភ្លេចបំផ្លាញគេ នោះគេនឹងរកគ្រប់មធ្យោបាយ ដើម្បីពន្លត់ភ្លើងនេះហើយ។

គួរបញ្ជាក់ថា វគ្គបណ្តុះបណ្តាលនេះ ធ្វើឡើងដោយមានការចូលរួមពីលោកគ្រូ ធម្មទានាចារ្យ ចាន់ សេរី ជំនួយការ សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា ពីនាយក នាយករងរដ្ឋបាល នាយក នាយិកាទីចាត់ការ-ប្រធានអង្គភាព នាយក-នាយករងដ្ឋបាលសាលាខណ្ឌ ទាំង១៤ ប្រធាន-អនុប្រធានការិយាល័យ សង្កាត់ ចៅសង្កាត់រង ។

នេះជាការអញ្ជើញជាគ្រូឧទ្ទេសលើកទីពីរហើយ បន្ទាប់ពីទីចាត់ការគ្រប់គ្រង ធនធានមនុស្សបានអញ្ជើញលោកគ្រូ ចូលរួមជាគ្រូឧទ្ទេស ក្នុងវគ្គតម្រង់ទិសស្តីពី «ការបណ្តុះផ្នត់គំនិតរបស់បុគ្គលិក ក្នុងការបំពេញការងារ» កាលពីថ្ងៃទី២៥ ខែកក្កដា ឆ្នាំ២០២២ ជូនដល់ក្រុមគោលដៅជាមន្ដ្រីរាជការ-មន្ត្រីជាប់កិច្ចសន្យា ចំនួន ៣៤៤រូប ដែលបម្រើការងារនៅសាលារាជធានីភ្នំពេញ និងសាលាខណ្ឌទាំង១៤៕