ជួសជុលផ្លូវនិងស្ពាន លើកំណាត់ផ្លូវជាតិលេខ៩៥ ប្រវែង ៧៩,៥គីឡូម៉ែត្រចាប់ពី ទីរួមស្រុកឆែប ដល់ ភូមិភ្នំដែក ស្រុករវៀង
ខេត្តព្រះវិហារ៖ ដើម្បីសម្រួលចរាចរណ៍ជូនប្រជាពលរដ្ឋអោយធ្វើដំណើរបានស្រួល និងដើម្បីថែទាំផ្លូវកុំអោយខូចខានធ្ងរផងនោះ មន្ទីរសាធារណការ និងដឹកជញ្ជូនខេត្តព្រះវិហារ ដឹកនាំដោយលោកសំ លាងទ្រីជាប្រធានមន្ទីរ បាននិងកំពុងដាក់គ្រឿងចក្រចុះធ្វើការជួសជុលផ្លូវនិងស្ពាន លើកំណាត់ផ្លូវជាតិលេខ៩៥ ប្រវែង ៧៩,៥គីឡូម៉ែត្រចាប់ពី ទីរួមស្រុកឆែប ដល់ ភូមិភ្នំដែក ស្រុករវៀង ខេត្តព្រះវិហារ ។
លោកសំ លាងទ្រីជាប្រធានមន្ទីរសាធារណការ និងដឹកជញ្ជូនខេត្តព្រះវិហារបានអោយដឹងថា នៅថ្ងៃទី២៧ តុលា ២០១៨នេះ ក្រុមការងារនៃមន្ទីរសាធារណការ និងដឹកជញ្ជូនខេត្តព្រះវិហារបាននិងកំពុងធ្វើការងារថែទាំជាប្រចាំ លើកំណាត់ផ្លូវជាតិលេខ៩៥ ប្រវែង ៧៩,៥គីឡូម៉ែត្រចាប់ពីគីឡូម៉ែត្រ ០+០០០ ទីរួមស្រុកឆែប ដល់គីឡូម៉ែត្រ៧៩+៥០០ ភូមិភ្នំដែក ស្រុករវៀង ខេត្តព្រះវិហារ ដោយសម្អាតរុក្ខជាតិតាមសង្ខាងផ្លូវ, ស្រោចកៅស៊ូលុបស្នាមប្រេះ ស្រុត សំបុកមាន់, ជួសជុលស្ពាន និងកៀរសម្រួលផ្លូវក្រាលក្រួសក្រហម។
លោក សំ លាងទ្រី ក៏បានសុំអភយ័ទោសដល់បងប្អូនប្រជាពលរដ្ឋ ដែលបានជួបប្រទះការលំបាក ពេល ធ្វើដំណើរឆ្លងកាត់តំបន់នេះ ស្របពេលដែលជំនាញមន្ទីរសាធារណការ កំពុងធ្វើសកម្មភាពជួសជុលផ្លូវនោះ។ លោកក៏បានអរគុណដល់ក្រុមការងារជួសជុលផ្លូវថ្នល់ នៃមន្ទីរសាធារណការ និងដឹកជញ្ជូនខេត្តព្រះវិហារ ដែលបានខិតខំប្រឹងប្រែងអស់កម្លាំងកាយចិត្ត ធ្វើការជួសជុលផ្លូវនេះឡើងវិញ ដើម្បីឲ្យប្រជាពលរដ្ឋ ធ្វើដំណើរបានយ៉ាងឆាប់រហស័ ទាន់ពេលវេលា និងប្រកបដោយសុវត្ថិភាព៕